46
46-küy •••• Huda baxpanaⱨtur
1 Nǝƣmiqilǝrning bexiƣa tapxurulup, «Pak ⱪizlar üqün» degǝn aⱨangda oⱪulsun dǝp, Koraⱨning oƣulliri üqün yezilƣan küy: —
Huda panaⱨgaⱨimiz wǝ ⱪudritimizdur;
Külpǝtlǝr qüxkǝn ⱨaman ⱨazir bolidiƣan bir yardǝmqidur. ◼«Pak ⱪizlar üqün» — ibraniy tilida «Alamot» deyilidu. Baxⱪa birhil mǝnisi: «Ayallarning yuⱪiri awazliⱪ küyi üqün yezilƣan» degǝn boluxi mumkin.
2-3 Xunga yǝr-zemin ɵngtürülüp, taƣlar gümürülüp dengiz tǝglirigǝ qüxüp kǝtsimu,
Uning dolⱪunliri xawⱪunlinip ⱪaynam bolsimu,
Ɵrkǝxliri bilǝn taƣlar silkinip kǝtsimu,
Ⱪorⱪmaymiz.
Selaⱨ.
4 Hudaning xǝⱨirini — Yǝni Ⱨǝmmidin Aliy Bolƣuqi makanlaxⱪan muⱪǝddǝs jayni,
Hursǝn ⱪilidiƣan eⱪinliri xahliƣan bir dǝrya bardur.
5 Huda uning otturisididur;
U yǝr ⱨǝrgiz tǝwrimǝydu;
Huda tang etix bilǝnla uningƣa yardǝmgǝ kelidu.
6 Barliⱪ ǝllǝr ⱪaynap, padixaⱨliⱪlar titrǝp kǝtti;
U awazini ⱪoyuwǝtkǝn ⱨaman,
Yǝr erip ketidu.
7 Samawi ⱪoxunlarning Sǝrdari bolƣan Pǝrwǝrdigar biz bilǝn billǝ;
Yaⱪupning Hudasi egiz ⱪorƣinimizdur!
Selaⱨ!
8 Kelinglar, Pǝrwǝrdigarning ⱪilƣanlirini kɵrünglar!
U yǝr yüzidǝ ⱪilƣan karamǝt wǝyranqiliⱪlarni kɵrünglar! ◼«... U (Pǝrwǝrdigar) yǝr yüzidǝ ⱪilƣan karamǝt wǝyranqiliⱪlarni kɵrünglar» — Pǝrwǝrdigarning «wǝyranqiliⱪ»lirining intayin ijabiy nǝtijisi bar — 9-ayǝtni kɵrüng.
9 U, jaⱨanning u qetigiqǝ bolƣan uruxlarni tohtitidu;
U oⱪyalarni sunduridu,
Nǝyzilǝrni oxtuwetidu,
Jǝng ⱨarwilirini otta kɵydürüwetidu.
10 U: «Tohtax, mening Huda ikǝnlikimni bilip ⱪoyux!
Mǝn pütkül ǝllǝr arisida uluƣlinimǝn;
Mǝn yǝr yüzidǝ “büyük” dǝp ⱪarilimǝn» — dǝydu.
11 Samawi ⱪoxunlarning Sǝrdari bolƣan Pǝrwǝrdigar biz bilǝn billǝ,
Yaⱪupning Hudasi bizning egiz ⱪorƣinimizdur!
◼46:1 «Pak ⱪizlar üqün» — ibraniy tilida «Alamot» deyilidu. Baxⱪa birhil mǝnisi: «Ayallarning yuⱪiri awazliⱪ küyi üqün yezilƣan» degǝn boluxi mumkin.
◼46:8 «... U (Pǝrwǝrdigar) yǝr yüzidǝ ⱪilƣan karamǝt wǝyranqiliⱪlarni kɵrünglar» — Pǝrwǝrdigarning «wǝyranqiliⱪ»lirining intayin ijabiy nǝtijisi bar — 9-ayǝtni kɵrüng.