Gwo jin ’Kwar ma YAKUUB mo
1
Monthe Me’d mo
AYakuub jin ta c̱iŋkina/ ma Arumgimis mo dhali Tap̱a Yesus Ḵrisṯẖos mo be.
E uni kun ’kon ma waḵi ’kume’d i’ce’dka su/ mo uni kun c̱ekerkunu bwa mo.
Monthe me’d mo.
Moŋgam Gwo Is dhali Mo jin Dhunu Is ki Gwa’d mo
Kari bwaŋ ’kunyga/ mo ma, iwaḵ pem, ki um jemki ’kup̱ ki mompal ki she/ ki she/ mo. Haali/ um mishkin ki mompal gi moŋgam gwo is bum pucurki’d mo mmoṯel sho’k mo be. Dhali dhalki mo jin ṯelu sho’k mo ’tu’da/ mo jin pucuru mo ki um mini ta kum ’borgaŋ gana/ mo dhali ta kun thimin mo mmo’koki har toŋ kamu/ mo.
Waḵki/ jan ṯal ’deŋ kamu/ ’peni bwam um hara moyuḵ mo tani dhalki a’di doṯo’da Arumgimis mo a’di jin c̱iki’da ris ’kwani ka duŋ gana/ mo ki dar gi ŋadhum mo dhali a’di minu c̱i a’di mo be. Hili dhalki a’di doṯ a’di ki moŋgam gwo is mo ki dar gi bwa jin shinu ’kup̱ mo haali/ a’di jin shina bwa ’kup̱ mo tani wana e ki yi’deŋ ḵumma/ jin bir bakal mo jin boru mo dhali jin ’dasha ’tham mo be. Haali/ wathi/ c̱aan midi mii diki mii ṯosh ki a’di midi bu’th toŋ kamu/ ’peni Tap̱a mo. A’di jin ’kona bwa isu/ mo dhali a’di jin gwakalki ya mo e bway piti ’baar mo.
Hili dhalka kana ha’th’ko’d ki kar mo mmokar ’bam piti ki ca mo e mo jin karu a’di ki ca mo 10 dhali a’di jin ta pa ki pa mo e mo jin karu a’di ki gwa’d mo haali/ me’d jandi/ ma sho mo tani a’di midi la p̱e mo be. 11 Haala tente/ sulu’d mo ki mom’ba’th piti jin shi’bili to mo dhali a’di ki ḵutha sho mo dhali jandim piti raskin mo dhali jarom piti ’ce’dkunu sho’k mo. Wakan si’da/ wathi/ jin ta pa ki pa mo midi us mo ki jog e bway piti jin ura a’di to isho’k mo be.
Mo jin Paluwa Pal mo
12 Mom’bor mii gom wathi/ jin ’dimki ’kup̱ mo e mompal mo haali/ ki a’di mishki mompal mo tani a’di midi bu’th toŋ’kup̱ gi mondiki/e mo a’di jin on ma Arumgimis gwo is gom uni gwansan kun eni a’di mo be. 13 Dhalku/ wathiŋ kamu/ ki dhal bway mo ki a’di palu mo mmo/o gwo mo ki: Aha/ pal ma Arumgimis mo. Haali/ Arumgimis molu pal ki tonthus mo dhali a’di ki is piti si’da/ diki pal jan ṯal ’de/ mo be. 14 Hila ris ’kwani ka ’deṯe/ ’deṯe/ palkunu mo ki a’di jin diri’da dir mo dhali cesha bwa en’dap̱ buni mo be. 15 Dhali yan’ko’d mon’dap̱ e ki a’di bwaakunu mo tani a’di dho’thki miinthus mo dhali miinthus ki a’di caki’d mo tani ḵalki mowu mo be.
16 Dhalku/ ki ta uni gun hegu e mo ma, iwaḵ pem kun enka/ mo. 17 Aris tom ’boron gun c̱inu ki me’d mo kun ta kum ’borgaŋ gana/ mo tani uni ’peni momis mo mmothulu/ mo ’pena Baba gi moŋkush mo. E a’di mo tani mo jin aḵuwa aḵ yisa di’da walla ala p̱iyi’d si’da/ ’peni mo jin ṯukuwa ṯu’k mo. 18 ’Peni bwam pitiŋ gana/ mo tani a’di ki dho’th ana mo ki gwoŋ gana/ mo ki ana mina ta maman kun ṯwa/a/ ’peni mo/uḵ piti mo be.
Gwo jin Ciḵu dhali Mii Gwo mo
19 Mishi gwo yan mo ma, um iwaḵ pem kun enka/ mo. Dhalka ris ’kwani ’baar ka ’deṯe/ ’deṯe/ mer is mo ki jahanne/ mmociḵ gwo mo dhali c̱ori naskina/ mo dhali o gwo mo dhali c̱ori naskina/ mo dhali miiya nyor mo. 20 Haala nyor jin miina wathi/ mo tani a’di diki ta to jin mii mo ma ḵar/e goma Arumgimis mo. 21 Dhali ki mii gi wakan mo tani dhuyi aris tony nyogga/ ’pen ka pije/ mo dhali mii kun ’coḵa’coḵ kun ishin ka enthus mo dhali bu’thki mo jin dhunu is ki gwa’d mo gwo jin sinu mo a’di jin mishki’da ḵashiram bum woṯẖ mo.
22 Hili tayi imanmii gwo mo ma dhali dhalku/ ki ciḵ gwo jasi ’te/ mo mmohe’k is bum e mo. 23 Haali/ waḵki/ wathin ’de/ jin ciḵ jasi gwo ’te/ mo dhali diki mii a’di mo tani a’di wana e ki wathi/ jin hili jis/em piti jin dhodhu a’di mo eya hiljaro/ mo. 24 Haali/ ki a’di hilki is piti mo dhali ya mo tani dhali ki jahanne/ a’di ki this mohil jin wana a’di kan e mo be. 25 Hili a’di jin tu gwoŋḵan jin c̱inum ’borgaŋ gana/ mo tani a’di jin ta ji gi kara’da kar ki ’kus mo dhali a’di jin ’dim ’kup̱ mo mmodiki ciḵ jasi gwo ’te/ mo mmothis a’di e mo tani hili mii a’di yan jin miinu mo tani a’di iminu ’bor mii mo e a’di jin miikina a’di mo be.
26 Waḵki/ wathiŋ kamu/ kulum gwo ibwa ki a’di ta’da manluŋ to mo dhali diki ’kalitha le’d piti mo tani hili a’di he’kki’da dum piti e mo, mo jin luŋa wathi/ yan mo tani a’di ta mii jin miinu ki p̱e’th mo be. 27 Mo jin luŋu aluŋ jin dheleli’d mo dhali jin dinuki shi/ ki mii gi wakan mo ibwambor ma Arumgimis mo dhali Ababa a’di wa cikise/ mo be: mmohil gom uni gun tana thip̱a/ i e mo dhali uni gun wuna ikaṯẖ mo e monṯo’c bwam buni mo dhali mmokar is pitiŋ gana/ mo ki dar gi monyogga/ mo ’peni mony’cesh mo be.