1 Rau/iil jin ta’da mar ma Musa ta’da gasiis gi Pam Midyaan mo. A’di ciḵki gwo goma ris to ’baar mo jin miikin ma Arumgimis goma Musa mo dhali ’kwanim piti ka Israyiil mo. Dhali a’di ciḵki gwo ki TAP̱A suski ’Kwani Israyiil ka pije/ ’peni Bampa/ Masir mo.

2 Dhala Rau/iil jin ta’da mar ma Musa mo a’di suski’da Sippuura mo a’di jin ta asha Musa mo i’ko’da Musa hashki’da yim mo nyaḵki uc̱iŋ gwaṯẖ ma yim su/ mo ’peni a’di mo, 3 dhali uc̱iŋ gwaṯẖ ma yim su/ mo. Jan ṯal ’de/ yuḵkunu gway mo ka Jirshuum*Jirshuum: Gway yan wana e ki gwo jin onu ki: Wathi/ ’peni bampaŋ kamu/ mo ki ’twaŋ ’kwani Ibraniyiin mo. mo, haali/ aMusa oki gwo mo ki: Aha/ yakina yany c̱a/ mo e bampa/ ’kwanin tiya mo.

4 Dhali gway gi jaŋ kamu/ mo tani a’di i ta’da Iliyaasir†Eliyaasir: Gway yan wana e ki gwo jin onu ki: Arumgimis woṯẖi aha/ mo. haali/ a’di oki gwo mo ki: Arumgimis ma babam pem mo tani a’di ta’da manwoṯẖ aha/ mo dhali woṯẖ aha/ mo ’peni gandal ma P̱irawn mo be. 5 Dhala Rau/iil p̱u’dki’d mo nyaḵki asha Musa dhali iya/ i su/ mo e mo jin bu’thkin ma Musa mondi me’d e mombwaasho e wosha turga/ ma Arumgimis mo be. 6 Dhali a’di hashki’da Musa gwo mo ki: Amar pini ka Rau/iil a’di yayi’d nyaḵki ashin mo dhali uc̱iŋ gwaṯẖ ma yimi su/ mo be.

7 Wakana Musa yaki’d mo dhali gama mar piti ’kup̱ mo dhali ’tuḵ a’di i is mo dhali p̱i a’di ’twa/ mo. Dhali uni theki me’di monṯal ’de/ mo dhali uni iiki bway gu’b burrinye/ mo be. 8 Dhali yan’ko’da Musa ṯorki’da mar piti aris to ’baar mo jin miikina TAP̱A a P̱irawn mo dhali aris ’kwani Pam Masir i ’baar mo gom gway ma Israyiil mo. Dhali a’di ṯorki’da ris ton diṯga/ kun p̱u’dkina p̱o/ uni i bway mo dhali mii jin woṯẖkina TAP̱A uni mo be.

9 Dhala Rau/iil ’kunykina bwa mo gom tom ’borga/ jin miikina TAP̱A goma Israyiil mo e mii jin miikina a’di mmo’cuḵ uni ka pije/ ’peni me’d gi ’kwani Pam Masir mo be. 10 Dhala Rau/iil oki gwo mo ki: Mom’bor mii gom TAP̱A mo a’di jin ’cuḵki um ka pije/ mo ’peni me’d gi ’kwani Pam Masir mo dhali ’peni me’d ma P̱irawn mo. Dhali mom’bor mii gom TAP̱A jin ’cuḵki ’kwani ’peni mii c̱iŋkinam buni mo be. 11 Shwane/ aha/ misha ki TAP̱A a’di i eḵki’d mo mmobola risa ruma tiya e mo haali/ a’di ’cuḵki ’kwani mo ’peni bwaŋ ’kwariny me’d gi ’kwani Pam Masir mo ki uni ṯu/ulki uni ki mii maṯẖ mo. 12 Dhala Rau/iil a’di jin ta’da mar ma Musa mo a’di c̱iki to jin c̱inu ki me’d jin ’thanu o’d dhali miiya Arumgimis abasa ’cesh mo. Dhala Haruun dhali aris ’kwaniŋ gwanyjwaha/ ma Israyiil uni p̱u’dkin mo dhali shwa tonṯe/ jin karu ki she/ goma Arumgimis mo nyaḵka mar ma Musa mo be.

13 Dhali ka’thamo/ ki eŋ kamu/ mo tani aMusa c̱a’bki’d mo dhali dwall ’kwani gwo mo. Dhali ’kwani doshkin mo mmo’kama Musa is ki deḵ mo ’peni mon’thamo/ ntagi mom’pimpili/ mo be. 14 Ka mar ma Musa p̱arki’da ris to gwansan e mo kun miikina a’di mo gom ’kwani mo tani a’di oki gwo mo ki: Atinta a’dan jin miikina /e ’kwani mo? Atinta dina /e /e ’de/ kan dhali aris ’kwani doshkini ’kam /e is mo ’peni mon’thamo/ ntagi mom’pimpili/ mo?

15 Dhali a Musa thoḵki’da mar piti gwo mo ki: Haali/ ’kwani p̱u’dkini aha/ mo mmotheke’th gwo mo goma Arumgimis mo be. 16 Ki uni su’kkin ki gwo mo tani yan’ko’d uni ki iiyu/ i aha/ mo dhali aha/ ki mish gwo pwaḵ bwa bese/ i bwamani uni gun su’kkin ki gwo mo. Dhali aha/ ki dhu uni mo mmomish gwoŋḵan ma Arumgimis kun ’kwarkunu mo dhali gwoŋḵan piti kun c̱inu mo be.

17 Mar ma Musa oki a’di gwo mo ki: To jin miikina /e yisa ’boro’da. 18 /E dhali aris ’kwani gun iiyini /e mo tani um mina isi wu e mo, haali/ to diṯadiṯ gom /e mo. /E yisa mini mish ṯel shoka ’cesh /e ’de/ mo yisa. 19 Ciḵi gwo gi ’twam pem mo. Aha/ mina logom /e ki gwo mo dhali Arumgimis midi di nyaḵki /e mo. A’di ’boro’d gom /e ki dosh i bwaman ’kwani dhali Arumgimis mo dhali ḵala ris tom buni kun ṯoci uni ’kus eya Arumgimis mo be. 20 Dhali /e mini ṯor uni gwoŋḵan mo dhali gwo gom moŋ’ko mo. Dhali dhuyi uni mo mmomish bway mo a’di jin mina uni mish ii nycine/ mo gom to jin mina uni i mii mii mo be.

21 Hili kwanyi ’kwani kun mishi mii mo si’da/ ’peni aris ’kwani mo, dhali dhu uni ki jwaha/ ap̱o/ ’kwani alip̱ mo dhali ap̱o/ iss ’kwanimpa ka mudhe’d mo dhali ap̱o/ iss ’kwanimpa isu/ i’ce’dka ’kume’d mo dhali ap̱o/ ’kwani ka ’kume’d mo be. Uni mini mii ta ’kwani gun ḵo/on Arumgimis mo, ’kwaniŋgwaṯẖ kun dhelel ma du mo dhali uni kun shi/ki mii kun wanu ’kwani is ki ton tiya i e mo. 22 Dhali dhalki uni a’di i dwall ’kwani gwo isa yempa/ mo. Eya ris dhan mii kun p̱iki e mo tani uni mini mishi uni ḵalu i /e mo. Hili ushi mii kun p̱o’da she/ mo tani uni a’di mini pwaḵ uni bwa mo uni ki is buni uni ’cena mo. Wakan a’di i mina to i ’dish mii ki ’dish gom /e mo dhali uni mini mish ton diṯin nyaḵ ḵal ki /e mo be. 23 Waḵki/ /e mini mii mii yan mo tani dhali Arumgimis ḵanki /e wakan mo tani yan’ko’d /e mini mish ’dim ’kup̱ mo. Dhali aris ’kwani gwansan si’da/ mini ii mom buni ki moŋḵu’th is mo be.

24 Gom gwo gi wakan mo tani aMusa a’di c̱iki’da hirdhe/ ki gwo ma mar piti mo dhali miiya ris to gwansani ’baar mo jin okina a’di mo be. 25 AMusa a’di kwanyki ’kwaniŋ gwaṯẖ kun mishki mii mo ’peni aris ’kwani ma Israyiil mo dhali dhuki uni mmota tap̱a ap̱o/i ’kwani mo, i tap̱a kun ji ’kwani alip̱ mo dhali ’kwani iss ’kwanimpa i mudhe’d mo dhali a/iss ’kwanimpa isu/ i ’ce’dka ’kume’d mo dhali imandwall gwo i ’kume’d mo be. 26 Dhali uni dwallki ’kwani gwo isa yempa/ mo. Gwo kun ’bitha’bi’th mo tani uni ḵalki a’di ka Musa mo, hili ushi mii kun p̱o’da she/ mo tani misha uni dwall ki is buni uni ’cena mo be.

27 Dhali yan’ko’da Musa dhalki’da mar piti bway mo mmoya mo dhali a’di yaki’d mo ki bway bampam piti mo be.