1 Arisa ŋul’kup̱ ’kwani ma Israyiil ’baar mo uni joc̱kin mo ’peni mombwaasho jin yuḵu gway ka Siin mo dhali joc̱kon e mon tiya ka ris mo isi me’d gwoŋḵan gi TAP̱A mo. Dhali uni ki thum moŋ’kom buni e Pan Rep̱idiim mo hili yi’deŋ kamu/ yisa di’da jin mina ’kwani i p̱i mo. 2 Gom gwo gi wakan mo tani ’kwani miikina gumgum ap̱owa Musa o ki: C̱i am yi’de/, aman ki p̱i mo ma. Dhala Musa thoḵki uni gwo mo ki: Atinta miikina uma gumgum ap̱o/ aha/ kan mo? Atinta si’da/ pala um TAP̱A kan?

3 Hili ’kwani ḵu’thkina ’kus guŋkuru/ mo imun gom yi’de/ mo dhali ’kwani miikina gumgum ap̱o/ aMusa naskina/ mo dhali o gwo mo ki: Atinta i susina /e aman ka pije/ mo ’peni Pa Masir mo mmo’kosh aman dhali uc̱im bam dhali to em bam jwa mo ki yi’dem bu’th kan mo?

4 Wakana Musa ’thoki TAP̱A mo ki: Atinta i miga/ mii mo gom ’kwani gwansan mo? Uni ’dishkina ’twa/ mo mmo’kosh aha/ ki wosh mo be.

5 Dhali TAP̱A oki’da Musa gwo mo ki: Yayi ibwambori ’kwani mo. Susi ’kwaniŋ gwanyjwaha/ ma Israyiila tiya nyaḵki /e mo dhali guyi cwam pini i me’d mo a’di jin dorkina /e yi’de/ ma Niil mo dhali yaku/ mo. 6 Aha/ mina dosh ibwambori /e ap̱o/ wosh mo e Wosh Sinaa/ mo. Dhali /e mini dor wosh mo dhali yi’de/ midi gac̱u/ ka pije/ mo ’peni a’di mo jin mina ’kwani i p̱i a’di mo. Dhali aMusa miiki a’di wakan mo e jis e gi gwanyjwahaŋ ’kwani ma Israyiil mo be. 7 Dhali a’di yuḵki yansan gway ka Massa*Massa: ’pemen piti ta mompal mo dhala Miiriba†Meriba: ’pemen piti ta mo ma gumgum mo haali/ ’kwani ma Israyiil miikina gumgum mo dhali uni palki TAP̱A mmo/o gwo mo ki: A TAP̱A di’di bwamani ana ’te/ tana walla p̱iyi’d mo?

8 Yan’ko’d ’kwani Amaliiḵ p̱u’dkin mo dhali as ’kwani ma Israyiili cine/ mo e Pa Rep̱idiim mo be. 9 Dhali aMusa oki’da Jeshuwa gwo mo ki: Kwanyi ’kwanim bana mo. Dhali iiyi um ka pije/ mo mmo/as ’kwani Amaliiḵ nycine/ mo. Ka’thamo/ aha/ mina dosh i ’kup̱an wosh mo ki cwa ma Arumgimis e me’d pem mo be. 10 Wakana Jeshuwa miiki’d mo me’d jin ḵankin ma Musa a’di gwo mo. Dhali uni as ki ’kwani Amaliiḵ nycine/ mo. Dhala Musa dhala Haruun dhala Huur iikin ka gagamis i ’kup̱an wosh mo be. 11 Me’d jin ’de’kkin ma Musa me’di mis mo tani Israyiil p̱iki mii e mo. Dhali me’d jin thulkina a’di me’d piti ka ’cesh mo tani ’kwani Amaliiḵ uni p̱iki mii e mo be. 12 Hili me’d ma Musa i wuki e mo. Wakan uni ḵalki wosh mo gom a’di mmoc̱a’b ap̱o/ a’di mo. Dhali aHaruun dhala Huur bu’thki me’d piti mo, jan ṯal ’deŋ kamu/ ki ’bana ’deŋ kamu/ mo dhali jaŋ kamu/ ka ’bana kamu/ mo. Wakan me’d piti ’bi’thkina is mo ntagi mo jin yakin ma tente/ jis mo be. 13 Ki mii yan mo tani Jeshuwa dorki ’kwani Amaliik ’twa/a ’cesh mo ki gandala turga/ mo be.

14 Dhali TAP̱A oki’da Musa gwo mo ki: ’Kwari gwo yansan mo ki gwo jin minu ka e mo e bwaman ma warkaŋ ’kuc̱ mo. Dhali bahi gwo yansan e bwany ’ce ma Jeshuwa mo haali/ aha/ mina ’ce’d ’Kwani Amaliiḵ sho’k ka kuluny mo be. 15 Dhali a Musa nyaŋki’da gwaṯa/ mo dhali yuḵ a’di gway mo ki: TAP̱A a’di i ta’da berḵam pem mo. 16 A’di o gwo mo ki: ’Deka berkam piti isi mis mo. TAP̱A midi as ’kwani Amaliiḵ nycine/ mo ki sule/ sule/ mo be.