2
Laahiriana Isa
2:1-7
(Mat. 1:18-25)
1 Inda amangenge sapadhana Yahya alaahiri, Kaisar Agustus apalimba parinta mamudhaakana raʼeatina bhari-bharia lipu pamarintana Roma adaftaraaka karona to sensus. 2 O siimo wakutuuna to daftaraa bhaa-bhaana ipadhaangiana wakutuuna Kirenius amembali gubernuru i Poropinsi Siria. 3 Bhari-bharia mia wakutuu incia sumai alingka adaftaraaka karona i kampona samia-samia.
4 Mboo sumai uka, Yusuf alingka minaaka i kampo Nazaret Poropinsi Galilea tee aporope i kampo Bait Lahim Poropinsi Yudea, lipu laahiriana Raja Daud. Yusuf alingka i Bait Lahim sumai roonamo incia siwuluna Raja Daud. 5 Incia alingka to adaftaraaka karona apobhawa tee Siti Mariam, poraena motangasaana abhawa-bhawa.
6 Wakutuuna manga dhaangia i Bait Lahim, akawamo henggana Siti Mariam bheakoana. 7 Incia apalaahiri samia ana umane, o tumpena. Anaana sumai akomutia tee kae kasiimpomo apadhongia i dhingkanana kandeana binata, roonamo inda dhaangia kamarana tamu to manga incia.
Manga Gembala
2:8-20
8 Inda maridho minaaka i Bait Lahim sumai i tana mokorumpu, dhaangia pia mia gembala mojaganina dumbana manga wakutuuna malo sumai. 9 Saanampuu samia malaaʼekatina Kawasana Opu akakaromo i saripina manga tee caheana momuliana Kawasana Opu atilamea manga tee amaekamo mpuu. 10 Maka o malaaʼekati sumai apogau, "Bholi umaeka! Iaku kubhawa Lele Malape to ingkomiu, kaunde-unde maoge to saangua lipu. 11 Eo sii alaahirimo i kotana Raja Daud samia Mopasalaamatina ingkomiu, sarona Al Masi,*2:11 Al Masi dhaangia sarona minaaka i pogauna Ibrani "Mesias." Maʼanana Mesias "mia iminakina bhaana." Mia sumai bhaana aminakia to tandana asahamo Kawasana Opu to ambembali raja atawa nabiina atawa imamuna. Kawasana Opu. 12 O siimo tandana: ingkomiu bheukamata samia anana akumutiakea kae, apadhongia i dhingkanana kandeana binata." 13 Sanampuu atokamatamo akawamo sarombonga maoge malaaʼekati suludaduna sorogaa apobhawa-bhawa tee malaaʼekati sumai. Manga incia apujimo Aulataʼala tee apogau,
14 "Kamuliangi to Aulataʼala i sorogaa momalanga!
Tee i bhawona dunia, adhadhi apomalape to manga mia mopasanaana incana Aulataʼala."†2:14 Dhaangia uka manga kaburi momangenge motoburina "Kasanaa i bhawona dunia, tee rahumati to manga mia."
15 Sapadhana manga malaaʼekati sumai abholi manga incia tee ambuli i sorogaa, manga gembala sumai apogaumo samia tee mosagaanana, "Maimo talingkaaka i Bait Lahim takamataaka bhari-bharia momembalina, mboomo ipakawaakana Kawasana Opu i ingkita." 16 Manga incia alingka apekadhei apokawaaka Siti Mariam tee Yusuf tee anana sumai tangasaana apadhongia i dhingkanana kandeana binata. 17 Wakutuuna manga gembala akamata anaana incia sumai, manga incia apetulatulaakamo opea ipogauakana manga malaaʼekati to anaana sumai. 18 Bhari-bharia mia morangona tulatulana manga gembala sumai aposamentemo. 19 Maka o Siti Mariam adhikaia bhari-bharia sumai i nuncana ngangarandana tee afikifikirimea. 20 Kasiimpomo manga gembala sumai ambulimo apuji tee amuliangi Aulataʼala roonamo bhari-bharia arangomea manga tee akamatea, apokana mboomo ipogauakana malaaʼekati sumai.
Isa Atandakia tee Apasaraakaakea i Kawasana Opu
Simeon tee Hana Apokawa tee Isa
2:21-40
21 2:21 Luk. 1:31.Sapadhana walu eo umuruna, akawamo wakutuuna anaana sumai atandakia. Tee manga incia asarongiakemea Isa, o sarona kadhawuna malaaʼekati to Incia wakutuuna Siti Mariam indapo abhawa-bhawa.
22 Pata pulu eo sapadhana Isa alaahiri, akawamo wakutuuna Yusuf tee Siti Mariam apewau adatina kangkilo mboomo Hukumuna Nabii Musa. Kasiimpomo manga incia abhawamo Isa i Yerusalem to apasarakaaka Incia i Kawasana Opu. 23 2:23 Limb. 13:2; 13:12.(Sababuna i nuncana Hukumuna Kawasana Opu padhamo atoburi mboo sii, "Bhari-bharia ana umane tumpe bheapekangkiloa to Aulataʼala.") 24 Jadi wakutuuna manga incia iwe sumai, manga incia apasiapuakamea kurubani mboomo ifirimaniakana i nuncana Hukumuna Kawasana Opu, "Sapasa manu-manu bhokuru atawa rua mbaa manu-manu jarajara."
25 Wakutuu incia sumai i Yerusalem dhaangia samia umane sarona Simeon. Incia mia mobanara tee asaalihi, moantagina wakutuuna Aulataʼala bheapasalaamati lipu Israel roonamo Rohina Aulataʼala Momangkilona apobhawa-bhawa tee incia, 26 tee padhamo apaumbaakea to incia kooni indapo bheamate ande indapo akamata Al Masi, Raja Mopasalaamatina ijanjiakana Kawasana Opu. 27 Jadi wakutuuna Siti Mariam tee Yusuf abhawa Isa i aroana Baitulla to apasaraakaaka Isa i Kawasana Opu mboomo Hukumu Taurati, Rohina Aulataʼala abhoku ngangarandana Simeon mamudhaakana apesuamo porikana i aroana Baitulla. 28 Simeon asangomo Anaana sumai kasiimpo apujimo Aulataʼala.
29 "Sii-sii, Kawasana Opu udhanimea janjimu tee iaku.
Roonamo itu, taroakamea bhatuamu sii amate tee kasanaa, siitumo atumpumo incaku.
30 Tee karoku padhamo kukamatea tuaapa Ingkoo bheupasalaamati uumatimu,
31 tee tuaapa Ingkoo bheupasalaamati manga mia minaaka i bhari-bharia lipuna.
32 Anaana sii mboomo kainawa bhemosuluwina manga lipu mosagaanana mencuana lipu Israel,
tee Anaana sii moumbaakana kamuliana to uumatimu Israel."
33 Amana tee inana Anaana sumai amentemo arango opea ipogauakana Simeon to Isa. 34 Kasiimpo Simeon abarakatimo manga incia tee apogau i Siti Mariam, o inana Anaana sumai, "Satotuuna Anaana incia sii ipilina Aulataʼala to mopabinasana tee mopasalaamatina mia bhari i Israel. Moomini Inciamo saangu tanda ilambokona Aulataʼala, mia bhari bheamendeua. 35 Tee mboo sumai atobungkaleaka antona ngangarandana mia bhari. Tee uka bheaumba kapiina incamu mboomo tobho momatadha atobhoki inyawamu karomu."
36 Iwe sumai dhaangia uka samia nabii bhawine sarona o Hana, anana Fanuel, minaaka i lipu Asyer. Incia momatuana mpuu umuruna. Sapadhana pitu tao kawina, 37 Hana amembalimo iaiaro, tee o umuruna walu pulu pata tao. Incia sadia i Baitulla, malo eona incia asambahea i Aulataʼala tee apoasa tee adoʼa. 38 Wakutuu incia sumai uka aumbamo Nabii Hana iwe sumai tee aemani sukuru i Aulataʼala tee apogauaka Anaana sumai i bhari-bharia mia motangasaana moantagina wakutuuna Aulataʼala alamboko Al Masi to apabebasiaka Yerusalem‡2:38 Kota Yerusalem i aeati incia sii maʼanana o lipu Israel. Wakutuu incia sumai, lipu Israel aparintangia Pamarintana Roma. Raʼeatina Yahudi aantagi samia mopabebasina miana Israel minaaka i Pamarintana Roma..
39 2:39 Mat. 2:23.Sapadhana Yusuf tee Siti Mariam apewau bhari-bharia sarana Hukumuna Kawasana Opu, manga incia ambulimo i kampona i Nazaret i Poropinsi Galilea. 40 Anaana sumai ajulumo amaoge tee amakaa. Incia abukeaka hikimati tee rahumatina Aulataʼala dhaangia i karona.
Isa I Wakutuu Umuruna Sapulu Rua Tao i Aroana Baitulla
2:41-52
41 2:41 Limb. 12:1-27; Kap. 16:1-8.Satao-satao mancuanana Isa alingka i Yerusalem to araraeaaka Paska.§2:41 I zamanina Isa, raʼeatina Yahudi araraeaaka Paska roonamo Kawasana Opu atumpu manga incia araraeakea satao-satao wakutuuna Incia apabebasia manga minaaka i tana Mesir wakutuu manga apabhatuaia. Jadi i malona Paska manga incia tabeana akurubaniaka sambaa dumba tee akandea o dumba sumai i Yerusalem. 42 Tee wakutuuna Isa akoʼumuru sapulu rua tao, manga incia alingka i Yerusalem mboomo sumai kananeana manga apewau ande eona raraeana Paska. 43 Sapadhana raraea sumai ambulimo manga, maka Isa dhaangiapo amboore i Yerusalem, sainamo inana tee amana inda amataua. 44 Roonamo manga incia afikiria ande Incia dhaangia i tanga-tangana manga mia sapobhawana. Sapadhana alingka saeoa, manga incia apeelomea Isa i tanga-tangana manga witinaina tee manga musirahana. 45 Roonamo manga inda apotibhaakea Isa iwe sumai, kasiimpomo manga ambuli pendua i Yerusalem tee apeelo Incia. 46 Kamondona talu eo, manga incia apotibhaakamo Isa i aroana Baitulla. Incia tangasaana akatoro-toro iwe sumai i tanga-tangana manga guru agama, apoose aperangoi manga incia tee adhawuakea kaabhaki-kaabhaki i manga incia. 47 Bhari-bharia mia morangona pogauna Isa aposamentemo roonamo kakidhana tee kalawanina ibhoasakana. 48 O amana tee inana sakamatana Incia atokidhamo. Kasiimpomo Siti Mariam aabhaki Incia, "Pokia upekarasai ingkami, Anaku? Pia eo sii iaku tee amamu tameri tapeeloko." 49 Isa alawani, "Pokia Uma tee Ina upeelo Iaku? Buaka uma tee ina inda umataua Iaku tabeana dhaangia i nuncana bhanuana Amaku?" 50 Maka manga incia inda amaʼanaia opea ipogauakana Isa. 51 Kasiimpomo Isa ambuli tee manga incia i kampo Nazaret tee Incia sadia ataʼati i manga mancuanana. Maka inana adhikaia bhari-bharia giu incia sumai i nuncana ngangarandana.
52 Isa sii juluna eo, julu amaoge, julu abukeaka hikimati, julu amaasiakea Aulataʼala tee uka maanusia.
*2:11 2:11 Al Masi dhaangia sarona minaaka i pogauna Ibrani "Mesias." Maʼanana Mesias "mia iminakina bhaana." Mia sumai bhaana aminakia to tandana asahamo Kawasana Opu to ambembali raja atawa nabiina atawa imamuna.
†2:14 2:14 Dhaangia uka manga kaburi momangenge motoburina "Kasanaa i bhawona dunia, tee rahumati to manga mia."
2:21 2:21 Luk. 1:31.
2:23 2:23 Limb. 13:2; 13:12.
‡2:38 2:38 Kota Yerusalem i aeati incia sii maʼanana o lipu Israel. Wakutuu incia sumai, lipu Israel aparintangia Pamarintana Roma. Raʼeatina Yahudi aantagi samia mopabebasina miana Israel minaaka i Pamarintana Roma.
2:39 2:39 Mat. 2:23.
2:41 2:41 Limb. 12:1-27; Kap. 16:1-8.
§2:41 2:41 I zamanina Isa, raʼeatina Yahudi araraeaaka Paska roonamo Kawasana Opu atumpu manga incia araraeakea satao-satao wakutuuna Incia apabebasia manga minaaka i tana Mesir wakutuu manga apabhatuaia. Jadi i malona Paska manga incia tabeana akurubaniaka sambaa dumba tee akandea o dumba sumai i Yerusalem.