60
Eya manyuḵ gway mo, isi ki koŋ gway jin yuḵu gom jandin to mo. Gway ma Dawuu’d jin yedhu sho’k mo dhali gwo ma ye’th sho’k jin yedhu me’d jin ḵalkina a’diya shir shir uni ka Araam Nahreen mo dhala Araam Suba mo dhali me’d jin p̱u’d ma Yuwab e kul piti jin doḵkina a’di me’d jin ’koshkina a’di ’Kwani gi Pa Aduum kun ’koni alaap̱i ’kume’d i’ce’dka su/ mo e embul Wosh ma ’Doŋkoro/ mo.
1 Ayy Arumgimis, /e waḵki aman mo, dhali ’ce’d mom bam jin ’ce’du/ gwo she/ mo.
/E miikina nyor mo. Ayy, waru/ aman is mo ma.
2 /E karki mony’cesh mmoyiḵin is mo. Dhali /e ki ’twaḵ a’di bwa mmotheḵ she/ mo.
Nyaŋi a’di ka nyaŋ’ko’d mo e mom piti jin shi/ki’d mo, haali/ a’di mol dosh shoka ’cesh mo.
3 /E ki dhal ’kwanim pini mmo’kosh is ka nyor ki to kun ’batha’ba’th mo,
/e ki dhu am me’d ’kwani kun sona du mo gom to kun diṯadiṯ kun ’kosh am mo.
4 /E ki kar mom pini jin ta’da berag gom uni gwansan kun ḵo/ki /e mo,
mmocuna uni ki bimbir ’peni a’di jin ta jiŋ gana/ mo.
Doshi ma dhali ’cunycuri yan mo.
5 Wakan ki unim pini gun ena /e mo minu ’cuḵ mo,
c̱iyi mo jin p̱inu mii e ki me’da bim poros pini mo dhali thoḵ am gwo mo.
6 Arumgimis oki gwo e mom piti jin ḵogu mo.
Nyaḵki gway jin yuḵu ki moŋ’kuny bwa mo tani aha/ mina ḵwa/ Pan Shakiim bwa mo
dhali dhu uni ka bwanykin ’peni embul ma Sukkuut mo.
7 Dhala Jil/aad, a’di ta jim pem mo. Dhala Manassa a’di ta jim pem mo.
Dhala Ep̱rayim a’di ta toŋ’kup̱ pem mo.
Dhala Yahuuda/ a’di ta cwa ma maliḵ pem mo.
8 Muwab a’di ta mom pem jin ’thurka/ me’d mo.
Dhali ap̱o/ Pan Aduum mo tani aha/ yip̱a p̱p̱am pema p̱o/ mo.
Dhali ap̱o/ Pam P̱alasthiin mo aha/ mina ’ther cuuwa/ gom mo jin p̱inu mii e mo be.
9 Kaja a’di imidi sus aha/ e ’peŋkuman bampa/ jin ṯenu gwo mo?
Dhali kaja a’di imidi shu aha/ bway mo e Pan Aduum mo?
10 /E a’di idiki waḵ amana, ayy Arumgimis?
/E diki ḵal ya ka bor mo, ayy Arumgimis, nyaḵki ’kwani ma meem bam mo.
11 Ayy ṯuka bor ma, woṯẖ am mo ’pena p̱o/ ’kwani kun ta ’kup̱ ki am mo,
haali/ mowoṯẖ jin ta gi wathi/ mo tani a’di ta jim p̱e’th mo be.
12 Nyaḵka Arumgimis mo tani ana p̱ina mii e mo
haali/ a’di ta a’di jin siri’cki uni gun ta ’kup̱ bana ki sho’k mo.