1 Ata miina ’kwani gi kala tiya adulaṯṯ mo,

dhali ’kwani gam ’twa/ ’kup̱ ki p̱e’th kan mo?

2 Imaliḵ gi ’kwaniny’cesh doshkin ki is buni ki ’dishe/ mo,

dhali itap̱a tuli isi monṯal ’de/ mo

ap̱o/ Tap̱a dhali ap̱o/ a’din ’de/ jin ’koshkunu ki monyca mo, mmo/o gwo mo ki:

3 Dhalki ana ’ce’da mondeḵ buni mo

dhali ṯaka nyoḵ buni ’peni ana mo.

4 A’di jin c̱a’bki’d eya ris momis mo tani p̱e’thki’d mo,

Tap̱a miiki uni ka mudhiny’cere/ mo.

5 Yan’ko’d a’di midi ṯor uni gwo eya nyor piti mo

dhali dher uni is bwa ka nyor piti jin c̱ithirac̱ithir mo mmo/o gwo mo ki:

6 Aha/ karkina maliḵ pem mo ap̱owa Sihyuun,

a’di jin ta wosh pem jin ḵogu mo.

7 Aha/ mina ṯor gwoŋḵan gi Tap̱a mo:

A’di ta gwo jin ona a’di aha/ mo ki: /E ta Ya/m pem mo,

shwane/ aha/ dho’thkina /e mo.

8 Doṯi aha/ ma, dhali aha/ mina c̱i /eya ris kal gi ’kwaniny’cesh mo mmota mal pini mo,

dhali ’pemen gi mony’cesh mo tani uni mini ta kum pini mo.

9 /E mini ’ce’d uni bwa mo ki cwan kol ’kus jin ta toŋḵuthu’d mo,

dhali mu/ uni ’twa/a ’cesh mo ka ’ci’cimi’th mo me’d toŋ’kul bwa jin uḵu ’pena je mo.

10 Dhali wakan shwane/, ayy imaliḵ, yuḵi is mo ma,

muri is mo, ayy um itap̱a gi mony’cesh mo.

11 Miiyi Tap̱a to ki moŋḵo/ is mo

dhali ki mondee is mo, 12 p̱iyi sho’k piti ’twa/ mo,

isi ciki/ ki a’di midi diki shwaa nyor mo, dhali um minu ’ce’d sho’k ibway mo,

haali/ anyor piti ’thakunu hila/ ki jahanne/ mo.

Mom’bor mii goma ris uni gun bu’thki mo jin huru jwa e a’di mo.