17
Atopajere Moomini Inda Asala
17:1-15
1 Doʼana Daud.
E KAWASANA OPU, maasangia uperangoi parakara mobanara.
Tilikia o goraku!
Perangoia o doʼaku,
molimbana minaaka i bhiwiku mojujuruna sii.
2 Taroakamo kambotuna parakaraku aumba minaaka i Ingkoo,
roonamo matamu akamata kabanara.
3 Ande Ingkoo uuji ngangarandaku,
tee uumba utilikiaku i wakutuuna amalo,
ande uujiaku mboomo mia moujina bulawa,
sumaimo Ingkoo inda bheupotibhaaka kadhaki i nuncana karoku.
Iaku padhamo kuneati
mamudhaakana inda kubhoasaka manga pogau mosala, mboomo ipewauna manga mia mosagaanana.
4 Alaloi firimani ipakawaakamu,
iaku padhamo kujagani karoku minaaka i dhalana manga mia mopewauna kasega.
5 Bhengkalaku sadhaadhaa aose dhalamu,
tee o aeku inda asindoli.
6 Iaku kugora i Ingkoo
roonamo Ingkoo bheulawaniaku, e Aulataʼala.
Perangoiaku,
rangoa manga pogauku.
7 Susuakaaku o kaasimu molagina inda momentela sumai!
Lima kaanamu*17:7 lima kaanamu: Ibaratina kuasana Aulataʼala mopapeuluna tee mopasalaamatina maanusia. mopasalaamatina manga mia mopeuluna i Ingkoo minaaka i musuna.
8 Jaganiaku mboomo opea imaasiakamu,
jaganiaku mboomo inana manu-manu mojaganina anana i nuncana panina
9 minaaka i mia madhaki bhemopabinasaaku,
siitumo manga musu molibuaku to mopekamateaku.
10 Manga incia inda tee kaasina incana,
tee abhoasaka pogau mosombo.
11 Sii-sii manga incia aose bhengkalaku to alibuaku,
apeelo dhala to arambitakaaku i tana.
12 Manga incia mboomo singa mopapakina kinandena,
mboomo singa mangura mopekantaana i tampa momalino.
13 E KAWASANA OPU, bhangumo.
Poaroakamea tee upekatalomea manga incia!
Pasalaamatiaku tee ewangamu minaaka i manga mia madhaki,
14 e Kawasana Opu, pasalaamatiaku tee limamu minaaka i manga mia madhaki,
minaaka i manga mia soo mofaduliakana harataana dunia.
Maka pekambosua manga mia imaasiakamu.
Maasangia manga anana atumpu incana
tee abholi tinaurakana to manga siwuluna.
15 Roonamo kubanara, iaku bhekutonto roumu,
tee wakutuuna kubhangu, bheatumpu incaku roonamo kudhaangiapo i saripimu.