Muⱪeddes Kalam (yǝngi yeziⱪ) Yo'el 1

Yo'el

Qekǝtkǝ apiti Pǝrwǝrdigarning künigǝ bexarǝt beridu

1 Pǝrwǝrdigarning Petuelning oƣli Yoelƣa kǝlgǝn sɵzi: —

2 — I ⱪerilar, anglanglar;

Zeminda barliⱪ turuwatⱪan ⱨǝmmǝylǝn, ⱪulaⱪ selinglar;

Ɵz künliringlarda yaki ata-bowiliringlarning künliridimu xundaⱪ bir ix bolup baⱪⱪanmu?

3 Baliliringlarƣa xuni eytip beringlar,

Baliliringlar ɵz baliliriƣa eytsun,

Ularmu kelǝr dǝwrgǝ eytsun: —

4 «Qixligüqi ⱪurt» ⱪaldurƣanni qekǝtkǝ yǝp boldi,

Qekǝtkǝ ⱪaldurƣanni qekǝtkǝ liqinkiliri yǝp boldi,

Qekǝtkǝ liqinkiliri ⱪaldurƣanni «wǝyranqi ⱪurt»lar yǝp boldi. ◼

5 Əy, ⱨaraⱪkǝxlǝr, oyƣinip ⱪattiⱪ yiƣlanglar,

Ⱨuwlixinglar, i xarab iqküqilǝr,

Yengi xarab tüpǝylidin —

Qünki u aƣzingdin elip taxlandi.

6 Qünki bir hǝlⱪ, küqlük, sansizliƣan hǝlⱪ,

Zeminim üstigǝ besip kǝldi;

Uning qixliri bolsa xirning qixliri,

Uningda xirning ⱨinggang qixliri bardur;

7 U Mening üzüm tallirimni wǝyranǝ ⱪiliwǝtti,

Ənjür dǝrihimning ⱪowzaⱪlirini siyriwǝtti,

Ularni yalingaqlap, taxliwǝtti;

Ularning xahliri aⱪliwetildi.

8 Yaxliⱪidiki eri üqün matǝm tutup bɵz kiyimlǝrgǝ oranƣan nǝwjuwandǝk ⱪattiⱪ piƣan qekinglar;

9 Pǝrwǝrdigarning ɵyi axliⱪ ⱨǝdiyǝsidin ⱨǝm xarab ⱨǝdiyǝliridin mǝⱨrum ⱪilindi;

Kaⱨinlar, yǝni Pǝrwǝrdigarning hizmǝtqiliri matǝm tutidu. ◼

10 Etizlar qɵldǝrǝp kǝtti,

Zemin matǝm tutidu;

Qünki ziraǝtlǝr ƣazan boldi,

Yengi xarab ⱪurup kǝtti,

Zǝytun meyi ⱪaƣjiridi.

11 Ⱨǝy deⱨⱪanlar, uyulunglar;

Buƣdaylar ⱨǝm arpilar üqün yalwurunglar, i üzümqilǝr,

Qünki etizlarning ⱨosulliri ⱪurup kǝtti.

12 Üzüm teli ⱪaƣjirap kǝtti,

Ənjür dǝrihi solixip ⱪaldi,

Anar dǝrihi, horma palmisi ⱨǝm alma dǝrihimu,

Daladiki barliⱪ dǝrǝhlǝr solixip kǝtti;

Bǝrⱨǝⱪ, xadliⱪmu adǝm balilirida solixip kǝtti.

13 Belinglarni baƣlanglar, pǝryad oⱪunglar, i kaⱨinlar;

Ⱨuwlanglar, i ⱪurbangaⱨning hizmǝtqiliri;

Keqiqǝ bɵz kiyimlǝrni kiyip düm yetinglar, i Hudaning hizmǝtqiliri;

Qünki Hudayinglarning ɵyidin axliⱪ ⱨǝdiyǝsi ⱨǝm xarab ⱨǝdiyǝsi üzülüp ⱪaldi. ◼

14 «Roza tutayli» dǝp Hudaƣa mǝhsus bir mǝzgilni ayringlar,

Jamaǝtkǝ mǝhsus yiƣilimiz, dǝp jakarlanglar;

Aⱪsaⱪallarni, zeminda turuwatⱪanlarning ⱨǝmmisini Pǝrwǝrdigar Hudayinglarning ɵyigǝ yiƣip,

Pǝrwǝrdigarƣa nalǝ kɵtürünglar! ◘

15 — Aⱨ, xu kün!

Qünki Pǝrwǝrdigarning küni yeⱪinlaxti,

U Ⱨǝmmigǝ Ⱪadir tǝripidin ⱨalakǝt bolup kelidu. ◼ ◘

16 Mana, ƣiza kɵz aldimizdin elip taxlandi ǝmǝsmu?

Xadliⱪ, huxalliⱪ Hudayimizning ɵyidin elip taxlandi ǝmǝsmu? ◼

17 Uruⱪlar topa-qalmilar astida qirip kǝtti,

Ambarlar harabilǝxti,

Boƣuzhanilar ƣulap qüxti;

Qünki ziraǝtlǝr ƣazang boldi.

18 Qarpaylar xundaⱪ ⱨɵrkirixip kǝtti!

Kala padiliri patiparaⱪ boldi,

Otlaⱪni tapalmiƣaq;

Ⱪoy padilirimu ɵzi «gunaⱨimiz bar» degǝndǝk mǝyüslǝndi; ◼

19 Aⱨ, Pǝrwǝrdigar, nida ⱪilimǝn Sanga;

Qünki ot yalⱪunliri janggaldiki ot-qɵplǝrni yǝwǝtti,

Yalⱪun daladiki barliⱪ dǝrǝhlǝrni kɵydürüwǝtti.

20 Daladiki ⱨaywanlarmu Sanga nida ⱪilidu,

Qünki eriⱪ-ɵstǝnglǝr ⱪurup kǝtti,

Ot-yalⱪun janggaldiki ot-qɵplǝrni yǝwǝtti.

Yo'el
<
1
>

◼1:4 ««Qixligüqi ⱪurt»lar... «wǝyranqi ⱪurt»lar — «qekǝtkǝ liqinkǝ» wǝ «wǝyranqi ⱪurt»lar bolsa bǝlkim qekǝtkining ɵsüx jǝryanidiki üq hil xǝkli, bolmisa üq hil baxⱪa ziyandax ⱨaxarǝtlǝr boluxi mumkin.

◼1:9 «axliⱪ ⱨǝdiyǝsidin ⱨǝm xarab ⱨǝdiyǝliri...» — «axliⱪ ⱨǝdiyǝliri» ⱨǝm «xarab ⱨǝdiyǝliri» adǝttǝ «kɵydürmǝ ⱪurbanliⱪ»lar ⱨǝm «tǝxǝkkür ⱪurbanliⱪ»lirining üstigǝ ⱪuyulatti. «kaⱨinlar, yǝni Pǝrwǝrdigarning hizmǝtqiliri» — «kaⱨin» muⱪǝddǝs ibadǝthanida puⱪralar üqün mǝhsus ⱪurbanliⱪni kɵydürgüqi kixi.

◼1:13 «Hudayinglarning ɵyi» — muⱪǝddǝs ibadǝthanini kɵrsitidu.

◘1:14 Yo. 2:12-15

◼1:15 «U (xu kün) Ⱨǝmmigǝ Ⱪadir tǝripidin ⱨalakǝt bolup kelidu» — muxu sɵz Yoelƣa zamandax Yǝⱨudiy hǝlⱪining kɵpinqisini qɵqitidiƣan alaⱨidǝ gǝp. Ular: ««Pǝrwǝrdigarning küni» biz Yǝⱨudiy hǝlⱪigǝ nijatni elip kelidu, ⱨǝrbir baxⱪa millǝtkǝ ⱨalakǝtni elip kelidu» dǝp oylaytti. Yoel pǝyƣǝmbǝr xu künining ⱨǝrbir gunaⱨkar adǝmgǝ (mǝyli Yǝⱨudiy bolsun, Yǝⱨudiy bolmisun) ⱨalakǝt elip kelidu, dǝp jakarlaydu.

◘1:15 Yǝx. 2:9-22; 13:6

◼1:16 «Hudayimizning ɵyi» — muⱪǝddǝs ibadǝthanini kɵrsitidu, ǝlwǝttǝ.

◼1:18 «Qarpaylar xundaⱪ ⱨɵrkirixip kǝtti! Kala padiliri patiparaⱪ boldi, otlaⱪni tapalmiƣaq; ⱪoy padilirimu ɵzi «gunaⱨimiz bar» degǝndǝk mǝyüslǝndi» — ⱨǝtta qarwilar, daladiki ⱨaywanlar Hudaƣa nida kɵtürwatⱪanƣa ohxaydu (20-ayǝtnimu kɵrüng). Nemixⱪa ǝmdi Hudaning hǝlⱪi Uningƣa ⱨeq dua ⱪilmaydu?