147
1 Maŋi Tap̱a mo.
Haali/ a’di ’boro’d mmoyuḵ gway mmomaŋa Arumgimis bana mo,
haali/ a’di ta’da ’the mo dhali gway jin minu maŋ a’di mo a’di ha me’d mo.
2 Tap̱a nyaŋi Pa Urushaliim mo.
A’di ki tul uc̱i ma Israyiil is kun ṯa’kkunuwa sho mo.
3 A’di ki wac̱ uni gun ’ce’dkunuwa du mo
dhali is jamam buni kun ’koshkunu uni mo.
4 A’di ki kar gwo mmota ŋulla/ mo gom gwo mmodeŋa cul e mo.
A’di ki c̱iya cul gway buni ki she/ ki she/ mo.
5 Tap̱am bana a’di icaaca mo dhali mom’bi’th piti ishi’d ka enthus mo.
Mo jin mishu gwo ’ban jin ta jim piti mo tani a’di idiki’d ibwamp̱o/ mo jin molu bar a’di mo.
6 Tap̱a a’di ki ’de’k uni gun yap̱kunu ki sho’k mo.
A’di ki tor uni ’ko’da ’cesh uni gun ta thus ki thus mo.
7 Yuḵi gway e Tap̱a mo jin ’boruwa ’bor bwa i is mo.
Lugumi gway eya Arumgimis bana ka dheŋdhenye/ jin ’kon ma shu/i pesu/ mo.
8 A’di ki kum momis ka raḵ mo,
dhali a’di ki thosona sho’k mmohetha p̱o/ mony’cesh mo,
dhali a’di ki raḵa sho mmoca mo ap̱owa ris wosh mo.
9 A’di ki c̱i to/e tonṯem buni mmoshwa mo
dhali ki usha waraŋgwaḵ kun gwokin mo.
10 Bwaŋ ’kunyu’d piti yisa di’d e shumarum kun ’bitha’bi’th mo,
walla bwaŋ ’kunyu’d piti yisa di’d e ’basho’k gi wathi/ mo.
11 Hili Tap̱a a’di ki bu’th mo jin ’boru bwa mo e uni gwansan kun ḵo/ki a’di mo,
dhali e uni gwansan kun tan ga ’teŋ kap̱e/ e mo/en piti jin ṯelu sho’k mo.
12 Maŋi Tap̱a mo, ayy Urushaliim.
Maŋi Arumgimis pini mo, ayy Sihyuun.
13 Haali/ a’di ’bi’thki’da bem’ban gi toŋḵuthu’d jin miinu ’twaŋkala goŋ pini mo.
A’di ’borki iya/m bum mii e bwaman um mo.
14 A’di karki moŋḵu’th is e bwaŋgwayum bum mo.
A’di ’tu’dki um bwa ka dip̱any pos bunyan jin thebera/ e ki theber mo.
15 A’di hashki gwo jin ḵana a’diya ḵan e mony’cesh mo.
Gwom piti guski’d ki shaw shaw mo.
16 A’di ki c̱iya wasa/ mmo/isha ’cesh me’da mur ḵa’bala bany bany mo.
A’di ki ḵwa/a wasanyjap̱e/ bwa me’d ’piny mo.
17 A’di ki ṯaka wasam piti ka ’cesh me’d ushi ḵuluny to mo.
Kaja a’di imidi doshi bwambor mon’thup̱ piti jin ’thup̱a a’di mo?
18 A’di hashki gwom piti mo dhali wa uni mo.
A’di ki kar ’tham piti mo mmoposh mo dhali yi’de/ yakina ŋwac̱a/ mo.
19 A’di ki bah gwom piti eya Yakuub mo
a’di jin ta gwoŋḵan piti kun bahu mo dhali gwoŋḵan kun onu eya Israyiil mo.
20 Kal gi ’kwanin tiya dina a’di ki ṯu/ul ki mii gi wakan mo.
Uni ’koki mish gwoŋḵan piti kun onu mo.
Maŋi Tap̱a mo.