147
147-كۈي •••• ھەممىگە قادىر خۇداغا ھەمدۇسانالار ئېيتىلسۇن!
1 ھەمدۇسانا! ياھنى مەدھىيىلەڭلار!
بەرھەق، بۇنداق قىلىش شېرىندۇر؛
خۇدايىمىزنى كۈيلەڭلار!
مەدھىيە ئوقۇش ئىنسانغا يارىشىدۇ.■زەب. 33:1؛ 92:2؛ 135:3
2 پەرۋەردىگار يېرۇسالېمنى بىنا قىلماقتا؛
ئىسرائىلنىڭ سۈرگۈن قىلىنغانلىرىنى ئۇ يىغىپ كېلىدۇ؛□«پەرۋەردىگار يېرۇسالېمنى بىنا قىلماقتا؛ ئىسرائىلنىڭ سۈرگۈن قىلىنغانلىرىنى ئۇ يىغىپ كېلىدۇ» ــ بۇ ئايەتكە قارىغاندا، مۇشۇ كۈي ئىسرائىل بابىلغا سۈرگۈن بولغانلىقىدىن قايتىپ كەلگەندىن كېيىن يېزىلغان.
3 ئۇ كۆڭلى سۇنۇقلارنى داۋالايدۇ؛
ئۇلارنىڭ يارىلىرىنى تاڭىدۇ.■مىس. 15:26؛ ئايۇپ 5:18
4 ئۇ يۇلتۇزلارنىڭ سانىنى سانايدۇ؛
ئۇلارنىڭ ھەممىسىگە بىر-بىرلەپ ئىسىم قويىدۇ.□«ئۇ... ئۇلارنىڭ ھەممىسىگە بىر-بىرلەپ ئىسىم قويىدۇ» ــ باشقا بىرخىل تەرجىمىسى: «ئۇ... ئۇلارنى (يۇلتۇزلارنى) ئىسمىلىرىنى چاقىرىپ ئوپۇققا چىقىرىدۇ». ■يەش. 40:26
5 ئۇلۇغدۇر رەببىمىز، زور قۇدرەتلىكتۇر؛
ئۇنىڭ چۈشىنىشى چەكسىزدۇر.
6 پەرۋەردىگار ياۋاش مۆمىنلەرنى يۆلەپ كۆتۈرىدۇ؛
رەزىللەرنى يەرگىچە تۆۋەن قىلىدۇ.
7 پەرۋەردىگارغا تەشەككۈرلەر بىلەن ناخشا ئېيتىڭلار؛
كۈيلەرنى چىلتارغا تەڭشەپ ئېيتىڭلار!
8 ئۇ ئاسماننى بۇلۇتلار بىلەن قاپلىتىدۇ،
زېمىنغا يامغۇرنى بېكىتىدۇ،
تاغلاردا ئوت-چۆپلەرنى ئۆستۈرىدۇ؛■ئايۇپ 38:26، 27؛ زەب. 104:13-14؛ ھوش. 2:23، 24
9 ماللارغا ئوزۇق،
تاغ قاغىسىنىڭ چۈجىلىرى زارلىغاندا، ئۇلارغا ئوزۇق بېرىدۇ؛
10 ئات كۈچىدىن ئۇ زوق ئالمايدۇ؛
ئادەمنىڭ چەبدەس پۇتلىرىنى خۇرسەنلىك دەپ بىلمەيدۇ؛
11 پەرۋەردىگار بەلكى ئۆزىدىن ئەيمىنىدىغانلارنى،
ئۆزىنىڭ ئۆزگەرمەس مۇھەببىتىگە ئۈمىد باغلىغانلارنى خۇرسەنلىك دەپ بىلىدۇ.
12 پەرۋەردىگارنى ماختاڭلار، ئى يېرۇسالېم؛
خۇدايىڭنى مەدھىيىلە، ئى زىئون.
13 چۈنكى ئۇ دەرۋازىلىرىڭنىڭ تاقاقلىرىنى مەھكەم قىلىدۇ؛
سېنىڭدە تۇرۇۋاتقان پەرزەنتلىرىڭگە بەخت-بەرىكەت بەردى.
14 ئۇ چەت-چېگرالىرىڭدا ئارام-تىنچلىق يۈرگۈزىدۇ،
سېنى بۇغداينىڭ ئېسىلى بىلەن قانائەتلەندۈرىدۇ.
15 ئۇ ئۆز ئەمر-بېشارەتلىرىنى يەر يۈزىگە ئەۋەتىدۇ؛
ئۇنىڭ سۆز-كالامى ئىنتايىن تېز يۈگۈرىدۇ.■زەب. 33:9
16 ئۇ ئاق قارنى يۇڭدەك بېرىدۇ،
قىراۋنى كۈللەردەك تارقىتىدۇ.
17 ئۇنىڭ مۇزىنى نان ئۇۋاقلىرىدەك قىلىپ پارچىلىۋېتىدۇ؛
ئۇنىڭ سوغۇقى ئالدىدا كىم تۇرالىسۇن؟
18 ئۇ سۆزىنى ئەۋەتىپ، ئۇلارنى ئېرىتىدۇ؛
ئۇنىڭ شامىلىنى چىقىرىپ، سۇلارنى ئاققۇزىدۇ.
19 ئۇ ئۆز سۆز-كالامىنى ياقۇپقا،
بەلگىلىمىلىرىنى ھەم ھۆكۈملىرىنى ئىسرائىلغا ئايان قىلىدۇ؛
20 ئۇ باشقا ھېچبىر ئەلگە مۇنداق مۇئامىلە قىلمىغاندۇر؛
ئۇنىڭ ھۆكۈملىرىنى بولسا، ئۇلار بىلىپ باققان ئەمەس.
ھەمدۇسانا!■روس. 14:16
■147:1 زەب. 33:1؛ 92:2؛ 135:3
□147:2 «پەرۋەردىگار يېرۇسالېمنى بىنا قىلماقتا؛ ئىسرائىلنىڭ سۈرگۈن قىلىنغانلىرىنى ئۇ يىغىپ كېلىدۇ» ــ بۇ ئايەتكە قارىغاندا، مۇشۇ كۈي ئىسرائىل بابىلغا سۈرگۈن بولغانلىقىدىن قايتىپ كەلگەندىن كېيىن يېزىلغان.
■147:3 مىس. 15:26؛ ئايۇپ 5:18
□147:4 «ئۇ... ئۇلارنىڭ ھەممىسىگە بىر-بىرلەپ ئىسىم قويىدۇ» ــ باشقا بىرخىل تەرجىمىسى: «ئۇ... ئۇلارنى (يۇلتۇزلارنى) ئىسمىلىرىنى چاقىرىپ ئوپۇققا چىقىرىدۇ».
■147:4 يەش. 40:26
■147:8 ئايۇپ 38:26، 27؛ زەب. 104:13-14؛ ھوش. 2:23، 24
■147:15 زەب. 33:9
■147:20 روس. 14:16