102
A’tho ’peni jan ’de/ jin jwakaṯkunuwa du mo, ki a’di ’thikina buye/ mo dhali wola gumgum piti ibwambori Tap̱a mo.
1 Ciḵi mon’thom pem mo ma, ayy Tap̱a.
Dhalki kom pem p̱u’dki’di /e mo.
2 Dhalku/ ki bag jis/em pini ’peni aha/ mo
ka teem pem jin ta’da c̱is ki c̱is mo.
Ḵa’di ’cem pini ki aha/ mo.
Thoḵi aha/ ’twa/ ishunsan gana/ ka tee jin yuḵkika/ /e mo.
3 Haala teem pem a’di peki’d mo me’da ku’d jin ’ciṯẖki ’pen mo
dhala simam pem burkin mmowa e ki mo ma gwaṯa/ jin ’thanu o’d jin ’batha’ba’th mo.
4 Adum pem dorkunu mmowa e ka sho mo dhali ḵu’thki’d mo.
Aha/ ŋakina tonṯem pem mmoshwa mo.
5 Haali/ gom dhan mo/ohon pem caaca mo tani
asimam pem thalkina buŋgwar is pem mo.
6 Aha/ wakina e ki koro/ gi mombwaasho mo,
aha/ wana e ka kunu/ jin diki’d e bwam ma’du/ mo.
7 Aha/ isha ki e i’kup̱ ki walwal mo,
aha/ wana e ki ’dii jin di a’din ’deŋ gana/ ap̱o/ ’kuŋgu’b mo.
8 Ka tee ’baar mo ’kwani kun ta ’kup̱ ki aha/ ṯẖunyki aha/ ’twa/ i is
ki uni gwansan kun p̱e’th aha/ ki p̱etha sor mmokar gway pem ki mo jin jeenuwa jee mo.
9 Aha/ shwakina jasi ’piny me’d tonṯe/ mo,
dhali ce jabu’th pem e ki to jin p̱ika/ mo
10 goma nyor jin deḵkina /e mo dhala nyor pini mo.
Haali/ /e ḵalki aha/ imis mo dhali biṯ aha/ asho mo.
11 Ateem pem wana e ka ḵashira/ ma tente/ gi mom’pimpili/ mo.
Aha/ ḵu’thkina me’da sho mo.
12 Hili /e, ayy Tap̱a, dikin e ḵursi ma maliḵ ki sule/ sule/ mo.
Gway pini a’di ’dim ’kup̱ eya risa nyaḵum yil gi ’kwaniny’cesh mo.
13 /E mini cu mis mo dhali tayi gi mo/en ma ’thime/ ap̱owa Sihyuun mo.
A’di ta’da tente/ jin minu mii mii ka ’the goma yim mo.
Atente/ jin karu ’pen ka pije/ a’di p̱u’dki’d mo.
14 Haali/ c̱iŋkinam pini uni bu’thki wosh ma yim ji gi ŋa/u mo,
dhali hila hil ki mo/en ap̱o/ bu’da’cesh ma yim mo.
15 Kal gi ’kwaniny’cesh uni mini ḵo/ gway gi Tap̱a mo,
dhali aris imaliḵ gi mony’cesh mo uni mini ḵo/ monycam pini mo.
16 Haali/ Tap̱a midi nyaŋa Sihyuun ki mis ka nyaŋ’ko’d mo,
a’di midi piyu/ ki monycam piti mo.
17 A’di midi c̱iya hirdhe/ ki mon’tho gi uni kun dhalkunu ’pen mo,
dhali a’di midi diki waḵ uni gom tom buni kun ’thona uni ka di’b is mo.
18 Dhalki gwo yansan a’di ’kwarkunu isa ’cesh goma nyaḵum yil gi ’kwani kun mini iiyu/ i’ko’d mo,
wakan ki ’kwani kun ’konuki dho’th naskina/ mo uni a’di imini maŋ Tap̱a mo,
19 haali/ a’di hilki mo ka luŋgu’b ’peni mom piti jin ḵogu mo jin ḵa’dama/ ḵa’dam mo,
’peni momis mo tani Tap̱a hilki mo ap̱owa ’cesh mo
20 mmociḵ ohon gi uni kun tana habuus mo,
mmo’cuḵ uni gwansan kun ’birki ’kup̱ ki jwa mo,
21 ki ’kwani mini bah gwo eya tente/ eya Sihyuun mo a’di jin ta gway gi Tap̱a mo,
dhali e Pa Urushaliim mo tani uni mini bah gwo maŋ piti mo,
22 ki ’kwani mini tul isi monṯal ’de/ mo
dhali aris ’peŋkuman bampa/ mo mmoluŋ Tap̱a mo.
23 A’di ’ce’dki mom’bi’th pem bwa mo e bwaman yam pem mo.
A’di karki’da teem pem mmokuṯa/ kuṯ mo.
24 Ayy Arumgimis pem, aha/ ona gwo mo ki: Dhalku/ ki bu’th aha/ ’peni mahan mo
e bwaman ma teem pem mo,
/e jin ’dimkina yil ’kup̱ mo
eya risa nyaḵum yil gi ’kwaniny’ceshi ’baar mo.
25 ’Peni kadhamo/ mo tani /e ’thiki moŋḵa’b gi mony’cesh mo,
dhali momis a’di ta mii ki me’d pini mo.
26 Uni mini ’ce’d sho’k mo tani hili /e a’di imini ’dim ’kup̱ mo,
uni ’baar mo mini wuwa dhagale/ mo me’d burrinye/ jin hidhu i is mo.
/E aḵ uni e me’d burrinye/ jin hidhu i is mo dhali uni pekin mo,
27 hili /e ta a’di ma ’de/ mo, dhali yil pini mol di ’kup̱ mo.
28 Uc̱i gi c̱iŋkinam pini uni mini ’ko ki ’dantar mo.
Nyemes gi uc̱im buni ki uni mini dho’th i’ko’d mo tani uni iminu ṯel shoki bwambori /e mo be.