6
1 Zep Kristen zini nënaka de tawa ta gwibinkim bap nen tahan en san dena etan-etankam gollwa halasen gwen. Diki olk san dena kim nen nënaka tawa ta gwibin– Kristen gwennak dikim ëzise gwen hap dena kim. Zep anakare ensa bap nen gollwa halasen gwen:
Waba hap de syalsa de baes gwibin hip dena– mensa Yahudi zini tim nul gwenan, “Ëe dekon asa Alap mo nwenak dakastïl.”
Ahana, Alap ensa de taïblï gweblan hap dena,
tahasa de tehabirida inen hap dena,
hen juwen nakon de tim ëse naban luk tan hap dena,
hen Alap de karek gol gwen zisi hëndep denaban karek tabin hip dena.
Zen in kïtak nonol lonesen nakore tawa tabin. 3 Zep anik olk san dep dena insa emsa tawa tabik, sap nen ema Alapsa anakan laïblïblaꞌan, “Zen sa tame gun hup de sosonna nëbe mae hap golzimdi.”
4 Dawem! Ema kawesïn sïn dep etan lwanda halank. Sap lwan dahan wenya, desa banakan dep?– ngatan san dep de etan golëlwan dahan naye. Sap zen menkam man Alap onakore dawemna hen Alap mo Enho mo syala neisbik, 5 hen zen man Alap mo ol mo dërekna neisbik, hen sosonna men dekam esa Alap mo kama ësenak lowehe gwer, desa hen man sap dërekna neisbik. 6 Hwëna kire nik de Kristussu hli daꞌak, desa toton banakan molye ngatan san dep etan olëlwanda halzak. Sap zen de kawesïn sïn dep lwanda hankam, zëno mae mo syala in sa nwe-mase gwer– san de Alap mo Tanena Yesussu de etan saherak drë nenna kiye. Sap zëno mae mo syala in, dekam san de Yesussu de anakan tik-tik tanna kiye, “Emki etan te-lidak sonnak tïn– ano mae mo karek-karek ësena ansa ekakim tïngare zi mo nwenak ap ngan gulsuzim!”
7 Emki ëenlala gwen: Nga syal gweblannak de o ïl tï gwenkam, dekam ngana iwe de obwaga tutulkum hatankam, ki Alap man nga syal gwe-gweblan zini in han apdekam zersyal gwe-gweꞌara, hen Zen sa ngana insa sam gwesïblïla. 8 Hwëna ngana iwe de endang hatankam, ahaksa dokot të ngï-ngï, dekam Alap de kamana insa heip gun hup man golek de gweꞌan. Hen nga syal gwe-gweblan zini in sa nga zem insa syaukkum ang tala.
9 Zep ano kwasang gwibirida gwen wenya, ëe insa Biansa de hli tan hap dena ebe mae hap ale gulzim, hwëna ëe homë emsa anakan enlala gwibiridaꞌan, “Zen sa eiwa hli dal.” Sap ëe emsa anakanë taïblïbiridaꞌan, “Em mese hëndep de gwën hap dena ulink.” 10 Sap Alap Zen totoresa hom zisi gol kïnïnda gwenda. Zen molya eno mae mo syal dohon-honna mensa zëbe hap ol gweblak eititi gwibirki. Hen em mensa Zënaka enna ola gweblak, desa hen molya eititi gwibir-zimki– in kim Kristen bose wal omka kwasang eibirida gwekye. Hen em angkam namae kirekam lowehe gweꞌan.*6:10 Ibr. 10:32-34 11 Zep ëe ama tangan emsa dwam gwibiridaꞌan: Diki em kwasang hap de syala insa ayang gul song gwen– eno mae mo lowe henna men kiye. Zen dekam esa ere mae mo enhonak anakan tame ul gwer, “Ëe eiwa asa Alap Zën de nësa golëteinikirin langnak yaïng gwer.”*6:11 2Ptr. 1:8,10 12 Hwëna kire srëmkam esa ëasang-asang gwe-gwer. In zebë emsa dwam gwibiridaꞌan: Emki sap zini men zen Alapsa de taïblïblannak tatem ëzauk gwekke, desa enlala gwibirida gwen. Zep emki hen zëno mae mo kim enlala syal-syala ban tatem ëzauk gwen, sap zen mes zëwe yaïng gwek– men zëwe dep Alap nësa kïtak gu-gubirida gwekaye.
Mae hap de ol: Alap zëre mo gu-gubiridan ola bëjen wet gulsun.
13-15 Abraham Bak kirekam tatem zauk gweka, sap desa man Alap zëre mo bosesa de gubin niban anakan gu-gubluka,
“Ëe an Alap ama emsa gu-gubluꞌan, Ëe asa tangan ebe hap dawemna gol gweblal.
Eno auyan-azana zep sa tangan hëndep ëbeya gwe song gwer.”*6:13-15 Kej. 22:16-17
Zao zep Abraham ola insa de taïblïbin niban holokam eissïkï, hëndep ki zep gul inki– mensa gu-gublukaye. Zen mae hap Alapsa taïblïblaka: Sap Alap man zëre mo ol gu-gunnu insa zëre mo bosesa de gubin niban soson gulku. Sap Alap Zënaka de kwë tan hap de zini hom tangan, Zen zep zëre mo bosena gubirki.
16 Sap zini kim zëre mae mo ola soson nul gwenan, zen teipsïn zi mo bose gubin niban anakan soson nul gwenan, “Dikire Zen asa hla tak– ëe de syal gwibin srëmkamye.” Zen dekam zep aha zi ol gulsun-gulsun srëmkam anakan daïblïbirida gwenan, “Zen eiwa desa de syal gwibin hip kirekam gu-guku.” 17 Zen zep Alap hen kirekam zëre mo olsa zëre mo bose gubin niban soson gulku– Abraham Baksa kim gu-gublukaye. Sap Zen man Abraham mo auyan-tane walya nen de anakan taïblïblan hap dwam gweka, “Zëno ol gu-gunnu eiwa bëjen wet gulsun. Zen hëndep eiwa sa kirekam nëbe mae hap syal gwibir-zimdi.” 18 Zep Alap mes nëbe mae hap zao de tatem ëzaun hup dena dan-dan teisyazimki: Ahana Abrahamsa de ol gu-gublunna in zen. Ahana zëre mo bose gubin niban kim ola insa soson gulkuke. Zep Alap bëjen zëre mo ol-gun darena insa wet sosun, hen Zen bëjen boton gwen. Zen in zep, nen an zen Alapsa ëngaya gwen hap yaïng ëbla kïnïꞌan, ol-gun darena insa de kyang-kyang sosun nuban esa ngalap gwen srëmkam tatem ëzaul.
19 Zep zëwe en de tatem ëzaun hup dena in, zen buluk de jangkal makan zen nëbe mae hap lwazimdin, sap Alap bëjen boton gwen. Zen zebe angkam aïrïn srëmkam ol gu sonenkam Alap zëre hon yaïng gwe-gweꞌan– zëre mo ngatan zi mo langnak de gol mwa tangannakye, men zëwe orep deyol glaïng-glïng lïlïkïnnï ïl nïl sone gwekye. Sap menkam zini zao bëjen yaïng gwen. Dekam orana tayalsïn nik lwa gweka– men kirekam hen Alap mo okamanak de gol mwanak hen deyol glaïng-glïngnï lïlïkïnnïk ïl nïl sone gwenanke. 20 Hwëna angkam desan dep de orana Yesus mes nëbe mae hap sal tazimki. Zen zep nëbe mae hap nwe-mase gweꞌara– Alap mo golak de teipsïn tanganna, Melkisedek Bak mo kim de teipsïn hïp. Hen Zen dekon sa hëndep denaban nësa mas gwibirida gwera.
*6:2 6:2 “Zisi de baptis ta gwibin hip dena,” awe Yunani olkam hom “baptisan”kam ale gulku, hwëna “baptisan-baptisan”kam ale gulku. Zep zëno dam gulsunnu aha-ere baptis tabinsi hom, hwëna beyana. Baptis tabinsi de aïtbinni zen anakan: Kristen gwennak de zisi baptis ta gwibin hip dena, hen Yahudi zi mo weyakam de timsi ngan gulsun hup dena, hen Alap mo Enho de nësa hlë tabiridan hap dena. Zep “baptis ta gwibin hip dena,” desa bëjen anakan enlala gwibin, “An nen de nëre mae mo kareksa dikim ngan gulsun hup etan-etankam ëbaptis gwen hap dena.”
*6:10 6:10 Ibr. 10:32-34
*6:11 6:11 2Ptr. 1:8,10
*6:13-15 6:13-15 Kej. 22:16-17