2
Gwo jin Rumu Ap̱o/ Mii gi Miinuwa Mii ka Gwar ’De/ mo
Iwaḵ pem, dhalku/ mii ki mii ka gwar ’de/ mo me’d jin bu’thkina um moŋgam gwo is mo e Tap̱a Yesus Ḵrisṯẖos bana mo, a’di jin ta Tap̱a gi monyca mo. Haali/ waḵki/ wathiŋ kamu/ ta gi ’dolkon to me’d mo dhali hi’th burrinye/ jin bol tiya e ki ’bor i is mo mmoyayu/ e gu’b gi montul is bum mo tani dhali wathiŋ kamu/ jin hatha’ko’d hi’th burrinyem p̱orkin p̱u’dki’d mo si’da/ tani dhali um c̱i a’di jin hithi burrinye/ jin bol tiya e ki ’bor ahirdhe/ mo dhali o gwo mo ki: C̱a’bi imahan mo ma gana, dhali um ka yiha/ ki o wathi/ jin hatha’ko’d gwo mo ki: Doshi mmaṯṯaan, walla, C̱a’bi e sho’k pem mmahan mo ma tani ’kona um ki mii to ka ḵwam bwa wakan e bwam is bum mo dhali ta imandwall gwo gom gwonthus kun kulumkina um ibwa mo ’taa? Dhuyi ’ce mo ma, uma waḵ pem gun enka/ mo. Din ma Arumgimis ki kwany uni gwansan kun hatha’ko’d e mony’cesh mo mmota pa ki pa mo e moŋgam gwo is mo dhali mmota imanḵal mal gi bampa/ gi momis jin okina a’di gwo is gom uni gwansan kun eni a’di mo ’taa? Hili um this wathi/ jin hatha’ko’d mii mo. A’di diki ta unim pa kun ’cwar umma? A’di diki ta uni gun dir um e mo jin dwallu gwo mo ’taa? A’di diki ta uni gun wal gwo sora p̱o/ gway yan ki a’di jin taḵu mo jin yuḵu um mo ’taa?
Waḵki/ um ka jiŋ gana/ thimki gwoŋḵan ma maliḵ mo isi me’d Gwo ma Arumgimis kun ’kwarkunu mo ki: /E mini en amannyaḵ c̱a’b pini me’d is piniŋ gana/ mo tani um miin ki ’bore/ mo be. Hili waḵki/ um mii mii ka gwar ’de/ mo tani um miiki miinthus mo dhali um waḵa gwoŋḵan jin c̱inu mo me’d ’kwani gun dhaŋki gwo mo be. 10 Haali/ a’di yin jin dhuki gwoŋḵan jin c̱inu mo ka ’dan’dap̱ mo hili i/ush me’d mo gom jan ṯal ’de/ mo tani a’di wara’d ki wathi/ jin dina mii i’ba/ mo gom uni ’baar mo be. 11 Haali/ a’di jin o gwo mo ki: Dhalku/ c̱al ki mii mii mo ma, a’di si’da/ o gwo doḵ/e mo ki: Dhalka ’kosh ki mii ’kosh mo ma. Waḵki/ /e diki mii miinyc̱al mo hili i’kosha ’kosh mo tani /e waran ka mandhaŋ gwoŋḵan jin c̱inu mo be. 12 Wakan oyi um gwo mo dhali miiyi to mo wakan me’d uni gwansan gun minu dwall gwo mo ’ko’di gwoŋḵan jin dhu’da dhu ki ’kus mo. 13 Haali/ gwon dwall a’di dar gi mo jin minu miimii mo e a’di jin diki ṯor momiimii mo. Hili momiimii ta mo jin p̱inu mii e ap̱o/ gwon dwall mo be.
Moŋgam Gwo Is ki Dar gi Mii mo tani A’di Wu’d mo be
14 Dhali gwo bala nyo/u kata mo, iwaḵ pem mo, waḵki/ wathi/ o gwo ki a’di ta’d gi moŋgam gwo is mo hili idiki mii to mo tani a/mina moŋgam gwo is piti ita a’di is ki me’d mo ’taa? 15 Waḵka kan walla ’bwahan hatha to hi’th ’ko’d mo dhali dar gi tonṯe/ mmoshwa mo tani 16 dhali jan ’de/ ’peni um o uni gwo mo ki: Iiku/ ki moŋḵu’th is mo ma, dhali, ’Bathi is ki ’ba’th mo, dhali, ’Tu’di/ mo, ki dar gi to jin c̱ina um uni mo mmota mo gom buŋgwar is buni mo tani a/dhali mii yan a’di nyo/u ki ’bore/ ’taa? 17 Wakan si’da/ moŋgam gwo is ki is piti mo waḵki/ a’di dinuki mii to mo tani a’di wu’d mo be.
18 Hili wathin ’deŋ kamu/ midi o gwo mo ki: /E tan gi moŋgam gwo is mo dhali aha/ tana gi mii mo. Ṯor aha/ moŋgam gwo is pini ki dar gi miim pini mo ma dhali aha/ ki miim pem mo tani mina ṯor /e moŋgam gwo is pem mo be. 19 /E gami gwo is ka Arumgimis ṯal ’de/ mo. /E miin ki ’bore/ mo be. Me’da rum thus kun nyo/on si’da/ gam gwo is mo dhali cuna is ki thunthur mo. 20 /E ona bwa ki to minu ṯora, /e cim p̱us yan, ki moŋgam gwo is ki dar gi mii mo tani a’di ta’da bush ’ko’d mo be. 21 Ibrahiim jin ta’da babam bana dinuki kar ki mo ma ḵar/e ki mii mo ki a’di c̱i ya/m piti ka Is/hak ap̱owa gwaṯa/ jin miinuwa basa ’cesh mo? 22 /E mishin ki moŋgam gwo is nyaḵ ya ki miim piti mo dhali moŋgam gwo is a’di thimkunu ki mii mo be. 23 Dhali Gwo ma Arumgimis jin ’kwarkunu mo thimki gwo jin onu mo ka: Ibrahiim gamki’da Arumgimis gwo is mo dhali a’di karu a’di ki mo ma ḵar/e mo, dhali a’di yuḵu ka mugu ma Arumgimis mo be. 24 /E mishin ki wathi/ a’di karu ka ḵar/e ki mii mo dhali yisa ki moŋgam gwo is a’di ’de/ yisa. 25 Dhali ki mii jin nyaḵa’d kan mo tani dinuki kara Rahab si’da/ jin mii miinyc̱al mo, ki mo ma ḵar/e ki mii mo me’d jin bu’thkina a’di igumbway mo dhali ṯu’c uni ki ii ka pije/ ki bwaya kamu/ mowa? 26 Haali/ me’d buŋgwar jin dar gi shi/in mo tani a’di wuki’d mo, wakan si’da/ moŋgam gwo is jin dar gi mii mo tani a’di wuki’d mo be.