1 Yahudi zini, Alap mo golak de teipsïn hïp zen zini aha-en dam dasïk gwenan. *5:1 Suratna ansa kim ale gulku, dekam nama Musa mo tïtï tabin ola syal nei gwibik– Yerusalemk de Alap mo golakye. Zep “dam dasïk gwenan”kam suratnak awe ale gulku. Alap mo gola insa tahun tuju-pulukam Roma mo jana nabare zini dri nuk, zep hëndep dekam Alap mo golak de syala nolzausuk– hëndep angkam. Zep men zen suratna ansa ale gulku, san ha tahun 60 maekam mes yap ale gulku. Zëno syala, zen zi bose zemka de Alap hon golëyaïng gwe-gwen hap– ba maesa de Alap hap gol gweblankam. Hen zëno syala, bol-zaun tangan wenya, zen tïngare Yahudi zi mo karek-kareksa dikim tap gulsuk gwizimdin hip de sapi-kambingsi Alap hap tru tasïk gweblan hap. 2 Okamanak insa Alap mo golak de teipsïn hïp dam dasïk gwibirin, zen hen ki zi tangan. Zen zep aha zisi sae-saekam golëlowehe gwenda– tame gun srëmkam kim karekna nol gwenanye. Sap zëna hen man zënaka enlala gwe-gweblanda, “Aena hen sin-sinni.” †5:2 “Tame gun srëmkam de kareksa gonna,” zëno dam gulsunnu, zen Musa mo ahakore jalse gwen ol bete-teksa de gulmurun. Sap zëno tïtï tabin ola iwe, jalse gwen ol bete-tekna man sërkam beya gwek, zep tïngare Yahudi zini bëjen tïngan enlala gwibin. Zep ahakore ol jalse gwen bete-tekna insa tame gun srëmkam nulmun gwek. Eirim de kareksa gonna– men kiye, kahalo gwenna hen zisi de tanna, desa bëjen tame gun srëmkam syal gwibin. 3 Zen in zep nonol zëre mo karek-karekna in hap sapi-kambingni tru tasïk gwenda, ki zep hwëna aha zi mo karek-karek hap tru tasïk gwenda.*5:3 Im. 9:7 4 Hen zi bëjen zënaka dam tasïn– Alap mo golak de teipsïnkïm syal gwen hap. Zen diki Alap Zën dam tasïk gwenda– men kirekam orep Harunsu dam tasïkïke.

5 Kristus hen kirekam. Zen Zën hom Zënaka teipsïnkïm drë neka, hwëna Alap ki dam tasïkï– anakan kim gublukake,

7 Yesus kim okamanak awe nama gwëꞌanka, Zen Alap de mas gweblan hap ol mam-mamkam go naban abe ta gweka. Zen man Alapsa anakan taïblïblaka, “Zëno sosonna ki– Asa de tïn nïkon ngaya tan hap denaye.” Hen Zen man Alapsa dawemkam betek gwe-gweblaka, in zep hëndep Alap zëno abena dokwak gul gweblaka. 8 Zen sap Alap zëre mo Tane, hwëna Zen hen awe de gwënkam Alap mo zëbe hap de dwam gwibir-blin san de sul sonen hap dena anakan tawa gweka, “Ëe hen asa karekna goltowe gwer– men kirekam Bian Asa dwam gweblaꞌaraye.” 9 Zen in zep tangan Yesus in Alap mo nwenak dakastïlkï– zëre mo ngatan zi mo langnak de gol tangannak de teipsïn hïpye. In zep hëndep nëbe mae hap ëngaya gwen hap de ausuna Zëbon onak hëndep denaban lwaꞌan– nen an zen Desa ang ë gweblananye. 10 Zep Yesussu Alap zëre mo gol tangannak de teipsïn hïp dam tasïkï– in kim anakan gublukaye,

11 Yesus mo kirekam de Alap mo golak teipsïn hïp de ola nama beyana– desa de ebe mae hap golzimdin hip denaye. Hwëna ebe mae hap sa gwa-gwa gwer– desa de srip gulsuzimdinkimye. Sap em in enlala tïhïsnï. 12 Diki angkam emaka aha zisi hen Alap mo olkam tawa la gwibiꞌin. Hwëna ena hen nama tawa tabin hibe ëdwam gwe-gweꞌan, sap nonol lonesen nakon de tawa tabinni em desa home kïtak tame uꞌin. Em an wal baïzïl makane nama lowe heꞌan, zebe momkam de taïzïbin en hap ëdwam gwe-gweꞌan. Diki angkam tembane drak-draksa emaka olgwen gwibiꞌin. 13 Nama de momsa twen gwen zini, zen nama baïzïlï, zep zen hom Alap mo nwenak dikim ëdakastïn hïp dena tame nuꞌin. 14 Tembane drak-drakna zen zise gwen zi hip dena. Sap kire zini zen mes zënaka holokam tïtï da gwibik– dekam de enho drak-drakkam lowehe gwen hap. Zep zen mes karek naban dawem naban de kles so gwen hap dena tame nuk.