1 15:1 Luk 22:66Ak kong miningket ai tu ipma krakgen tukgunakgen a Maur Wailen, tu melnum wailen wailen, nampokgen tu melnum a aroaro wonel tu yangkipm a Moses, a tu melnum wailen wailen kimeket mapming a ikgalen tu Suta pa, tu la yangkipm pa kai itna wris, plalng pipa, tu ak ampei pa yapo Sisas pa ayewel kai wam a Pailat, mringman a Rom kil kul rpma ikgalen tu Suta. 2 Pailat kil asentel la, “Kitn pa melnum tukgunakg a kipm Suta aki?” Sisas kil akalmpe la, “Kolpa ok a kitn pa la pake.” 3 Tu ipma krakgen tukgunakgen pa tu ak akorel kalpmilel. 4 Pailat kil asentel anti ur la, “Ake kitn akalmpe yangkipm ok ur a tu ti asenteitn ti? Ake kitn atning a tu la almpetn yangkipm watipmen ti!” 5 15:5 Aisaia 53:7; Mak 14:61Ari Sisas ake akalmpe yangkipm ok ur, kolpa atom Pailat kil akwonalmpen watipmen.

6 Akangklei wring wris wris ak wang wail a men akwonalmpen a pekg Maur Wailen ak awi tu amenen aye kul takuleikgen tu Isip pa, Pailat kil elngen melnum ur a rpma wan tipmining pa kul or en. Tu wrong kin kipman tu la nang a melnum wris ur pa atom Pailat kil elngen melnum pa kul or en. 7 Ak wang pa melnum ur pa, nang akilen pa Parapas, nampokgen tu melnum tiur pa, tu rka wan tipmining. Pekg tu wrekg la ungkwan tu Rom pa atom tu or tita, atom tu tiur am pekg tu alm amo ike. 8 Atom tu wrong kin kipman pa tu wli eng Pailat eng la kil elngen melnum wris ur pa kul or en, kol a kil antokg akangklei wring wris wris pa. 9 Pailat kil akalmpe ok a tu pa kolpa, “Kipm wasrongen la kupm elngen melnum tukgunakg akipmen Suta ti eng kil kai?” 10 Pailat kil ariwe la, tu ipma krakgen tukgunakgen a Maur Wailen tu nikgwalpm paipm eng Sisas pa, kolpa atom tu elng Sisas kai wam akilen. 11 15:11 Kwap 3:13-14Tu ipma krakgen tukgunakgen a Maur Wailen tu tirpmingen tu wrong kin kipman eng la tu elng ok itni wris laniki Pailat pa la kil elngen Parapas pa kul or en. 12 Pailat kil lanaken anti ur kolpa, “Ti mpa kupm ntokg kolai melnum ti a kipm akwewel la kil melnum tukgunakg a la ikglen kipm Suta pa?” 13 Tu elng ok itna wris la yikakatnen la, “Kurkurngkel rki yo okgmangki!” 14 Atom Pailat kil akasenten la, “Kil antokg kuina paipm?” Ari tu la titnongket paipm la, “Kurkurngkel rki yo okgmangki!” 15 Pailat kil la armponel tu wrong kin kipman, kolpa atom kil elngen Parapas pa kai. Sisas pa kil elngen kai wam a tu melnum a almpwrong pa eng ak ampei iket ntrawel, plalng pipa, tu ayewel kai eng la kurkurngkel rki yo okgmangki.

16 Tu anti Sisas antokg yangkipm pa plalng pa, tu awiyel a wan pa kulor itna yipmingki wunen a tu melnum a almpwrong atne pa. Atom tu akwe tu wrongkwail a almpwrong pa tu kul itna. 17 Tu nowewel apm watet wail ur pa kol tu melnum wail wail nowe pa, atom tu wale ampei iket pa elngtirmpa tukgunakg a kil pa. 18 Tu kai itna atom tu la akinowel Sisas pa la, “Men alkeitn wor, kitn melnum tukgunakg a ikgalen kipm Suta itni wang watin!” 19 Tu orel ak yo kai tukgunakg a kil pa, atom tu ungkwa wlikgel. Tu kapor kilko alein a akinoalmpel. 20 Tu la paipmel kil plalng pipa, tu aner apm watet kai num a kil pa atom tu awi apm alkil pa nowewel kai num kil pa. Atom tu awiyel aye kai eng la kurkurngkel rki yo okgmangki.

21 15:21 Rom 16:13Saimon, melnum ur a Sairini, yan a Aleksanter ekg Rupus, kil angkai wring pa kul la kil a kai anong. Atom tu melnum a almpwrong tu ansilel angko ya pa, atom tu la titnongket la kil ngkit yo okgmangki a Sisas pa iye.

22 Tu awi Sisas aye kai wrik ur a tu namput la Kolkota. Yiprokgen a wrik nang pa pati kolpa: tukgunakg timpal. 23 Tu la uk Sisas u wain tiur a arongke nampokgen kweikwei kupuk kupuk pa ari ake kil al. 24 15:24 Nang 22:18Tu karkurngkel rka yo okgmangki. Atom tu awi apm akilen pa elngkirmpa. Tu nalu yo ipik eng mpa ri la mpa mla a i uwi apm kuina kuina pa.

25 Takgni al num wleket pa, tu karkurngkel rka yo okgmangki. 26 Ela kaino yo okgmangki kwa pa tu nira yangkipm yiprokgen a pekg kil antokg pa. Tu nira kolpa: Melnum tukgunakg a ikgalen tu Suta. 27 15:27 Aisaia 53:12Melnum wekg a antokg paipm pa tu karkurngken nampokgen Sisas, ur rka kai wam wi, a ur rka kai wam wangkokg. 28 Kol yangkipm ur a ela kai wrkapm tingklaket a Maur Wailen pa am palng ok arke tike. Yangkipm pa kolpa: “Tu namputel nang nampokgen tu melnum paipm.”

29 15:29 Nang 22:7; 109:25; Mak 14:58Tu wrong kin kipman kaingkul angkli wulmpa pa elng kaino ariwel atom tukgunakg wilwil a ak nokgel Sisas pa la, “A, kitn melnum a pekg la tikale yalming a Maur Wailen, plalng pa, wa le ik wang wraur, 30 kolpa ti kitn ngklin kitn alkitn ti utnurng yo okgmangki ti nar kanokg ti ri!” 31 Tu ipma krakgen tukgunakgen a Maur Wailen nampokgen tu melnum a aroaro wonel tu yangkipm a Moses pa, tu yat tu la paipmel Sisas pa naki tita kolpa, “Kil pekg angklin tu wrong kin kipman tiur ai, pake kil akentiwe mpa ngklin kil alkil ti. 32 Krais melnum tukgunakg a ikgalen men wrong kin kipman a Isrel ti kil nar kanokg ti ri, eng mpa mentepm ri, ukipma kil pa!” Melnum wekg a tu karkurng nampokgen Sisas pa tuwekg wa la paipmel kil pa yat.

33 Takgni no pirng pa, mining pa kul kai ak upaarng kanokg ti yela, itna a a, kai nungkurikg. 34 15:34 Nang 22:1Nungkurikg ti pipa, Sisas kil akwe yikakatnen la kolpa, “Eloi, Eloi, lama sapaktani.” Pa la kolpa: “Maur Wailen akupmen, Maur Wailen akupmen, kitn atnurng kupm ti eng ntei?” 35 Tu melnum tiur a itna wreren kil pa, tu atning ok a kil akwe pa, atom tu la, “Kipm itning, kil akwe Elaisa aki?” 36 15:36 Nang 69:21Melnum ur pa pirng kai elng kweikwei ur kolen nok ing pa angklewe u wain kinipis pa elntitna wark pa aye kaino uk Sisas eng la kil rkolng il. Melnum pa la, “Itni pen, eng mentepm ri la mpa Elaisa uwiyel iye nar kanokg ti aki kalpis.” 37 Sisas kirkar yikakatnen kolti, kil nol angkon.

38 Apm kaki wail a tu alekg rka ak angketen yalming tiwel a Maur Wailen pa rakol wompwekg angkaino kwa wai elngen kinar kanokg ti. 39 Melnum tukgunakg a ikgalen tu melnum kamel wampwomis a almpwrong pa kil itna wreren ari Sisas amo kolpa, atom kil la, “Aklale wrisen, melnum pa Warim Kipman a Maur Wailen.”

40 15:40 Luk 8:2-3Tu kin tiur pa itna kai watinet ai ikatnen itna. Kin ur a anti tu pa itna pa, nang alkilen pa Maria a Maktala. Wa ur pa Maria, man a Semis, wusok a Sosep. Wa ur pa Salome. 41 Tu kin pa katnun Sisas angklinsel okipma kweikwei ak wang a kil rpma Kalili. Tu kin watipmen tiur pa rka. Pekg tu kul Serusalem nampokgen Sisas.

42 Ikgkil pa wang wail a rpma eng yapm. Wang weti pa wang a numprampen kweikwei pake. 43 Ak nungkurikg pa Sosep a Arimatea kil kai ari Pailat. Kil ake ngkark, kalpis. Kil asentel la kil a uwi yipmiri a Sisas. Sosep kil melnum a aye tamtimpal a anti tu mring man wail wail rpma atning atning yangkipm, atom tu wrong kin kipman kaporng yangkipm la kil melnum wor. Kil yat kil rpma nungkwangen la Maur Wailen kil ikglen nol nikgwalpm akilen. 44 Sosep kil asentel kolpa atom Pailat kil akwonalmpen watipmen la, “Sisas kil amo aki kil rka?” Atom kil akwe melnum tukgunakg a ikgalen tu melnum kamel wampwomis a almpwrong pa kul asentel la, “Sisas amo aki kalpis?” 45 Atom melnum tukgunakg a ikgalen tu melnum kamel wampwomis a almpwrong pa lanaki Pailat pa la, “Sisas amo ike.” Atom kil awi wor la Sosep kil uwi palk a Sisas pa iye kai. 46 Sosep kil armpen apm tangkoren watinet ur pa aye kai elngtirmpa. Kil ngkat palk a Sisas pa aye nar kanokg ti atom ak apm pa ak yapowel. Plalng pipa, kil ngkat aye kawor rmpa kirk ur a pekg kil u mlamin kai wrik krongen pa eng kil alkil pa. Atom kil talpul wes pa kai ak tikrawin lkim ok a u mlamin pa. 47 Maria a Maktala nampokgen Maria, man a Sosep, tuwekg itna ari wrik a kil aye Sisas kawor armpe pa.