1 Ciḵi gwoŋ ḵar/e mo ma, ayy Tap̱a. Kari ’ce gom kom pem mo.

C̱iyi ’cem pini gom mon’thom pem ’pena le’d pem jin di’d ki ’kus ’pena he’k e mo.

2 ’Peni /e mo tani dhalki mom pem jin yenu p̱u’du’d mo.

Dhalki em pini a’di hili jim ’boro’d mo.

3 Waḵki/ /e mini pala dum pem mo, dhali waḵki/ /e mini yayu/ mmobuṯi aha/ mon’thiny mo,

dhali waḵki/ /e mini nyo/ aha/ mo tani /e mini diki gam tonthusa kamu/ e aha/ mo.

’Twam pem diki dhaŋ gwo mo.

4 Me’d mii gun miina ’kwani mo tani ki gwo gi ’twam pini mo tani

aha/ gaskina mo ’peni bway gi uni kun bujurkina bujur mo.

5 Ŋaṯgin pem ṯelki sho’k mo e bway tur pini mo,

sho’k pem diki yeres mo.

6 Aha/ yuḵkina /e mo haali/ /e mini thoḵ aha/ ’twa/ mo, ayy Arumgimis.

Kari /e ’cem pini gom aha/ mo, ciḵi /e gwom pem mo ma.

7 Ṯori monṯel sho’k gi mo/en pini ki jaro/ jaro/ mo,

ayy amanwoṯẖ gi uni gwansan kun simmki mo jin huru jwa e mo

’peni uni kun ta ’kup̱ gi uni ki me’da bim poros pini mo.

8 Kari aha/ me’da pinya/ e e mo.

Bagi aha/ eya la ma bim pini mo,

9 ’peni uni kun ta thus kun dilki aha/ to mo,

kun ta ’kup̱ pem kun shi/in ki shiŋ gana/ mo kun ’kamki aha/ mo.

10 Uni mu’thkina dum buni ’peni bwa jin hilu ki e ma ’thime/ mo.

Dhali ki ’twam buni mo tani uni oki gwo ki ’ba/ kun dhuna uni ki ca mo.

11 Uni thuḵki aha/ ki ’the’b ’the’b mo, dhali shwane/ uni ’kamki aha/ mo.

Uni dhuki em buni mo mmo’tuḵ aha/ ka ’cesh mo.

12 Uni wana e ka dhop̱ jin gananki ’ba/ mo mmodher to bwa ka gwap̱i/ mo,

me’d ari dhuru’c ma dhop̱ jin wup̱ki’da ’cesh mmobag mo.

13 Cuyi mis mo, ayy Tap̱a, jemi uni ’kup̱ mo, dhali p̱iyi uni e mo.

Dhali ’cuḵi mondiki/em pem ’peni uni kun ta thus ki thus ki gandal pini mo,

14 ’peni ’kwani ki me’d pini mo, ayy Tap̱a,

’peni ’kwani gwansan kun bu’th to jin ta moŋ’ko gi mony’cesh mo.

Dhalki bwam buni ’tu’du/ mo ki to kun dhukina /e gom uni mo.

Dhalki uc̱im buni uni tan gi to ki nyanye/ mo jin midi bol ji gi ca’d e mo.

Dhali dhalki uni ur ton tiya ’kup̱ gom usha ŋam buni mo.

15 Dhali gom aha/ mo tani aha/ mina hil bwam/em pini mo e mo ma ḵar/e mo.

Ki aha/ mina mer e mo tani aha/ minu kap̱ mo mmohila yir em pini mo be.