143
Doʼa Emaniana Kasalaamati minaaka i Musu
143:1-12
1 Zaburuna Daud.
Maasangia urangoa o doʼaku, e KAWASANA OPU!
Perangoia iemaniku roonamo umembali utoparacaea;
lawaniaku i nuncana kabanaramu.
2 143:2 Rom. 3:20; Gal. 2:16.Bholi ubhawa bhatuamu i pangadila,
roonamo inda dhaangia mia inda mosala i aroamu.
3 Musuku apajereaku tee apatidhomuaku i tana;
incia adhikaaku i tampa momalalanda mboomo mia momangengena momate.
4 Sababuna sumai, amate akalaku,
tee ngangarandaku ameri mpuu.
5 Kutoudhanimo tee zamani momangenge,
iaku kuudhania bhari-bharia ipewaumu,
tee kufikiria bhari-bharia ipadhaangiamu.
6 Iaku kuangka limaku tee kudoʼa i Ingkoo,
ngangarandaku apemeliliakako mboomo tana matuu apemeliliaka wao.
Sela
7 E KAWASANA OPU, maasangia ulawaniaku madhei,
roonamo amatemo akalaku.
Bholi ubuniaka karomu minaaka i iaku
mamudhaakana iaku inda mboo manga mia mosapona i duniana mia mate.
8 Parangoakaaku kaasimu molagina i wakutuu saeona,
roonamo kuparacaea i Ingkoo.
Susuakaaku dhala bheilaloiku,
roonamo i Ingkoomo kupasaraaka ngangarandaku.
9 E KAWASANA OPU, pasalaamatiaku minaaka i manga musuku,
i Ingkoomo tampaku kupalai to kupeulu.
10 Adhariaku kupewau opea ipeelumu,
roonamo Ingkoomo Aulataʼalaku.
Taroakea o rohimu momalape sumai
akapalaiaku i tana morata.
11 E KAWASANA OPU, padhadhiaku roonamo saromu,
tee i nuncana kabanaramu pasalaamatiaku minaaka i kanarakaa.
12 Roonamo kaasimu molagina, pahancurumea manga musuku,
tee pabinasamea bhari-bharia mia mopanarakaaku
roonamo iaku o bhatuamu.