143
143-küy •••• Rohim tügishey dep qaldi!
1 Dawut yazghan küy: —
Perwerdigar, duayimni anglighaysen;
Yélinishlirimgha qulaq salghaysen;
Heqiqet-sadaqitingde hem heqqaniyitingde manga jawab bergeysen.
2 Öz qulungni soraqqa tartishqa turmighaysen;
Chünki neziringde tiriklerning héchbiri heqqaniy ispatlanmaydu.■Rim. 3, 4; Gal. 3, 4
3 Chünki düshmen jénimgha ziyankeshlik qilmaqta,
U hayatimni depsende qildi;
Méni xuddi ölgili uzun bolghanlardek,
Qarangghu jaylarda turushqa mejbur qilidu.
4 Shunga rohim ichimde tügishey dep qaldi;
Ichimde qelbim sundi.
5 Men qedimki künlerni esleymen;
Séning barliq qilghanliring üstide séghinip oylinimen;
Qolliring ishligenlirini xiyalimdin ötküzimen.■Zeb. 77:5-12
6 Qollirimni Sanga qarap sozup intilimen;
Jénim changqighan zémindek Sanga teshnadur.
Sélah.
7 Manga tézdin jawab bergeysen, i Perwerdigar;
Rohim halidin kétidu;
Didaringni mendin yoshurmighaysen;
Bolmisa men hanggha chüshidighanlardek bolimen.
8 Méhir-muhebbitingni tang seherde anglatqaysen;
Chünki tayan’ghinim Sen;
Méngishim kérek bolghan yolni manga bildürgeysen;
Chünki jénim Sanga telmürüp qaraydu;■Zeb. 25:1
9 Méni qutuldurghaysen, i Perwerdigar, düshmenlirimdin;
Bashpanah izdep Séning yéninggha qachimen.
10 Öz iradengge emel qilishimqa méni ögetkeysen;
Chünki Sen méning Xudayimdursen;
Séning méhriban Rohing méni tüptüz zéminda yétekligey;□«...méni tüptüz zéminda yétekligey» — yaki «..méni tüz köngüllerning zéminida yétekligey», «...méni diyanetlik zéminda yétekligey».
11 Öz nam-shöhriting üchün méni janlandurghaysen, i Perwerdigar;
Öz heqqaniyitingde jénimni awarichiliktin azad qilghaysen.
12 Hem méhir-shepqitingde düshmenlirimni üzüp tashliwetkeysen;
Jénimni xar qilghanlarning hemmisini halak qilghaysen;
Chünki men Séning qulungdurmen.■Zeb. 86:14-16; 116:16