25
Gway ma Dawuu’d.
E /e mo tani ayy Tap̱a, aha/ ’de’kkina ḵashiram pem mo.
Ayy Arumgimis pem e /e mo tani aha/ gamkina gwo is mo.
Dhalku/ ki dhal aha/ ki aha/ minu kar ki mo ma ’the is mo.
Dhalku/ ki dhal ris uni kun ta ’kup̱ ki aha/ mmoyuḵ gway ki moŋ’kuny bwa ap̱o/ aha/ mo.
Nye, dhalki jan ṯal ’de/ jin c̱or /e ki kar ki mo ma ’the is mo ma.
Dhalki uni dhunu ki mo ma ’the is mo, uni gwansan gun ’dap̱a e ki mii ma ’bar ’bar mo.
Kari aha/ mmomish bway pini mo ma, ayy Tap̱a.
Ṯori /e aha/ bway tur pini mo.
Shuyi aha/ bway e gwoŋ ganam pini mo, dhali ṯori aha/ gwo mo,
haali/ /e tana Arumgimis gi bway gi mowoṯẖ pem mo,
haali/ aha/ c̱orkina /e ka tee ’baar mo isa yempa/ mo.
Kayi momiimiim pini e mo, ayy Tap̱a, dhali mo/en pini jin ṯelu sho’k mo,
haali/ uni ’kokin ’peni kadhamo/ mo.
Dhalku/ ki ka miinthus pem e kun miiga/ ki aha/ tana dhuru’c mo, walla ris gwon dhaŋ pem mo,
isi ki gwo ki mo/en pini jin ṯelu sho’k mo tani kayi aha/ e mo,
gom gway gi miim ’borgam pini mo, ayy Tap̱a.
 
Tap̱a a’di ’boro’d dhali ta jaŋ ḵar/e mo.
Dhali gom gwo gi wakan mo tani a’di ki ye’th imanmii miinthus sho’k e bway ’boro’d mo.
A’di ki shuwa shu/um bway gom uni gun dhu is ki gwa’d e a’di jin ’boro’d mo,
dhali ṯor imandhu is ki gwa’d bway piti mo.
10 Aris bway tur gi Tap̱a mo tani uni ṯelu sho’k e mo/en mo dhala ris mii ma isiŋ gana/ mo,
gom uni gwansan gun dhu gwom piti kun gamu me’d mo dhali gwonyc̱im piti gun c̱ina a’di mo.
11 Gom gway gi gway pini mo tani ayy Tap̱a,
dhalki miim pem jin dika/ i’ba/ ’pen mo ma, haali/ a’di caaca mo.
12 Ki wathi/ ja iḵo/ki Tap̱a mo?
A’di imina a’di ye’th sho’k mo i bway jin mina a’di ikwany mo.
13 A’di ki is piti midi c̱a’b e mo jin isha to ka enthus mo,
dhali uc̱im piti mini gam mal gi mony’cesh mo be.
14 Mo jin nyaḵu to mii ki Tap̱a mo tani a’di gom uni gwansan gun ḵo/ki a’di mo,
dhali a’di ṯorki’d eya tente/ e uni gwom piti jin gamu me’d mo.
15 Em pem isa yempa/ c̱u’thki ’kup̱ki Tap̱a mo,
haali/ a’di midi buḵ sho’k pem ’pena gume/ mo.
 
16 Ṯuki /e e aha/ mo dhali miiyi mii ma ’the e aha/ mo,
haali/ aha/ dina aha/ ’de/ dhali ṯocu bwa mo.
17 ’Cuḵi aha/ ’peni mo ma ṯo’c bwa ma dum pem mo ma,
dhali susi aha/ ka pije/ ’peni mo ma c̱is pem mo.
18 Hili isi gwo e gom monṯo’c bwam pem mo dhali gom mo ma du mur pem mo,
dhali gwami aha/ ’pena ris miinthus pemi ’baar mo.
19 Hili isi gwo e ma haali/ ’kup̱ pem ŋala/ wana risa!
Dhali ki mombujur jin shinuwa shi/i e mo tani uni shi/ki aha/ i e mo be.
20 Ayy jiyi mondiki/em pem mo dhali ’cuḵi aha/ mo.
Dhalku/ ki dhal aha/ bway ki aha/ minu kar ki mo ma ’the is mo, haali/ aha/ budha mo jin hurga/ jwa e /e mo.
21 Dhalki mii jin miinu ki dar gi ŋadhum dhali miiŋḵar/e uni ’tash aha/ ’twa/ mo,
haali/ aha/ c̱orkina c̱or gom /e mo.
22 Wani ’Kwani ma Israyiil ’ba/ mo ma, ayy Arumgimis,
’pena ris monṯo’c bwam buni mo.