Kitabi Momangkilona Wolio ZABURU 18

Lagu Kasukuruna Daud

18:1-51

1 To kapalana molaguna. Minaaka i bhatuana KAWASANA OPU, siitumo o Daud, mopakawaakana lagu incia sii to KAWASANA OPU, wakutuuna KAWASANA OPU arambasaka Daud minaaka i limana Saul tee minaaka i manga musuna. Incia apogau,

2 "Iaku kumaasiakako, e KAWASANA OPU, kakaaku!

3 KAWASANA OPU mboomo kabumbuna bhatuku, bente potaangiaku, tee mopabebasiaku.

Aulataʼala isombaku mboomo gunu bhatu, tee kupeulu i Incia.

Incia o katangkesiku, mopasalaamatiaku minaaka i musuku, tee o tampana peulusaku mamudhaakana sadia kuʼamani.

4 Iaku kugora i KAWASANA OPU molaengana ipuji,

tee Incia apasalaamatiaku minaaka i manga musuku.

5 Manga jari imateaka arimpuaku,

tee akangkanaiaku uwena mawa maoge mopabinasaaku,

6 Rabutana duniana mia mate arimpuaku,

tee manga katapu imateaka atotaa i aroaku.

7 I nuncana kasukara iaku kugora i KAWASANA OPU,

tee kupekee kuemani tulungi i Aulataʼalaku.

Incia arango suaraku minaaka i Baitullana,

tee o pekeeku i Incia akawa i talingana.

8 Sumaimo o alamu akohudha tee akolendu,

manga gunu uka atorende tee akohudha roonamo pamuruna Aulataʼala.

9 Ombu alimba minaaka i angona,

waa alimba minaaka i ngangana,

weona waa akarore-rore.

10 Laiana awetaia, kasiimpo Incia asapo

tee taʼina ngalu malalanda i tambena aena.

11 Incia asawi i malaaʼekati kerub* kasiimpo apolaka,

atinti tee asawi i bhawona ngalu.

12 Incia abuniaka karona tee kalalanda,

tampana mbooresana satotuuna o wao momalalanda tee taʼina ngalu momakapa i laiana.

13 Minaaka i cahea i aroana,

waona esi tee weona waa alimbamo minaaka i manga taʼina ngaluna.

14 KAWASANA OPU apakoguntu i laiana,

tee Aulataʼala Momalanga apaperangoiaka suarana i tanga-tangana waona esi tee weona waa.

15 Incia arambasaka manga panana tee apapogaa-gaa musuna,

bhibhito apokilati sabutuna manga incia apalai amantale.

16 Tambena tawo atokamata roonamo tawo amatuu,

tee atokamatamo fondasina alamu

roonamo kagorampangimu, e KAWASANA OPU,

tee roonamo poinuncana angomu.

17 KAWASANA OPU apaulu limana minaaka i kalangaana tee apasalaamatiaku,

Incia ahelaaku minaaka i uwena mawa imateaka.

18 Incia apasalaamatiaku minaaka i musuku momakaana

tee minaaka i manga mia mobanciaku,

roonamo musuku amarasai mpuu kutaloa.

19 Manga incia ahumbuniaku i wakutuuna kusukara,

maka KAWASANA OPU motulungiaku,

20 Incia apalimbaaku minaaka i kaseke tee abhawaaku i tampa momalalesa,

tee apasalaamatiaku roonamo amaasiakaaku.

21 KAWASANA OPU amalape tee iaku apokana tee kabanaraku,

Incia abalasi pewauku, apokana tee kangkilona limaku

22 roonamo iaku sadhaadhaa kutaʼati parintana KAWASANA OPU

tee inda kupewau madhaki i Aulataʼalaku.

23 Bhari-bharia hukumuna dhaangia i aroaku,

tee iaku inda kupekaridho minaaka i manga katotapuna.

24 Iaku inda kupewau madhaki i incia,

tee kujagani karoku minaaka i kasalaha.

25 Sumaimo KAWASANA OPU abalasi pewauku mobanarana

roonamo kumangkilo i aroana.

26 I mia motaʼati, Ingkoo ususuakea kaasimu molagina

tee i mia momalape, Ingkoo umalape.

27 I mia momangkilo, Ingkoo umangkilo,

maka Ingkoo uewangi mia momadhakina incana.

28 Ingkoo mopasalaamatina uumati motopisaki,

maka o mia mosombo upekaeaia.

29 Ingkoo mopakatana suluku,

KAWASANA OPU, Aulataʼalaku, mosuluwina kalalandaku.

30 Satotuuna roonamo Ingkoo, iaku kumembali kuewangi gorombola musuku

tee kumembali kukompasi rindina bentena.

31 Pewauna Aulataʼala sadia amalape,

tee firimanina KAWASANA OPU atouji.

Incia o katangkesi to bhari-bharia mia

tee amasanaamo mia mopeuluna i Incia.

32 Sababuna tangkanamo KAWASANA OPU o Aulataʼalata,

soomo Aulataʼala peulusata.

33 Aulataʼala mopekatangkaaku,

tee aparatea o dhalaku mamudhaakana kuʼamani.

34 Incia apekatangka aeku mboomo aena rusa mamudhaakana kumadhei kubuntuli,

tee ajagani kasalaamatiku i gunu.

35 Incia aadhariakaaku carana potimbe,

sabutuna amembali kupaubhe pana tambagaku.

36 Ingkoo katangkesiku tee mopasalaamatiaku,

tee kuasamu iaku kuʼamani,

tee kalapemu kumembali kumakaa mpuu.

37 Ingkoo upekaewa dhala to bhengkalaku,

tee aeku inda asindoli.

38 Iaku kupajere manga musuku, tee kurako manga incia,

Iaku inda bhekumbuli ande manga incia inda atopepadhai.

39 Kupahancurua manga sakawana inda amembali abhangu pendua,

tee kupatobhatea i aroaku.

40 Ingkoo udhawuaku kakaa to kupotimbe,

roonamo Ingkoo iaku amembali kutalo manga musuku.

41 Ingkoo upewau manga musuku apalai minaaka i iaku,

manga mia mobanciaku kupabinasea.

42 Manga incia apekee aemani tulungi maka inda dhaangia mopasalaamatia.

Manga incia apekee i KAWASANA OPU,

maka Incia inda alawani.

43 Kupahancurua manga mboomo ngawu ipolakaakana ngalu,

tee kulandakia manga mboomo tomba i dhala.

44 Ingkoo upabebasiaku minaaka i raʼeati modorohaka,

Upamembaliaku mokuasaina manga lipu.

Tee lipu inda imatauku amembali bhatuaku.

45 Manga incia arango tee ataʼati parintaku.

Manga mia dhaga uka asomba tee arengku i aroaku.

46 Manga mia dhaga ailamo kabaranina,

tee arengku alimba minaaka i bente potaangiana.

47 Iaku kumataua ande o KAWASANA OPU adhadhi! Bhari-bharia kapujia to peulusaku!

Muliangia o Aulataʼala, mopasalaamatiaku!

48 Aulataʼala motulungiaku kutalo manga musuku,

tee manga lipu kukuasaia.

49 Incia mopasalaamatiaku minaaka i manga musuku.

Satotuuna, Ingkoomo mopekalangaaku minaaka i musu moewangiaku

tee upasalaamatiaku minaaka i mia momasega.

50 Sababuna sumai, iaku bhekusukuru i Ingkoo, e KAWASANA OPU, i tanga-tangana manga lipu,

tee iaku bhekulaguaka kapujia to saromu.

51 Aulataʼala adhawuaka kasalaamati momaoge to raja ipilina,

tee asusuaka kaasina molagina i mia ilantina,

siitumo o Daud tee siwuluna to saʼumurua.

18:1 18:1-51 2Sa. 22.

*18:11 18:11malaaʼekati kerub: Malaaʼekati igambaraaka mboomo mahaluku mokopani, agambaraaka kalangana Aulataʼala tee umbaana. Apogauakea ande kauncuramakana KAWASANA OPU dhaangia i bhawona manga malaaʼekati kerub. Dhaangia patuna rua malaaʼekati kerub i bhawona sorongana pojanjia tee i piamo itu Musa atarima firimanina Aulataʼala minaaka iwe sumai. Kamata Limb. 25:18-19.

18:50 18:50 Rom. 15:9.