JAMES
Hamadefal
Babior le ye budoh mo irel James ila sew babiorol folol hammal le ye teftaf bo ye be loh “irer panger mokwe lol Deus le resa yeregloh lal faileng le.” Yeramtala tefayal babior le, ila ye teptap hapatpat kala ye ffod irel yal hamdefa kofael wululul repiy mo igeger mo wegdigir Kristiano. Iwe ngo yesa chapiy mo irel igegel Kristiano ngo yesa hamdefa meka mmaler yarmat mo yar hafohoy, mo luluwal ka ye ma hasgichloh luwul molfid, mo wegdeg ka ye momay, hafobder, tugulul ladep mo wegdeg, iwe mo irel yach ma tapeli meka yewach irel hapatpat mo irel yach ma happaliyel fengal, iwe mo hattodah mo yach ma hatetalogich, mo yach ma salepa kapter sibis mo yach ma habos, mo lelayel repiyach mo mepel.
Mala babior le ye hakkela le ye palleng pelal, ila kofal yach wegdeg le yebe fidfid ngal yach tugulul ladep, irel yach dabey mele wululul Kristiano.
Palpal Meka Yadol Babior Le
Hamadefal 1:1
Tugulul ladep mo repiy 1:2–8
Hafohoy mo mmal 1:9–11
Hagilgil mo wegwegel ladep 1:12–18
Yach ma rongrong mo yach ma foru 1:19–27
Sibe llugu depach bo side harere 2:1–13
Yengang mo tugulul ladep 2:14–26
Kristiano mo hapatpat kala yar 3:1–18
Kristiano mo faileng le 4:1—5:6
Samat mo samat foloy mo hamedaf 5:7–20
1
Babior Le Ye Budoh Mo Irel
1 Babior le ila ye budoh mo irel James le iy semal boy le lol Deus mo Samol Jesus Kristus:
Yai habong ngalir panger mekla lol Deus le re medardar fedal lal ballel faileng le. Mt 13:55; Mk 6:3; Ac 15:13; Ga 1:19
Tugulul Ladep Mo Repiy
2 Hami re wol bisiy, habe itol lal dipmi le hami ila ha yolbuw irel yodka be holahmi pangal metmetael weres iyang, 3 bo ha gola le be kkel chog yami tugul luwul yami weres mo hafohoy, ila ngo yebe kawraloh le te tugul mele iy, ngo be yoh ngalugmi le habe yedamgel iyang. 4 Habe itol dipmi irel yami yedamgel ngo ha towe ppoloh yee, yela hola yodla iy, ila ngo towe yor hapagol yami mel ngo tor mele towe yoh ngalugmi. 5 Semal le ye temedaf ngo sa mepel ngal Deus bo yebe fang ngali teram. Bo Deus ila ye mmol ngo ye momay yal hagiyeg ngal pangal yarmat. 6 Ha towe yeyewal. Ha hatugulu lal dipmi irel yami mapel bo semal le yebe te tugul lal depal, ngo yebe wochog hatobtob le yema dabey felel yaeng. 7-8 Tappel rechoka te tugul lal deper ngo re yeyewal irel pangal mekla rema foru, ila re towe luluwaley le be yor mele Samol yebe fang ngalir.
Hafohoy Mo Mmal
9 Kristiano ka re hafohoy ila be momay deper irel yodla Deus be hatagitardah. 10 Ngo Kristiano ka re mmal ila rebe rraey irel mala Deus be hatetalordiy. Rechokla re mmal ila rebe torloh le rebe wochog floresal ire ka ye tumuldah chog. 1:10–11; Is 40:6–7 (LXX) 11 Yebe kkarloh yaal ngo bele mmaechloh ire we, iwe yesa pungdiy molwe foloresal le yesa chuyloh molwe momayel. Be ila senger rechoka re mmal, bo rebe mes luwul yar yedamgel chog bo yebe palleng tot yar mmal.
Hagilgil Mo Wegwegel Ladep
12 Be momay depel semal le luwul yal weres ngo ye tugul chog lal depal bo be yoh ngali hagilgil le, ngo yebe yoh ngali molwe Deus ye hatugulu yebe fang ngalir rechokla re hachangi. 13 Hare yesa weweg depel semal ngo towe sor bo, “Wegwegel ladep le ila ye budoh mo irel Deus.” Bo towe yoh le moniyan yebe weged depel Deus, iwe ngo Deus ye tema weged depel yarmat ngal molfid. 14 Semal le bela weg depel ngo iy chog yal tagul sala mel luwul luluwal tayikof kala yal. 15 Iwe ngo luluwal tayikof la yal ila bele hasbudah molfid. Iwe ngo bela palleng loh molfid, ngo bele hasbudoh maes.
16 Ha hafaelliy re wol bisiy bo rede kacheprahmi! 17 Pangal kkefang kala ye momay mo ikla ye kamdidiy, ngo ye bidiy mo wol laeng irel Deus we iy mele ye hasbu mekla hawerel laeng. Iy ila ye tema yusuwel igegal ngo ye tema tagul tang gich bo si dela mel luwul ruchupung. 18 Yal luluwal mele gich si subdoh mo luwul hapatpat la ye katos iyang, le sibe hamo mo imol pangal mekla ye hasbudoh.
Hattaleng Mo Wegdeg
19 Ha towe maligili mele re wol bisiy! Pangal yarmat ngo be cchang deper le rebe taelenga hapatpat, ngo rebe luluwal malulu ngo resa moch hapatpat, iwe ngo ye towe ma ttir chog yar ssong. 20 Ssong ila towe hasi ngalgich luluwal kala yael Deus le ye momay. 21 Ha hachuya wegdeg tayikof mo iremi. Ha tagul ngal Deus bo yebe yetolong hapatpat la ye momay lal mekla dipmi bo ila mala be yoh le yebe fang ngalugmi molow.
22 Ha hafaeli bo de hami chog yami kacheprahmi, irel yami taelenga chog ngo ha temchael habe foru mekla yalol Deus. 23 Semal le yema hattaleng chog ngo ye tema mechael foru mekla yalol Deus, ila ye wochog semal le ye kalong lal pipiy ye sala wiri mala halngol igegal. 24 Yodla chog ye dartang pipiy we, ngo ye maliglaloh igegel molwe yongal. 25 Ngo semal le yebe chichiy hamayi hatobtob le ye hartael momay le yema hachuya fael molfid, iwe ngo yesa itol depal iyang, le towe mele chog yebe hataelenga bo yebe wol foru, ila ngo Deus yebe fang ngali yolbuw irel pangal mekla yema foru.
26 Yor semal le ye luluwaley le ye itol depal irel yal tugul? Hare yebe te hafalliy mekla ye sosor, ngo tugul la yal ila tor pelal ngo yesa iy chog yal kekachepra. 27 Mala Deus le Temach ye sor bo halngol tugulul ladep ila iye: Ha hafallir yalwich ka tor wulutugur, mo fefel kala yesa mes rir le resa hafohoy, ngo hasa itol dipmi bo hade dabey wegdeg tayikof kala lal faileng le.