Muⱪeddes Kalam (yǝngi yeziⱪ) Küylǝrning küyi 5

Xulamit Sulaymanƣa jawab beridu

1 «Mǝn ɵz beƣimƣa kirdim,

Mening singlim, mening jɵrǝm;

Murmǝkkǝmni tetitⱪulirim bilǝn yiƣdim,

Ⱨǝrǝ kɵnikimni ⱨǝsilim bilǝn yedim;

Xarabimni sütlirim bilǝn iqtim».

«Dostlirim, yǝnglar!

Iqinglar, kɵnglünglǝr haliƣanqǝ iqinglar, i axiⱪ-mǝxuⱪlar!»□

Ikkinqi ⱪisim {5:2-8:14} •••• Ər-ayalliⱪ muⱨǝbbǝttiki yahxilinixlar — muⱨǝbbǝtning yengi ipadiliri •••• Tɵtinqi hatirǝ — Muⱨǝbbǝtni rǝt ⱪilix toƣrisidiki bir qüx — u toƣruluⱪ oylinixlar {5:2-6:9} •••• Sǝkkizinqi oylinix — Xulamitni basⱪan ⱪorⱪunqluⱪ qüx {5:2-6:3} •••• Xulamit sɵz ⱪilidu — uni ⱪara basidu

2 «Mǝn uhlawatattim, biraⱪ kɵnglüm oyƣaⱪ idi: —

— Sɵyümlükümning awazi!

Mana, u ixikni ⱪeⱪiwatidu: —

— «Manga eqip bǝr, i singlim, i amriⱪim;

Mening pahtikim, mening ƣubarsizim;

Qünki bexim xǝbnǝm bilǝn,

Qaqlirim keqidiki nǝmlik bilǝn ⱨɵl-ⱨɵl bolup kǝtti!»■

3 «Mǝn tɵxǝk kiyimlirimni seliwǝtkǝn,

Ⱪandaⱪmu uni yǝnǝ kiyiwalay?

Mǝn putlirimni yudum,

Ⱪandaⱪmu ularni yǝnǝ bulƣay?»

4 Sɵyümlüküm ⱪolini ixik tɵxükidin tiⱪti;

Mening iq-baƣrilirim uningƣa tǝlmürüp kǝtti;

5 Sɵyümlükümgǝ eqixⱪa ⱪoptum;

Ⱪollirimdin murmǝkki,

Barmaⱪlirimdin suyuⱪ murmǝkki temidi,

Taⱪaⱪning tutⱪuqliri üstigǝ temidi;

6 Sɵyümlükümgǝ aqtim;

Biraⱪ sɵyümlüküm burulup, ketip ⱪalƣanidi.

U sɵz ⱪilƣanda roⱨim qiⱪip kǝtkǝnidi;

Uni izdidim, biraⱪ tapalmidim;

Uni qaⱪirdim, biraⱪ u jawab bǝrmidi;□

7 Xǝⱨǝrni aylinidiƣan jesǝkqilǝr meni uqritip meni urdi, meni yarilandurdi;

Sepillardiki kɵzǝtqilǝr qümpǝrdǝmni mǝndin tartiwaldi.

8 I Yerusalem ⱪizliri, sɵyümlükümni tapsanglar,

Uningƣa nemǝ dǝysilǝr?

Uningƣa, sɵygining: «Mǝn muⱨǝbbǝttin zǝiplixip kǝttim! — dedi, dǝnglar».□

Yerusalem ⱪizliri Xulamitⱪa sɵz ⱪilidu

9 «Sening sɵyümlüküngning baxⱪa bir sɵyümlüktin ⱪandaⱪ artuⱪ yeri bar,

I, ayallar arisidiki ǝng güzili?

Sening sɵyümlüküngning baxⱪa bir sɵyümlüktin ⱪandaⱪ artuⱪ yeri bar? —

Sǝn bizgǝ xundaⱪ tapiliƣanƣu?».

{Xulamit jawab beridu}

10 «Mening sɵyümlüküm ap’aⱪ wǝ parⱪiraⱪ, yürǝklik ǝzimǝt,

On ming arisida tuƣdǝk kɵrünǝrliktur;□

11 Uning bexi sap altundindur,

Budur qaqliri atning yaylidǝk,

Taƣ ⱪaƣisidǝk ⱪara.

12 Uning kɵzliri eⱪinlar boyidiki pahtǝklǝrdǝk,

Süt bilǝn yuyulƣan,

Yarixiⱪida ⱪoyulƣan;□

13 Uning mǝngziliri bir tǝxtǝk puraⱪliⱪ ɵsümlüktǝktur;

Ayniƣan yeⱪimliⱪ güllüktǝk;

Uning lǝwliri nilupǝr,

Ular suyuⱪ murmǝkkini temitidu;□

14 Uning ⱪolliri altun turubilar,

Iqigǝ beril yaⱪutlar ⱪuyulƣan.

Ⱪorsiⱪi nǝⱪixlik pil qixliridin yasalƣan,

Kɵk yaⱪutlar bilǝn bezǝlgǝn.

15 Uning putliri mǝrmǝr tüwrüklǝr,

Altun üstigǝ tiklǝngǝn.

Uning salapiti Liwanningkidǝk,

Kedir dǝrǝhliridǝk kɵrkǝm-ⱨǝywǝtliktur.

16 Uning aƣzi bǝkmu xerindur;

Bǝrⱨǝⱪ, u pütünlǝy güzǝldur;

Bu mening sɵyümlüküm, —

Bǝrⱨǝⱪ, bu mening amriⱪim,

I Yerusalem ⱪizliri!»□

□5:1 «Mǝn ɵz beƣimƣa kirdim, ... murmǝkkǝmni tetitⱪulirim bilǝn yiƣdim, ⱨǝrǝ kɵnikimni ⱨǝsilim bilǝn yedim; xarabimni sütlirim bilǝn iqtim» — Sulayman Xulamitning tǝklipini ⱪobul ⱪilip uning bilǝn toluⱪ muⱨǝbbǝtlixidu. «Dostlirim, yǝnglar! Iqinglar, kɵnglünglǝr haliƣanqǝ iqinglar, i axiⱪ-mǝxuⱪlar!» — bu sɵzlǝrni bǝlkim Yerusalem ⱪizlirningkidur. Ular (yaki toy ⱪoldaxliri) axiⱪ-mǝxuⱪlarning muⱨǝbbǝttin ⱨuzurlinixlirini toluⱪ ⱪollaydu. Ularning (Yerusalem ⱪizlirining) ⱪollixi bilǝn Hudaning ⱨǝrbir ǝr-ayalning otturisidiki muⱨǝbbitini, jümlidin jinsiy muⱨǝbbitini tǝstiⱪlaydiƣanliⱪi kɵrsitilidu; qünki u ɵzi bu ixlarni yaratⱪan.

■5:2 Top. 5:3

□5:6 «U sɵz ⱪilƣanda roⱨim qiⱪip kǝtkǝnidi» — baxⱪa birhil tǝrjimisi: «U burulup kǝtkǝndǝ roⱨim qiⱪip kǝtkǝnidi».

□5:8 «(2-8-ayǝt) xǝrⱨi» — Xulamit ⱪara basⱪan bu qüxni kɵrgǝndǝ Sulayman bilǝn alliⱪaqan toy ⱪilƣan bolsa kerǝk. Uning qüxidǝ bolƣan inkasi wǝ tǝⱪǝzzasini 2:17dǝ wǝ 4:1-3dǝ hatirilǝngǝn birinqi qüxidiki pozitsiyǝsi bilǝn selixturƣanda tüptin ohximaydu. Bǝlkim qüx Xulamitning ⱨayatining ǝmǝliy ǝⱨwalini, yǝni uning Sulayman bilǝn ǝmǝliy muⱨǝbbitini ǝks ǝttürgǝn; qüxtǝ kɵrüngǝn bǝzi ixlar, xübⱨisizki, Sulaymanning muⱨǝbbitining, bolupmu jinsiy muⱨǝbbǝt jǝⱨǝttǝ Xulamitⱪa bolƣan tǝlǝplirini kɵrsitidu. U sɵyginining muⱨǝbbitigǝ yaki muⱨǝbbitining tǝlǝplirigǝ anqǝ sǝzgür bolmaydiƣan bolup ⱪalƣan ohxaydu. Bu sǝzgürsizlik ularning muⱨǝbbitigǝ intayin hǝtǝrlik idi; Xulamitning qüxidǝ Sulayman ketidu. Xuning bilǝn Xulamit qüx kɵrüx bilǝn muⱨǝbbǝtning ⱪimmǝtlikini bilip yetip, ixlarni yahxilaydu. Yǝnǝ muⱨim bir ix diⱪⱪitimizgǝ ǝrziyduki, qüxtǝ wǝ ǝmǝliy turmuxta, Sulayman (ǝrkǝk bolƣini bilǝn, padixaⱨ bolƣini bilǝn, pǝyƣǝmbǝr bolƣini bilǝnmu) ⱨeqⱪaqan Xulamitni «muⱨǝbbǝt»kǝ zorlimaytti, bǝlki Xulamitning ɵzi bilǝn muⱨǝbbǝtlixixini tǝlǝp ⱪilatti. 7-ayǝttǝ: Qüxidiki jesǝkqilǝr uni paⱨixǝ ayal dǝp ⱪariƣaqⱪa, uningƣa xundaⱪ muamilǝ ⱪilip, qümpǝrdini uningdin tartiwalidu.

□5:10 «Mening sɵyümlüküm ap’aⱪ wǝ parⱪiraⱪ, yürǝklik ǝzimǝt,...» — baxⱪa birhil tǝrjimisi: «Sɵyümlükümning yüzining aⱪ yeri ap’aⱪ, ⱪizil yeri ⱪipⱪizil...».

□5:12 «Yarixiⱪida ⱪoyulƣan» — yaki «yaⱪutlardǝk bezǝxkǝ bekitilgǝn».

□5:13 «Uning mǝngziliri bir tǝxtǝk puraⱪliⱪ ɵsümlüktǝktur; ayniƣan yeⱪimliⱪ güllüktǝk; uning lǝwliri nilupǝr, ular suyuⱪ murmǝkkini temitidu» — ayǝtning ibraniy tilini qüxinix sǝl tǝs, baxⱪa tǝrjimiliri uqrixi mumkin. Nemila bolmisun tetitⱪu wǝ huxpuraⱪliⱪ ɵsümlük baƣliri ottura xǝrⱪtǝ intayin az idi, ⱪimmǝtlik idi.

□5:16 «Uning aƣzi bǝkmu xerindur» — bu bǝlkim gǝp-sɵzlirining tatliⱪliⱪini kɵrsitidu. «(9-16-ayǝt) xǝrⱨi» — Xulamit ⱨazir baxⱪilarning aldida sɵyginini mahtaxtin ⱨeq tartinmaydu. U ⱨazir «ⱪoram taxta yoxurunƣan pahtǝk»tin kɵp dadil bolup kǝtti!