144
Lagu Kasukuruna Raja
144:1-15
1 Zaburuna Daud.
Atopujimo KAWASANA OPU o gunu bhatuku,
moadharina limaku to apotimbe tee kauna limaku to apoewangi.
2 Incia momaasiakaaku saʼumurua tee o bente potaangiaku,
kota benteku tee mopabebasiaku.
Incia o katangkesiku, Incia o tampana peulusaku,
Incia apekatalo manga lipu tee adhikaia i tambena kuasaku.
3 144:3 Zab. 8:5.E KAWASANA OPU, incema buaka o maanusia sumai mbakana uudhania?
Incema buaka o maanusia sumai mbakana ufaduliakea?
4 Maanusia sumai mboomo wiina ngalu,
tee o umuruna mboomo ngkamia-mia molalo.
5 E KAWASANA OPU, bungkalemea o laianamu tee usapomo,
dhingkumea manga gunu mamudhaakana akoombu.
6 Pasapomea o bhibhitomu mamudhaakana o musu apogaa-gaa,
rambasakamea o panamu mamudhaakana manga incia amambura.
7 Paulumea o limamu minaaka i kalangaana;
pabebasiaku tee upasalaamatiakumo minaaka i uwena mawa,
tee minaaka i limana manga mia dhaga!
8 Manga incia kapeeluana apekatipu,
tee agau-gau wakutuuna aposumpa.
9 Iaku bhekulaguakako lagu bhaau, e Aulataʼala,
tee bhekulaguakako manga lagu kapujia poose kutikiakako gambusu sapulu taliana.
10 Ingkoo modhawuna kamangantalo to manga raja,
tee upasalaamati Daud o bhatuamu.
11 Rambasakaaku minaaka i hancuna mia masega,
pasalaamatiaku minaaka i kuasana manga mia dhaga.
Manga incia kapeeluana apekatipu,
tee agau-gau wakutuuna aposumpa.
12 Maasangia manga anata umane
mboomo penembula motuwuna amembali amaoge,
tee manga anata bhawine
mboomo manga arii makesa
mobhelokina manga singkuna malige.
13 Maasangia manga kampirita abukeaka
sagala giu hasilina alamu;
maasangia manga dumbata i tana mokorumpu amembali rewuna mbaa,
tee ajulu o kabharina amembali puluna rewu mbaa o kabharina.
14 Maasangia manga sapita ahanda ajulu o kaogena badana
tee inda dhaangia momadhakina i nuncana kadhumana atawa amambuu.
Tee inda atorango suara motomaporoakana inca i dhalana manga kotata.
15 Amasanaamo o lipu ibarakati mboo sumai!
Amasanaamo mpuu o lipu mosombana i Aulataʼala, siitumo mosombana i KAWASANA OPU.