96
96-küy •••• Alǝm Igisi kelidu!
1 Pǝrwǝrdigarƣa atap yengi nahxa eytinglar!
Pütkül yǝr yüzi, Pǝrwǝrdigarni küylǝnglar!■ 1Tar. 16:23-33
2 Pǝrwǝrdigarƣa nahxa eytinglar, namiƣa tǝxǝkkür-mǝdⱨiyǝ ⱪayturunglar,
Nijatliⱪini ⱨǝr küni elan ⱪilinglar!
3 Uning xan-xɵⱨritini ǝllǝr arisida,
Uning mɵjizilirini barliⱪ hǝlⱪlǝr arisida jakarlanglar!
4 Qünki Pǝrwǝrdigar uluƣ, zor mǝdⱨiyǝlǝrgǝ layiⱪtur!
U barliⱪ ilaⱨlardin üstün, Uningdin ⱪorⱪux kerǝktur;□ «Uningdin ⱪorⱪux kerǝktur» — yaki «U dǝⱨxǝtlik-ⱪorⱪunqluⱪtur».
5 Qünki barliⱪ hǝlⱪlǝrning ilaⱨliri — Butlar halas,
Biraⱪ Pǝrwǝrdigar asman-pǝlǝkni yaratⱪandur.□ «...barliⱪ hǝlⱪlǝrning ilaⱨliri — butlar halas» — «butlar» ibraniy tilida «ǝrzimǝslǝr».
6 Xanu-xǝwkǝt wǝ ⱨǝywǝt Uning aldida,
Muⱪǝddǝs jayida ⱪudrǝt wǝ güzǝllik kɵrünidu.
7 Pǝrwǝrdigarƣa tǝǝlluⱪini bǝrgǝysilǝr, i ǝl-ⱪǝbililǝr,
Pǝrwǝrdigarƣa xan-xɵⱨrǝt wǝ ⱪudrǝtni bǝrgǝysilǝr!□ «Pǝrwǝrdigarƣa xan-xɵⱨrǝt wǝ ⱪudrǝtni bǝrgǝysilǝr!» — muxu sɵzlǝr bǝlkim xuni bildüriduki, Hudaƣa Ɵzigǝ layiⱪ xan-xǝrǝp kǝltürsǝk, bu ⱪilƣinimiz uningƣa biz arⱪiliⱪ Ɵz küq-ⱪudritini tehimu kɵrsitix imkaniyitini yaritidu.
8 Pǝrwǝrdigarƣa Ɵz namiƣa layiⱪ xan-xɵⱨrǝtni bǝrgǝysilǝr;
Sowƣa-salam elip ⱨoyliliriƣa kiringlar!
9 Pǝrwǝrdigarƣa pak-muⱪǝddǝslikning güzǝllikidǝ sǝjdǝ ⱪilinglar;
Pütkül yǝr-yüzi, Uning aldida titrǝnglar!□ «... pak-muⱪǝddǝslikning güzǝllikidǝ sǝjdǝ ⱪilinglar» — yaki «... pak-muⱪǝddǝs eginlǝrni kiyip sǝjdǝ ⱪilinglar». ■ Zǝb. 29:2
10 Əllǝr arisida elan ⱪilinglar: —
«Pǝrwǝrdigar ⱨɵküm süridu!
Xunga mana, dunya mǝzmut ⱪilinƣan, u tǝwrǝnmǝs ǝsla.
U adilliⱪ bilǝn hǝlⱪlǝr üstidǝ ⱨɵküm qiⱪiridu.
11 Asmanlar xadlansun, yǝr-jaⱨan hux bolsun,
Dengiz-okyan wǝ uningƣa tolƣan ⱨǝmmǝ quⱪan selip jux ursun!
12 13 Dalalar ⱨǝm ulardiki ⱨǝmmǝ yayrisun!
U qaƣda ormandiki pütkül dǝrǝhlǝr Pǝrwǝrdigar aldida yangritip nahxa eytidu;
Qünki mana, U kelidu!
U jaⱨanni soraⱪ ⱪilixⱪa kelidu;
U alǝmni adilliⱪ bilǝn,
Hǝlⱪlǝrni Ɵz ⱨǝⱪiⱪǝt-sadaⱪitidǝ soraⱪ ⱪilidu.■ Zǝb. 98:7-8; Wǝⱨ. 19:11
□96:4 «Uningdin ⱪorⱪux kerǝktur» — yaki «U dǝⱨxǝtlik-ⱪorⱪunqluⱪtur».
□96:5 «...barliⱪ hǝlⱪlǝrning ilaⱨliri — butlar halas» — «butlar» ibraniy tilida «ǝrzimǝslǝr».
□96:7 «Pǝrwǝrdigarƣa xan-xɵⱨrǝt wǝ ⱪudrǝtni bǝrgǝysilǝr!» — muxu sɵzlǝr bǝlkim xuni bildüriduki, Hudaƣa Ɵzigǝ layiⱪ xan-xǝrǝp kǝltürsǝk, bu ⱪilƣinimiz uningƣa biz arⱪiliⱪ Ɵz küq-ⱪudritini tehimu kɵrsitix imkaniyitini yaritidu.
□96:9 «... pak-muⱪǝddǝslikning güzǝllikidǝ sǝjdǝ ⱪilinglar» — yaki «... pak-muⱪǝddǝs eginlǝrni kiyip sǝjdǝ ⱪilinglar».
■96:12 Zǝb. 98:7-8; Wǝⱨ. 19:11