99
99-ci Ǐvel mə̌ğ
1 Q'ončuxe me dünyəne padçağluğbalo,
Q'ı̌beq'an barta azuk'xon!
Angelxoy arane arśiyone Şo,
J̌ı̌k'eśeq'an barta oç̌al! *99:1 C'eys. 25:22
2 Siona †99:2 Sion - Yerusalim şəhər Sion buruğoy loxole, şot'o görəl Sion Yerusalima tadeśi s'iyurxoxun soğoney. bakala Q'ončux kalane,
Bito azuk'xoy loxol kalaluğbalone Şo.
3 T'ut'upeq'at'un barta Vi s'iye kalaluği běš,
Mə̌ğpi alabeq'at'un barta şot'o,
Ǐvel bakalonu Hun!
4 Zorba Padçağnu Hun, düzgünluği binorina laxiyonu!
İak'ovi nəsilə bitot'ay loxol sa piin běğsun,
Düz yaq'en taysuni k'ə baksuna ak'est'iyonu Hun!
5 Beş Buxačux bakala Q'ončuğoy s'iya alabanan,
Şot'ay turin oq'a biti bul k'os'banan,
Ǐvel bakalone Şo!
6 Moisey q'a Aarone bake Şot'o q'ulluğbala běyinšxoy boş,
Şamuelenal Şot'ay s'iya duğine afırıpe,
Q'ončuğot'un k'alpi xoyinšp'e şot'oğon,
Şot'inal coğabsuz tene efe şot'oğo.
7 Sütün k'inək' çurpi asoyi boşt'ane əyitey şot'oğoxun, ‡99:7 C'eys. 33:9
Əməlt'unbsay Buxačuğoy bürüşit'oğo şot'oğon,
Şot'ay əyitəxun tet'un c'eysay.
8 İnbaksay Hunal şot'oğoy xoyinša,
Ay beşi Buxačux bakala Q'ončux.
İçoğoy əşp'est'i günaxi cazina zapesaldayin,
Bağışlayinşala Buxačuxen baksay Hun israilluğoynak'.
9 Beşi Buxačux bakala Q'ončuğoy s'iya alabanan,
Bul k'os'bananQ'ončuğo İzi məsk'ən saki ı̌vel buruğo,
Ǐvel bakala Buxačuxe Şo!