JOHN
Hamadefal
Harwowel babior we yael John ila tefayel “Mal we yar” ngal “Fefel we mo yalwich kowe lol,” le malbo fael mele ila sew eklesia mo solbos iwe mo mekla chol iy eklesia la. Mekla ye mochoch le yalol babior le ila ye hafalpech ngalir yarmat bo rebe hachangi fengalir ngo re hafalir irel chol hamedaf kala rete katos mo foloy kala yar.
Palpal Meka Yadol Babior Le
Hamadefal 1–3
Pallengel pelal hachangcheng 4–6
Yar be llugu deper irel foloy kala yete katos 7–11
Haygul loh 12–13
1
Harwowel Babior We Yael
1 Babior le ila ye budoh mo irel John we iy mele yar mal irel eklesia — Ngali halesiya la mo mekla yarmetael le ye kel yai hachangir. Iwe ngo te ngang chog mele iy hachangugmi, bo panger rechokla re gola mala ye katos ngo re hachangugmi, 2 bo fael mala, katos ila ye mel irech ngo yebe mel irech le tor siyal.
3 Deus le Tamal mo Jesus Kristus le iy Lol, rebe fang ngalgich haradiya mo fahoyel ladep mo hopos; be mel bo yach luwul katos mo hachangcheng.
Katos Mo Hachangcheng
4 Ifa lepal yai raey irel mala ila gola le tot mekla lom ila re mel luwul mala ye katos le igegel chog molwe mala Temach ye kangalgich. 5 Ila ibe dongor ngalug diyaf, bo hare be pangach ngo sibe rol hachangi fengali gich. Mele ila te sew hatobtob le ye tefoy le ibele moch tefa wey iremi; bo hatobtob le ila hatobtob we ye faesul mel irech mo irel molwe chapdagel dah. Jn 13:34; 15:12, 17 6 Hachangcheng le ngang iy kekapta kofal ila mala gich sibe taelenga hatobtob la yael Deus. Hatobtob le ila pangmi ngo hasa rongrong mo irel molwe chapdagel dah: ila pangmi ngo habe mel luwul hachangcheng.
7 Ye cholop rechokla rema kachepar le resa loh wol pangal loh talop le, ika rechoka yete tugul lal deper le Jesus Kristus ila ye sub bo yarmat. Tapel rechoka ila rema kachepar ngo re hatohar ngal Kristus. 8 Ila habe llugu dipmi bo yede pung tangugmi mekla hami hasa yangtali bo hare yebe yoh ngalugmi pangal paliyel yengang kala yami.
9 Semal le yebe te dabey foloy ka yael Kristus bo ye hattasi loh mo peglahol ila ngo tamel Deus irel. Iwe ngo semal le yebe dabey foloy ka ngo Deus mo mala Lol re mel irel. 10 Ila, hare semal ye budoh iremi ngo te ika foloy ka ye hasi doh iremi, ila ngo ha towe paliloh irel mekla yimi; iwe ngo ha towe wol kangalu bo, “Hopos be mel irem.” 11 Bo semal le yebe fang ngali hagilel hopos, ngo iyebe wol mel bo chilal irel wegdeg tayikof kala yema foru.
Hartael Hapatpat
12 Ye chil cholop mekala ibe kangalugmi, ngo te depey le iy be tefa diy lal babior; iluluwaley bo sibe rol wer fengal bo sibe kapatpat bo hare sibe holngol rraey.
13 Mokwe lol molwe bisim re fang wey yar habong iremi.