1 Sambi, cakwanza kábula ya vinu piya, nukutafadali kuwa wanu watende duwa ka fadili ya wanu piya: walebele vyawasakula, wawalebelele wanu wengine, na washukuru. 2 Walebeleleni mafalume na piya wenye mamulaka ipate tiwe nawo mainsha a kutengemana na a usalama, kwa kutenda vyaasaka Mwenyezimungu na kwa kwiinshimiwa. 3 Duwa kamba eyi ndi kinu cema cakusakikana mbere ya Mwenyezimungu Nvushi wetu. 4 Iye asaka kuwa piya wanu wavushiwe na walawirire kuwa wejiwifu wa ukweli. 5 Kawapo Nlungu mmoja tu basi, na kawapo mwenyé kupatanisa mmoja tu basi ari na uwezo wa kuwalunganisa wanadamu na Mwenyezimungu, Almasihi Insa, binadamu. 6 Iye karipereka mwanyewe awe maripo*Ona Maruku 10:45. kwa ajili ya piya wanu. Ewu ndi ushahidi kwa wakati wake. 7 Kwa nowu ushahidi‑wu, omi nitondoriwa niwe mwerezi na walii (silongopa, nisema kweli), niwe mwanlimu wakufunda kwamini kakweli ka wanu Sawari-Mayahudi.

8 Basi, vinajibu kuwa wanawalume walebele duwa, walamuse makono matakatifu†Ona Zaburi 24:4., kila mahala mwawajumana kumwabudu Mwenyezimungu, watende javi bila kukimiwa wala kukaidiyana. 9 Novyo-novyoni, vinajibu kuwa, pawajumana wenye kwamini, wanawaka warisitawize na mavazi akwinshimika, akuwawaiza bila kuwashonga wenziwawo. Wasirisitawize kupakasa nywiri vyakuzidisa‡Tabiya za nowo wakati‑wo, kupakasa nywiri íkiwa alama ya ureba., wasirisitawize na oru wala bwara wala nguwo gali kuzidisa, 10 warisitawize kamba wafulati wa Mwenyezimungu kwa vitendo vyema.

11 Mwanamuka paafundiwa, ajuzi anyamare na piya namuna zakurinyenyekeya. 12 Simwasa mwanamuka kufunda wala kuwa na mamulaka julu ya mwananlume, fala ajuzi anyamare. 13 Ntanzi kumbiwa ndi Adamu, ikisa akumbiwa Hawa. 14 Âtesiwe na Ibilisi siyo Adamu, ila mwanamuka, neye akikola dambi. 15 Novyo-sivyo, wanawaka wavushiwa wakitenda viwalazimire, anta pawawapongola wana§Paulu akiwakaidi wanlimu walongo wakamba kuwa aipo nafasi ya kuvushiwa ikiwa wankulombiwa na wankuwapongola wana., wakizidi kolota kwamini, pendo, na utakatifu, kwa namuna vyavijuzi.