3
Aumwa hap de yaklanak dep de ol zïm-zïm:
1 Hwëna ansa emki enlala gwe-gwibin: Aumwa hap de yaklana an zen angkam lwa seꞌan, dekam okamana an sërkam tangan sa karek gwe zaher.*3:1 1Tim. 4:1 2 Sap dekam zini beyakam sa anakan lowehe gwer:
zëre en mo timsi de ngalap gwe-gwibin,
te-alasa de ensa lwa gweblan,
zëre en mo bosesa de mam gul gwen,
sërkam de zëna-zëna gwe-gwen,
aha zisi de lamang ta gwibin,
an-bi zemka bëjen betek gwizimdin,
Alapsa bëjen enlala gwe-gweblan,
wal bose zemka bëjen anakan gublun, “Ema tol asa sam tala.”
3-4 Hen bëjen kwasang gwibiridan,
zi bosyan hap de jalsa lam gul gweblan,
boton ol gol halada gwen,
wal bosyansa de golëgu gwen,
darak soson,
zënaka bëjen zerinik gwen,
dawem enlalasa bëjen zer irin,
bolte-bolte enlala enkam de gwë gwen,
totore-totorekam de gwë gwen,
syan-syan enkam de lowehe gwen,
hwëna Alapsa bëjen enna lwablan.
5 Kire zini zen ëk enkam anakan ëgu gwenan, “Ëe an Kristen zi.” Hwëna zen man baes ta gwenan– Alap de zëre mo sosonkam zëno mae mo lowe hensa li yul sone gwizimdin hipye. Zep kirekam de zisi emki langa tasïk gwibin.*3:5 Mat. 7:15; 7:21; Tit. 1:16
6 Ahakon hen we walsya gol-gol san aningkim yasik da gwibirin. Zen anakare we walsya karek san dep tïtï da gwibirin:
enlala sin-sin wenya,
enlala hole-hle beya wenya,
hen kirekam-kirekam karek hap de enlala ëdowe hanan wenya.
7 Kirekam de we walya man ësam gwesïk gwenan– ol ësesa de ësane gwe-gwen hapye. Hwëna zen bëjen anakan klis gun, “An eiwa dena. An boton.” 8 Men kirekam orep Yanes Bak ne Yambres Bak ne *3:8 Yanes Bak ne Yambres Bak neka, Yahudi zini kirekam bose nosok Mesirk de meiyer golzauk gwen zi darena– men zen Musasa tru-tru ul gweblakake. (Kel. 7:11; 7:22; 9:11) Musasa tru-tru ul gweblaka, zep yasik tabin hip de zini in hen kirekam angkam eiwa de tawa tabin nik tru-tru nul gweꞌan. Zen mes enlala nakon ëhaï gwek. Zen mes tangan Kristen zi mo taïblïbin nikon ëlanga gwesïk, hwëna totore tawa tabinsi daïblï gwibirin. 9 Hwëna kire zisi molya holokam ang neibirida gwek. Sap nabakam sa anakan dam dasïk gwibir, “An enlalana joblo-topna,”– men kirekam hen orep de auyan-azana zi darena insa dam nosusukke.
Timotius de kirekam Alap hon tal gwesïn hïp de ol:
10 Hwëna Timotius Bak, em ano tawa tabinni tawana– hen ano gwënna, hen ano dwam gwibinni dekam de enho kles gwesïn srëmkam gwë gwen hap denaye. Hen em mese asa anakan tame taka,
“Zen Biansa de taïblïblannak tatem zauk gwenda.
Wal bose wal zemka de kwasang gwibirida gwen hap alp gwe-gwenda,
hen nabakam hom jal gwe-gwenda.”
11 Asa kim Yesussu de taïblïblan srëm wenya ëna Antiokiak, Ikoniumk, hen Listrak karek da gwek, dekam em hen zëwe gwëꞌanka.*3:11 Kis. 13:14-52; 14:1-20 Zep em mese dekam asa anakarekam kara ta gweka, “Zen sap kareksa goltowe gwenda, hwëna nama tatetekam zauk gwenda.” Hëndep dekam man Bian tïngare abe hap de jal zi mo taha nakon asa zeser sone gweka. 12 Asa en molya kirekam në gweblak. Hwëna tïngan men zen Kristus hon de ëtal gwesïn hïp ëdwam gwe-gweꞌan, desa hen kirekam sa karek da gwibir. 13 Hwëna enlala karek zini hen yasik tabin hip de zini sa etan zëre mae mo karek-karekna esek nulse zahe gwer. Zen sap aha zisi yasik da gwibirin, hwëna zëna hen hom anakan tame nul gwenan, “Hare ëe an syauk sun dep am gwë haꞌan.”
14 Zep tane tol, men desa emsa tawa da gwek, em mese hëndep dawemkam taïblïbirki. Zep zen zëwe en tatem zauk. Sap ëe in zen emsa tawa la gwek, em mese dawemkam asa tame tabirki. 15 Em betek nakone Alap mo ola tame gulku. Alap mo ola, zen dekon zep enlala blala hata gwenda, dekam zep zini ëngaya gwen hap de orana dam dasïk gwenan– Kristussu de taïblïblankam. 16 Sap Alap mo ola mensa ale nuk, zen kïtak Alap zëre mo Enho nakore naka. Hen zen dawem tanganna–
dekam de tawa ta gwibin hip,
oto tasïk gwibin hip,
halen ta gwibin hip,
hen ora dawem san dikim dam tasïk sone gwibin hipye.*3:16 Rom. 15:4; Ibr. 4:12
17 Alap mo nganak de syal ta gwen zini, nen de desa enhonak lone gwenkam, dekam esa anakan tame ul gwer, “Ëe kirekam asa syal gwe-gwer.” Hen banakare maesa de goltowe gwenkam, dekam nëno mae mo enlala blala sa sowehe gwera.