1 Mǔqezbaksa za "Q'ončuğoyxrama tağen" əyitə uk'at'an.

2 Mone, hari p'ap'eyan,

Vi darvazin ǰomost'ayan, ay Yerusalim!

3 Yerusalime mo,

Sıx, ost'aar biq'eśi şəhəre mo.

4 Q'ončuğon c'ək'p'iyoroxe eysa miya,

İsrailaxun bakiyorox içoğoynak' laxeśi k'anuna görət'un giresa miya,

Hari Q'ončuğoy s'iyat'un alabsa şot'oğon.

5 Padçağxoy arśi divanbseynak' bakala taxt'urxone bu miya,

Me taxt'urxoy loxol arśit'un içoğoy düzgün q'ərarxo c'evk'e Davidi nəsiləxun bakalt'oğon.

6 Afırıpi serluğ q'a xeyir-bərəkət çurekinan Yerusalimeynak',

Metər upanan: "Barta va çureğalt'oğon t'ar ği hik'ə maq'at'un avabaki,

7 Barta vi bariğon dava maq'an ak'i,

Barta vi q'aloox şot'oğoynak' bač'anq'an baki".

8 Bez ailinə, bez ı̌šat'oğo görə

"Vaynak' xeyirq'an baki" nexzu.

9 T'iyane beşi Buxačux bakala Q'ončuğoyxram,

Barta şaat' ğimxoq'an va q'ısmat baki.