1 Arisa ŋul’kup̱ ’kwani ma Israyiil uni iikin mo ’peni Pa Iliim dhali p̱u’dkin mo e mom bwaasho jin yuḵu gway ka Sinaa/ mo a’di jin diki’d mo em bwaman gi Pa Iliim dhali Pa Sinaa/ mo. A’di ta’da cim ma ’kume’d i ’ce’dka mudhe’d ka ppee jin ’kon ma p̱o/ i su/ mo i’ko’di monycum buni ’peni Bampa/ Masir mo. 2 Dhali e mombwaasho tani uni miikina gumgum ap̱owa Musa dhala Haruun mo. 3 Dhali uni oki uni gwo mo ki: Midi ’taki ’bor ki aman mina wuyu/ mo e me’d gi TAP̱A e Bampa/ Masir mo. E mun tani aman misha ’ko a’cesh dhali ’ka shum mo dhali shwa aris to gun o am bwa i kap̱ mo. Hili um bala suski aman ka pije/ mo e mom bwaasho mo i ’kosha tul ’kup̱ kwani ’baar mo ki ṯe/ mo ba/.

4 Dhali yan’ko’d TAP̱A oki’da Musa gwo mo ki: Aha/ mina rasku/ tonṯe/ ’peni momis me’da sho’k mo gom um mo. Dhali ’kwani mini ii ka pije/ isa yempa/ mo dhali tul tonṯe/ is mo gom jasa cima ’de/ c̱aan mo ki aha/ mina nyo/ uni mo waḵki/ uni mini ii e gwoŋḵan pem walla yisa mo. 5 Ka cim pe’de/ mo tani uni mini ḵal tonṯe/ ka ’buḵum ’ban mo dhali thoson a’di mo.

6 Wakan aMusa dhala Haruun ṯorkina ris ’kwani ma Israyiil gwo mo ki: Ki mo midi ta mom’pimpili/ mo tani um mini mish gwo ’ban ki TAP̱A a’di suski um ka pije/ mo ’peni Pa Masir mo. 7 Dhali ki mon’thamo/ um mini p̱ar monyca gi TAP̱A e mo haali/ a’di ciḵki’da gumgum bum ap̱o/ a’di mo. Haali/ aman tana ija mo, jin miikina uma gumgum ap̱o/ aman kan mo? 8 Dhala Musa oki gwo mo ki: Um mini mish ki a’di ta TAP̱A jin c̱i ki um shum mmo’ka mom’pimpili/ mo dhali maaŋḵuthu’d mmoshwa mon’thamo/ mo haali/ TAP̱A ciḵki’da gumgum bum mo ap̱o/ a’di mo. Aman tana ija sa/? Mo ma gumgum bum di’d ap̱o/ aman yisa hili ap̱o/ TAP̱A mo be.

9 Dhali a Musa oki’da Haruun gwo mo ki: Oyi arisa ŋul’kup̱ ’kwani ma Israyiil gwo mo ki: Iiyu/ ibwambori TAP̱A mo haali/ a’di ciḵki’da gumgum bum mo. 10 Dhali me’d jin ṯorkin ma Haruun aŋul’kup̱ ’kwani ma Israyiil gwo mo tani uni hilki mo mo ’kup̱ ki mom bwaasho mo dhali monyca gi TAP̱A a’di piki’d mo eya raḵ mo be. 11 Dhali TAP̱A oki’da Musa gwo mo ki: 12 Aha/ ciḵkina gumgum gi ’kwani ma Israyiil mo. Ṯori uni gwo mo ki: Mom’pen ḵaskum mo tani um mini ’ka shum mo, dhali mon’thamo/ mo tani um mini shwa maa i kap̱ mo. Dhali yan’ko’d mo tani um mini mish mo mo ki aha/ tana TAP̱A Arumgimis bum mo be.

13 Ki mo ta mom’pimpili/ mo tani ḵuskun ṯẖa’thkin ka ris mo dhali kuma ’cesh c̱aan ’baar mo. Dhali mon’thamo/ jap̱e/ ’kaka’d mo be. 14 Dhali ki jap̱e/ birki is mo tani yan’ko’d bunya jin p̱o’dap̱o’d diki’d mo eya p̱o/a ’cesh gi mom bwaasho mo me’da ḵwarma’c to mo jin wana e ka ḵomo/ mo be. 15 Ki ’kwani ma Israyiil p̱arki a’di e mo tani uni oki gwo ka rem ’kup̱ mo ki: Atinta a’di a’dan mo? Haali/ uni ’koki mish a’di gi wakan mo. Dhala Musa oki uni gwo mo ki: A’di ta tonṯe/ jin c̱ikina TAP̱A um mo mmoshwa mo be. 16 Yansan a’di ta gwo jin ḵankina TAP̱A mo ki: Tuli tonṯe/ is mo um ’baar ka ’deṯe/ ’deṯe/ mo ki nyanye/ me’d jin mina umi ŋap̱ a’di mo. Um mini bar a’di ka balapip̱ isu/ mo isi me’da ris ’kwani gi gu’b pini mo.

17 Dhali ’kwani ma Israyiil miiki a’di wakan mo, uni tulki uni is mo. Kun tiya tulki is ki nyanye/ mo dhali kun tiya tulki is ki gwa’d gwa’d mo be. 18 Hili ki uni barki a’di bwa mo tani a’di jin tul kum piti is ki nyanye/ mo tani a’di be i ’kosh jwa ’peni ji gi ŋap̱u mmodiki ur ’kup̱ mo. Dhali a’di jin tulki is ki gwa’d gwa’d mo tani a’di yisa hara toŋ kamuwa. Aris uni tulki uni is mo isi me’d jin mina uni i shwa a’di mo be. 19 Dhali aMusa oki uni gwo mo ki: Wathiŋ kamu/ yisa di’da jin midi boc̱ a’di itagi mon’thamo/ mo. 20 Hili unin tiya ciḵ gwo ’pena Musa yisa. Kun tiya boc̱ki ’bana tiya i tagi mon’thamo/ mo dhali a’di shwakin ma yish mo dhali c̱a’b ki bul bul mo, dhali aMusa shwa’da nyor ap̱o/ uni mo be, 21 Mon’thamo/ isa yempa/ uni tulki uni is mo aris uni ka ’deṯe/ ’deṯe/ me’d isi ji gi mina uni shwa a’di mo. Hili ka tente/ caki’d ka nyor piti ki ’ba’th ’ba’th mo tani uni gun boc̱kona ’cesh ṯo’dkin mo be.

22 Ka cim pe’de/ mo tani uni tulki a’di is ki nyanye/ me’di su/ me’d tonṯe/ mo ka balapip̱i i doŋon gom uni ka ’deṯe/ ’deṯe/ mo. Dhali aris tap̱a ka ŋul ’kup̱ p̱u’dkin mo dhali ṯor ka Musa gwo mo. 23 A’di oki uni gwo mo ki: Yansan a’di i ta gwo jin ḵankina TAP̱A wakan mo ki: Ka’thamo/ a’di ta’da tee jin minu dosh shoka ’cesh mo mmosi/is mo jin ḵogu gom TAP̱A mo. ’Thoḵi to jin ŋap̱a umi ’thoḵ mo dhali shuni to gun ŋap̱a umi shun mo. Dhali aris uni gun urki ’kup̱ mo tani thoson ki uni mo ki uni minu dhuku/ mo ntaga ’thamo/ mo be. 24 Wakan uni thosonki uni mo ntagi mon’thamo/ mo me’d gwo jin ḵankin ma Musa uni mo. Dhali uni ’koki bul mo mo dhali ayisha kamu/ yisa di’di e uni mowaa. 25 Musa oki gwo mo ki: Shwayi a’di shwane/ mo ma, haali/ shwane/ a’di i ta’da cim ma pesu/ jin sinu is jin ta’da cim jin c̱inu ki TAP̱A mo. Shwane/ um yisa mini gam tonṯeŋ kamu/ apije/ mo yisa. 26 Goma cim pe’de/ mo tani um mini tul uni is mo hili ka cima pesu/ mo tani a’di jin ta’da cim mosi/is mo, um yisa mini gam tonṯeŋ kamu/ yisa mowa.

27 Ka cima pesu/ mo tani ’kwanin tiya uni iikin ka pije/ mo mmotul tonṯe/ is mo hili uni gam toŋ kamuwa? 28 Yan’ko’d TAP̱A oki’da Musa gwo mo ki: Me’d e kata ushkina um gwoŋḵan pem e mo ’peni gwo jin c̱ika um ki ’ce’de/ ’ce’de/ mo? 29 Kayi gwo e ki TAP̱A c̱iki uma cim gi mosi/is mo dhali gom kan mo tani ka cim pe’de/ mo aha/ c̱ikina um tonṯe/ goma cimi su/ mo ba/. Dhalka ris ’kwani ka ’deṯe/ ’deṯe/ ’kon e mom buni mo. Dhalku/ ki dhal wathin ’de/ bway mo mmoya ka pije/ mo ’peni mom piti ka cima pesu/ mo. 30 Wakan ’kwani si/ki is mo ka cima pesu/ mo be.

31 Wakan ’kwani ma Israyiil yuḵki a’di gway mo ka manna*Manna: ’pemen piti ta atinta a’dan? mo. A’di wana e ki emen to jin miinu a’tash dhali ta gi kush mo. Dhali ’kuny piti waka biskwiita p̱o’d ’ban jin miinu ka yina dham mo be. 32 Dhali aMusa oki gwo mo ki: TAP̱A ḵanki ana mmodhuwa mannan tiya gom emen bana jin mina uni mish tonṯe/ ’peni ji gi c̱ikina a’di ana mmoshwa e mombwaasho mo me’d jin suskina a’di ana ka pije/ mo ’peni Pa Masir mo be. 33 Dhali aMusa oki’da Haruun gwo mo ki: Buthi dhur mo dhali ’thuṯẖa manna jin baru ka balapip̱ i bwaman mo. Dhali kar ki a’di ibwambor gi TAP̱A mo ki a’di minu kar ki tur mo gom emen bana mo. 34 Me’d gwo jin ḵankina TAP̱A aMusa mo tani wakan aHaruun karki’da manna e mo jin mina a’di di ki sule/ mo ibwambora sanduuḵ jin dina gwoŋḵan jin ṯenu mo be. 35 Dhali ’kwani ma Israyiil uni shwakina manna ki yili issu/ mo ntagi uni p̱u’dkin mo e bampaŋ Kanaan mo dhali ’ko mo.

36 Tom bar yan wana e ka balapip̱ iss ’de/ mo be.