59
Eya manyuḵ gway mo, isi ki gwo jin minu ’koki ’ce’d sho’k mo. Gway jin karu ki kup̱ jin ta jima Dawuu’d mo me’d jin hashkin ma Shawuul ’kwani mo mmotim gu’b piti mmo’taki ’kosh a’di jwa mo be.
1 ’Cuḵi aha/ mo ma ’peni ’kwaniŋ ’kup̱ pem mo, ayy Arumgimis pem,
ceshi aha/ ’peni uni gwansan kun cuuna p̱o/ aha/ mo.
2 ’Cuḵi aha/ mo ’peni uni gwansan kun mii tonthus mo,
dhali tayi aha/ is ki me’d mo ’peni ’kwani gwansan kun ’kosha ṯe/ mmowol ’kwaniya bas mo.
3 Haali/, hili mo mo ma, uni ishkin mmoc̱or mondiki/em pem mo,
’kwani kun ’cithira/ ’cithir mo tani uni ’tuntulki is buni imonṯal ’de/ ap̱o/ aha/ mo.
Gom gwon dhaŋ pem walla miinthus pem yisa, ayy Tap̱a,
4 walla gom miim pem jin thamka/ yisa, uni urkina uri sho’k mo dhali thoson is mo.
Muri is pini mo, dhali p̱u’du/ mo dhali woṯẖ aha/ mo, dhali p̱ari mii yan e mo.
5 /E, jin ta Tap̱a Arumgimis gi momis mo tani, /e tana Arumgimis ma Israyiil mo be.
Meri is mo dhali c̱iya ris kal gi ’kwaniny’cesh to kun wana e ki miim buni mo.
Dhalku/ ki dhal jan ṯal ’deŋ kamu/ bway mo ’peni uni gwansan kun ’dap̱a e ki mii ma wu’th gi tonthus mo.
Doshi ma dhali ’cunycuri yan mo.
6 Mom’pimpili/ isa yempa/ mo tani uni p̱u’dkin ka nyaŋ’ko’d mo
mmobuḵ me’da ’ka ka ris mo dhali ’thil is buni e ’peŋkuman bampa/ mo.
7 Uni anann be, gwona bomboḵ ki ’twam buni mo,
dhali ḵaa ’twa/ i is ki ’twam buni mo –
haali/ kaja ikuluma uni gwo ibwa mo mmo/o gwo mo ki: Kaja imidi ciḵ ana mo?
8 Hili /e, ayy Tap̱a, /e p̱e’thki uni mo,
dhali /e dhukina ris kal gi ’kwaniny’cesh mmota uni gun waḵu mo.
9 Ayy Mom’bi’th pem mo tani aha/ mina yuḵ gway mo mmomaŋ /e mo,
haali/ /e, ayy Arumgimis, tana cur pem jin ṯenu gwo mo.
10 Arumgimis pem jin di’d e mo/en piti jin ṯelu sho’k mo tani a’di midi gam aha/ ’kup̱ mo.
Dhali Arumgimis pem a’di midi dhal aha/ bway mo mmop̱ar mo jin p̱inu mii e mo ap̱o/ uni gun ta ’kup̱ ki aha/ mo.
11 Dhalku/ uni ki ’kosh jwa mo, isi ciki/ tagi ’kwanim pem mini this uni e mo.
Dhuyi uni mmomol dosh shoka ’cesh mo ki mom’bi’th pini mo, dhali ’doku/ uni ka luŋgu’b mo,
ayy Tap̱a, jin ta jim bam jin ta’da goŋgoro/ mo.
12 Haali/ gom miinthus kun miikina uni ki ’twam buni mo, dhali ki gwo ma le’d buni mo,
dhalki uni bu’th ma kume/ gi ’bam buni kun dhuna uni ki ca mo.
Gom gwo ma jee dhali gwo ma ṯor kun baha uni mo tani
13 shwayi uni ki ’ci’d’da/ ka nyor pini mo,
shwayi uni ki ’ci’d’da/ ntagi uni mini ’koki ’ko doḵ/e mo, ki ’kwani mini mish ki /e tana Arumgimis jin ji ’kwani ma Yakuub mo
ntagi ’pemen gi mony’cesh mo be.
Doshi ma dhali ’cunycuri yan mo.
14 Mom’pimpili/ isa yempa/ mo tani uni p̱u’dkin ka nyaŋ’ko’d mo
mmobuḵ me’da ’ka ka ris mo
dhali ’thil is buni e ’peŋkuman bampa/ mo.
15 Uni tani mo ki tantan gom tonṯe/ mo,
dhali cesh mo ki ŋarŋash mo waḵki/ uni ’koki kap̱a dum buni mo.
16 Hili aha/ mina yuḵ gway gom mo ma dem dem pini mo.
Dhali aha/ mina yuḵ gway ki ’kal ’kal gom mo/en pini jin ṯelu sho’k mo e mon’thamo/ mo.
Haali/ /e takina cur jin ṯenu gwo gom aha/ mo
dhali /e ta jim pem jin hurga/ jwa icine/ mo ka teem pem jin dika/ ka c̱is mo.
17 Ayy Mom’bi’th pem mo tani aha/ mina yuḵ gway mo mmomaŋ /e mo,
haali/ /e, ayy Arumgimis, tana cur pem jin ṯenu gwo mo,
/e jin tana Arumgimis jin ṯorki aha/ mo/en pini jin ṯelu sho’k mo.