1 ’Bori Tap̱a mii mo, ayy ḵashiram pem,

dhali aris to gwan ’baar mo kun ’kon e aha/ mo, ’bori gway piti mii jin ḵogu mo.

2 ’Bori Tap̱a mii mo, ayy ḵashiram pem mo,

dhali dhalku/ ki ŋa a’dim piti jin ’dap̱a ’dap̱ mo,

3 a’di jin gwamki /e ’pena ris miim pini kun ’coḵa’coḵ mo,

a’di jin wac̱ki /e ’pena ris ’ba’th pini mo,

4 a’di jin wanki /e ’ba/ ’peni jisa ’kulga/ mo,

a’di jin shumki /e ki toŋ’kup̱ ki mo/en jin ṯelu sho’k mo dhali ki momiimii mo,

5 a’di jin kap̱ki /eya du mo ki tom ’boron me’d jin dikina /e ki e mo,

wakan dhuru’c pini jin tana /e midi ’ka gura/ me’da biny jeshe/ ma wulu/ mo.

6 Tap̱a a’di miiki mii jin yenuwa ye mo

dhali mo ma ḵar/e goma ris uni gwansan kun siri’ckunu ap̱o/ ki sho’k mo.

7 Bway piti ṯora a’di eya tente/ ka Musa mo,

dhali miim piti jin ḵala a’di e ’Kwani ma Israyiil mo.

8 Tap̱a a’di ta’da manmiimii mo dhali mii jin miinu ka ’the mo,

anyor piti maŋgala she/ mo dhali mo/en jin ṯelu sho’k ishki’d ka enthus mo.

9 A’di isa yempa/ diki ḵucura ḵucur mo,

walla a’di diki kara nyor piti ki sule/ sule/ mo.

10 A’di diki ṯu/ul ana isi ki gwo gi miinthus bana mo,

walla ri’c ana isi ki gwo gom tony ’coḵgam bana kun miina ana mo.

11 Haali/ me’d momis jin ḵa’dama/ ḵa’dam ap̱o/ mony’cesh mo tani

wakan dhan mo/en piti jin ṯelu sho’k caaca mo ’kup̱ki uni gwansan kun ḵo/ki a’di mo be.

12 Me’d jin si’da mom’pesho’k ki si’d ’pena bora luŋgu’b mo tani

isa dhana/ kan si’da/ a’di ki joc̱ gwondhaŋ bana ’peni ana mo.

13 Me’da baba jin hilki ya/ ki mo/en mo tani

wakan si’da/ Tap̱a ki hil uni gwansan kun ḵo/ki a’di ki mo/en mo.

14 Haali/ a’di mishki’da yi’c bana mo,

dhali a’di kaki gwo e ki ana tana bu’da’cesh mo.

15 Wathi/, ateem piti a’di wana e ka sho mo.

A’di lugki’d ki ṯup̱ ṯup̱ mo me’d jandin to e bwam bunto mo,

16 haali/ ’tham poshki’d ap̱o/ a’di mo dhali a’di ki ’cwar a’di mo,

dhali mom piti mishi a’di doḵ/e yisa.

17 Hili mo/en gi Tap̱a a’di ṯelkunu sho’k mo ’peni mo jin ’konuki/e ki sule/ ya ye ’ba/ mo itan mo jin ’konuki/e ki sule/ ya ye ’ba/ mo

ap̱o/ uni gwansan kun ḵo/ki a’di mo,

dhali mo ma ḵar/em piti e uc̱i gi uc̱im buni mo,

18 e uni gwansan kun dhuki gwom piti jin gamu me’d mo,

dhali ka uni e mo mmomii gwoŋḵan piti kun ’kwarkunu mo.

19 Tap̱a a’di ṯelki’da ḵursi ma maliḵ piti sho’k e momis mo,

dhali ’peŋkuman bampam piti jiki’da ji ap̱owa ris to ’baar mo.

20 ’Bori Tap̱a mii mo, ayy um iman’doyu gwom piti mo,

um kun c̱a’bki dem dem mo kun mii gwom piti mo,

mmociḵ ’twa/ gi gwom piti mo.

21 ’Bori Tap̱a mii mo, aris umi ’baar mo kun ta kum piti kun ’kon e momis mo,

imanmii tom piti mo kun mii bwam piti mo.

22 ’Bori Tap̱a mii mo, aris to kun miina a’di mo,

eya ris mo ’baar mo kun ta mom piti kun tana a’di tap̱a mo. ’Bori Tap̱a mii mo, ayy ḵashiram pem mo.