زبُور 124
نغمۂ صعُود۔ عبادت کے لئے مُسافری نغمہ۔ داویؔد کا زبُور۔
1 اگر یَاہوِہ ہماری طرف نہ ہوتے۔
اِسرائیل یُوں کہے،
2 اگر یَاہوِہ اُس وقت ہماری طرف نہ ہوتے
جَب لوگوں نے ہم پر حملہ کیا،
3 جَب اُن کا قہر ہم پر بھڑکا،
تو وہ ہمیں زندہ ہی نگل جاتے؛
4 سیلاب نے ہمیں غرق کر دیا ہوتا،
تیزرَو موجیں ہم پر سے گزر جاتیں،
5 اَور پانی کا جوش و خروش
ہمیں بہا لے جاتا۔
6 یَاہوِہ کی سِتائش ہو،
جنہوں نے ہمیں اُن کے دانتوں کا شِکار نہ ہونے دیا۔
7 ہم ایک چڑیا کی مانند
صیّاد کے جال میں سے بچ نکلے؛
جال ٹوٹ گیا،
اَور ہم بچ نکلے۔
8 ہماری مدد یَاہوِہ کے نام سے ہے،
جو آسمان اَور زمین کے خالق ہیں۔