1 ’Tashi aha/ ’twa/ mo ma, ayy Arumgimis, haali/ e /e mo tani aha/ bu’thkina mo jin huru jwa mo.

2 Aha/ ki o Tap̱a gwo mo ki: /E ta Tap̱am pem mo.

Ki dar gi /e mo tani aha/ mina mol tom ’boro’d gam mo.

3 Me’d uni gun dhunu ki she/ ki dhelel dhelel e mony’cesh mo tani uni a’di ita kun bol tiya e ki ’bor mo,

dhali e uni mo tani a’di ’kunyka/ bwam pemi ’baar mo.

4 Uni gwansan kun kwanykina ruma tiya mo tani uni marki mondiṯ bwam buni is mo,

mon tom buni gun c̱ina uni mmo’ciṯẖa basa ’cesh mo tani aha/ mina diki c̱i mo

walla aha/ mina diki ḵal gway buni e ’twam pem mo.

5 Tap̱a a’di ta tom pem jin kwanyka/ mmobu’th mo dhala ḵubbaayam pem mo

dhali /e ko’dki mal pem is mo.

6 Jil uni dirkini bwambori aha/ mo e mo jin ’kunyka/ bwa mo,

nye, aha/ tana gi mala ’borga/ mo.

7 Aha/ ’bora Tap̱a mii mo a’di jin c̱iki aha/ gwo logom mo,

e mon’thiny si’da/ mo tani adum pem ye’thki aha/ sho’k ki gwo mo.

8 Aha/ karkina Tap̱a isa yempa/ ibwambori jis/em pem mo,

haali/ a’di di’d ki me’da bim poros pem mo ki aha/ minu ’koki joc̱ mo be.

9 Wakan adum pem a’di ’borkunu bwa mo dhala ḵashiram pem a’di ’kunykina bwa mo.

Buŋgwar is pem a’di c̱a’bki’d ki c̱a’b ’pempaŋ gana/ mo.

10 Haali/ /e diki c̱i aha/ eya Haawiya mo,

walla /e diki dhal a’din ’de/ jin ta’da gayiin pini bway mo mmop̱ar jisa ’kulga/ e mo.

11 /E ṯorki aha/ bway tur gi mondiki/e mo,

e buŋ’kus pini mo tani a’di isha mo jin ’tu’du ki moŋ’kuny bwa mo,

eya bim poros pini mo tani a’di ’kona mo jin ’boru bwa ki sule/ sule/ ya ye ’ba/ mo.