4
1 Timotius Bak, ëe ola ansa Alap mo nwenakë ebe hap hli yulbluꞌan– hen Kristus Yesus mo nwenak, men Zen sa zëre mo ïrïk gïnsï golhata zalake. Zen sa dekam juwen wenyaka hen nama de ëngaya gwen wenyaka klis gul zula. Zep Timotius Bak, Eirzi-Bia yawal mo nwenak ëe ama emsa gubluꞌan: 2 Alap mo olsa em tonbirida tine gwen– sap sane gwen hap de ëdwam gwennak, sap ëdwam gwen srëmnak. Emki dekam oto tasïk gwibin, hen udobe naban jalse gwibirida gwen, hen tïtï ta gwibin, hen ol sin-sinkim em dawemkam tawa ta gwibin. 3 Sap molya holo gwek, dekam sa zini anakarekam lowehe gwer:
Eiwa de tawa tabinsi de ësane gwenna sa baes tal,
hwëna zen guru-guru ësesa sa beyakam deibirida gwer.
Desa sa hwëna nenbirida gwer, “Asa ëre mae mo dwam gwibin en san tawa la gwibik.” Zep sa hëndep zëre mae mo hole-hle en san tawa da gwibir.
4 Zen dekam sa hwëna eiwa de olsa de ësane gwe-gwen hap zëno mae mo ini ëmat-mat gwizim.
Hwëna auyan-aza zik mo ëpba olsa sa srën li nul sone gwer– dekam de zëre mae mo dwam gwibin dërek san dep syan nahlan hap.
5 Hwëna Timotius Bak, emki enaka kara ta gwen. Kareksa de goltowe gwennak tatem em zauk gwen. Yesus mo bosesa de salbin srëm zi sin dep emki ëngaya gwen hap de ol dawemsa golzim halada gwen. Em Alap mo nganak de syal gwe-gwen zi, zep syala insa dawem enkam em sul sonen.
6 Sap ëe nabakam asa emsa hli tal, hen ano kala nabakam sa wet sol– men kiye, dombasa de Alap hap zïp soblanna. 7 Ëe mesë ëre mo syala sul sonek. Ëe jana zi mo kimë Yesus hup de ol dawemna golasas gwe-gwek. Yesussu de taïblïblan nakon homë mae syalhek. 8 Ëe insa kirekam tatem zauk gwek, zep angkam abe hap de mire sigina Bian man ap golkara gweblaꞌara. Yesus Zen dam-dam enkam de klis gun hup de Zini Zen. Zen kim de nësa klis guꞌun zaka, Zen dekam sa abe hap golblala. Abe en hap molya golblaka, hwëna tïngan men zen zëre mo lwa halzan hap de yaklana anakan enlala në gweblaꞌanke, “Diki nabakam zen ki lwan,” Zen zëbe mae en hap sa kap tazimdi.
Paulus kim syal betekna Timotius hup golblakake:
9 Emki dawemkam alp gwen– dekam de nabakam asa duweblazan hap. 10 Sap Demas Bak mes asa hli ta guk halka. Zen auhu-kamana ansa ensa lwa gwibiꞌira, hëndep zep Tesalonika san dep heya gweka. Ëe mesë Kreskes Baksa Galatia san dep zer sonek. Hen Titus Baksa Dalmatia san debë zer sonek. 11 Lukas Bak en hanë nama ëꞌan. Markussu kwang ta kïnzï. Sap zen aïrïs– ano tahasa de trï son hapye.*4:11 Markus in san ha zëno aha bosena Yohanis? Zen san ha men zen nonol ol dawemsa de goltën dannak Paulus ne Barnabas neka heya gwenkam hli so guk halkake? (Kis. 12:12; 12:25; 13:13; 15:37-39) 12 Ëe mesë Tikikus Baksa Efesus sun dep zer sonek. †4:12 Paulus mae hap mes yap Tikikuꞌu zer soneka: Timotius mo weinak dep de Efesusk syal gwen hap. 13 Song gwe zankam, Troask ano baju sal-sala teisya kïnzï. Karpus Bak mo golakë hli sok. Hen ano bukuna lop ta kïnzï– nonol tangan dawem-dawem wenyaka. ‡4:13 Insa “dawem-dawem wenya”kam ale gulku, Yunani olkam “tweran sopkam de buku”kam ale gulku. Kire bukuna zëno kïtak de halamanna tweran sop en nakorena. Desa te-ala mamkam kap da gwek. Zep san ha totore bukusa hom enlala gweblan daka, hwëna Alap mo ola bare naka mes yap. Aha dam gulsunnu hen: San ha bukuna in zëre mo tahakam de ale nabare naka? 14 Tembaga nakon de kire-kire yang ta gwibin hip de zini in, Aleksander Bak, §4:14 San ha Aleksander in, men zëbe hap denaka hen Nonol Timotiusnuk ale gulkuke? (1Tim. 1:19-20nak) Ahana “Aleksander”kam de bosena Kis. 19:33-34nak. Aleksander in mae hap mes yap Paulus mo tawa tabinni husus gwe-gwibirki: Sap zen tembaga nakon yang tabin dowal-dowalsa yang ta gwibirki– te-alakam de lirak ta gwibin hip. zen mes asa dawemkam karek taka. Hwëna zen sa Bian onakon hlaulu. 15 Em hen em terya-tya gweblan, sap zen sërkam nëno mae mo tawa tabinsi husus gwe-gwibiꞌira.
16 Pemerinta mo mam-mamna kim nonol asa taken-taken nëblak, dekam zini hom tangan asa nërzauk sonek. Tïngan man asa hli da gukhak. Dikire Alap zëno mae mo karekna insa tap gulsuzimk. 17 Hwëna Bian Zën zep asa golek de ta zaka, hen sosonna ap golblaka– dekam de zëre hap de ol dawemna insa sowe henkam Yahudi srëm zini insa tonbiridan hapye. Bian dekam zep asa zëno mae mo jana ngï nakon zeser soneka– ëe dikim etan ëngaya gwen hap de ol dawemna insa tïngare Yahudi srëm zi hip golluwe gwizimdin hipye. 18 Zep Bian Yesus sa tïngare zi mo jala kon asa hïl tï sone gwera, hëndep Zen sa asa drëne sera– zëre mo ïrïk gïnnïk de gwë gwen hapye. Dikire zëre mo bosena teip nulsuk gweblak– hëndep denaban! In eiwa.
19 Priskila ne Akwila neka guzim, hen Onesiforus mo golak men zen lowehe gwenan, desa kïtak anakan gubirida, “Paulus dawem ensa ep gol sonezimki.” 20 Erastus Bak Korintusk gwëka. Hwëna Trofimus Bak man sang-sang gweka, zebë Miletusk hli tak. *4:20 Erastus hup de ola emki Kis. 19:22 hen Rom. 16:23nak hlaun. Trofimus hup dena, emki Kis. 20:4 hen 21:29nak hlaun. 21 Bahem dakal gwen, ki hwëna hi ngëp tamle gwennak esa song gwe zala. Yubelus Bak, Pudes, Linus, hen Klaudia Bak dawem ensa ebe hap nol soneblak. Hen kirekam– tïngare awe de aya-wal oso wal omye.
22 Dikire Bian emsa zergwë gwek. Hen kïtak em in zen iwe lowe heꞌan, dikire Bian mo kwasang-kwasangna ebon mae onak lwa gwek.
*4:11 4:11 Markus in san ha zëno aha bosena Yohanis? Zen san ha men zen nonol ol dawemsa de goltën dannak Paulus ne Barnabas neka heya gwenkam hli so guk halkake? (Kis. 12:12; 12:25; 13:13; 15:37-39)
†4:12 4:12 Paulus mae hap mes yap Tikikuꞌu zer soneka: Timotius mo weinak dep de Efesusk syal gwen hap.
‡4:13 4:13 Insa “dawem-dawem wenya”kam ale gulku, Yunani olkam “tweran sopkam de buku”kam ale gulku. Kire bukuna zëno kïtak de halamanna tweran sop en nakorena. Desa te-ala mamkam kap da gwek. Zep san ha totore bukusa hom enlala gweblan daka, hwëna Alap mo ola bare naka mes yap. Aha dam gulsunnu hen: San ha bukuna in zëre mo tahakam de ale nabare naka?
§4:14 4:14 San ha Aleksander in, men zëbe hap denaka hen Nonol Timotiusnuk ale gulkuke? (1Tim. 1:19-20nak) Ahana “Aleksander”kam de bosena Kis. 19:33-34nak. Aleksander in mae hap mes yap Paulus mo tawa tabinni husus gwe-gwibirki: Sap zen tembaga nakon yang tabin dowal-dowalsa yang ta gwibirki– te-alakam de lirak ta gwibin hip.
*4:20 4:20 Erastus hup de ola emki Kis. 19:22 hen Rom. 16:23nak hlaun. Trofimus hup dena, emki Kis. 20:4 hen 21:29nak hlaun.