JOHN
Hamadefal
Metamol babior we yael John ila ruwow fael yal teftaf; yebe hakela lal deper rechokla rebe yawli bo rebe mel le rebe sew chog mo Deus mo Jesus Kristus le Lol, iwe mo mala yebe hadpar irel foloy kala yete katos le yebe hatawsi mele resa sew chog iyang. Foloy le ila ye subdah mo irel yar chepar yarmat le molfid ila ye budoh mo irel yach mel lal talop le. Ila Jesus we Lol Deus ila towe yoh le yebe mel bo iy semal holngol yarmat. Sensy ka ila re sor bo hare yarmat rebe daor, ngo rebe taldir mo irel luluwalel yar memel wol talop le. Iwe ngo re wol foloyu le yach be daor ila tor pelal ngal yach ma foru maltemay mo yach hachangir yarmat.
Irel yael John hapaliyel ngal tapel foloy ka ngo ye haffado yal tefadiy le Jesus Kristus ila iy semal holngol yarmat. Iwe ngo yesa hakela kaptal mala panger rechokla ngo rebe chepar irel Jesus, iwe mo hachangcheng la yael Deus, iwe ngo ir rebe wol hachangi fengalir.
Papal Meka Yadol Babior Le
Hamadefal 1:1–4
Teram mo luwul ruchupung 1:5—2:29
Mekla lol Deus mo ikla lol Moniyan 3:1–24
Katos mo machey 4:1–6
Yengangel Hachangcheng 4:7–21
Tugulul ladep la ye tagiyet 5:1–21
1
Metamol Babior We Yael
Pedal Hapatpat We Ma Fang Molow
1 Hasa teftafwey babior iremi la kofal Pedal Hapatpat we yema fang Molow le yodwe chapdagel dah chog ngo ye faesul mel. Hamem hasa spegil rongrong ngo ha wiri ngal metmem, ngoa, hasa wiri ngo ha yangsi ngal pomem. Jn 1:1 2 Yodwe yela llah loh molow le, ngo hamem ha wiri; iwe hasa kapta ngo ha kangalugmi kofal molow le tor siyal, le ye mel irel mala Temal le iy ye hagolal ngalgich kofal. Jn 1:14 3 Meka hamem ha wiri ngo ha rongrong ila ha wol kangalugmi, bo hare hami habe dabohmem irel yamem sew chog mo Deus le Temal mo Jesus Kristus le Lol. 4 Hamem ha tefa iy mele bo mil mala be kel yamem rraey.
Deus Mele Teram
5 Hapatpat la hamem ha rongrong mo irel molwe Lol ngo hasa kapta loh ila iye sengal: Deus mele teram, ngo tor sugfed ruchupung le ye mel lal depal. 6 Hare ye wochog molwe gich si sor bo siya sew chog mo Deus ngo si chil mel luwul ruchopung, ila ngo gich ila site katos irel yach hapatpat mo wegdegich. 7 Iwe ngo hare si mel luwul teram, le siya wochog iy le ye mel luwul teram, ila ngo gich ila siya rol sew chog mo iy. Bo mala cchal Jesus we Lol mele yesa chuy yach molfid iyang.
8 Iwe ngo hare sibe sor bo tor molfidich, ila ngo sa gich chog yach kachepragich. Ngo si ted gola mala holngol katos le kofal Deus. 9 Iwe ngo hare si kangalu Deus le gich choto hamolfid, ila ngo Deus yebe itol chog liliyel molwe iy ye hatugulu ngalgich. Iy yebe ffaho depal ngalgich, ngo ye taldigich mo luwul wegdeg tayikof ka yach. 10 Hare sibe sor le site molfid, ila ngo ye hafedeg ngal chog mala si sor bo Deus ye kachepar, ngo pedal mala yalol Deus le ye katos ila ye tamel irech.