1 Təzə sa mə̌ğ mə̌ğpanan Q'ončuğoynak',

Nu ak'eśi əşur biq'iyone Şo!

İz kiyexun hər şeye ayesa,

Şuk'k'alast'a nu bakala zorene çökt'est'a Şot'in bitova. *98:1 Ǐvel mə̌ğ. 33:3; Qay. əyit 6:9-10;

2 İçu nu çalxalt'oğone İzi turin oq'a laxi Q'ončuğon,

İzi düzgünluğane ak'est'i azuk'xo!

3 Kamtenebi Şot'in israilluğoxun İzi nu badalbakala çuresuna,

İz tadi əyiti loxol çurepi.

Dünyəni bip' t'ǒğenal anek'i beşi Buxačuğon yaynak' eçala çark'esuna.

4 Mǔq səsur c'evk'anan Q'ončuğoynak', ay dünyəne bakalorox bito,

Farpi əçipanan, bartanan ef ük'q'an qayeśi!

5 Arfa farpi Q'ončuğo tərifləyinşanan,

Arfin faren mə̌ğpi tərifləyinşanan Şot'o!

6 Şeyp'ur q'a zurna farpanan Q'ončuğoynak',

Mǔq səsur c'evk'anan yaynak' Padçağ bakalt'aynak'!

7 Mǔq səsur c'evk'anan, ay dəniz q'a iz boş bakalorox bito!

Barta dünyənenal muz qaypi bito amdarxoxun sagala mə̌ğq'anpi.

8 Barta oqurxonq'an iz ganuxun hayzeri çəpibi,

Buruxmuğonq'an əçipi mǔqexun!

9 Şot'o görə ki, mone, enesa Q'ončux me dünyənə düzgün divanbseynak',

Bito azuk'xoy loxol sa piin běği

Şot'oğoynak' düzgün q'ərar c'evkseynak'e eysa.

Ak'est'a vi mǔqluğa, ay dünyə!