13
Pooli na kaanɩ Korɛntɩ tiinǝ bam te o ma kweeli tɩn
Amʋ na lagɩ a ba abam te lele tɩn, kʋ laan lagɩ kʋ kɩ kuni bɩtɔ mʋ. Wɛ tɔnɔ kʋm nan tagɩ kʋ wɩ: «Nɔɔnʋ na lagɩ sɩ o saŋɩ o doŋ, kʋ maŋɩ sɩ nɔɔna bale naa batɔ mʋ taa yɩ o maana tiinǝ.» Kʋntʋ ŋwaanɩ amʋ daa ta lagɩ a kaanɩ abam balʋ dɛɛn na maŋɩ á kɩ lwarɩm tɩn dɩ balʋ na daarɩ tɩn maama, sɩ á lǝni á wʋrʋ dɩ á kǝm-balwaarʋ tɩm. Amʋ daama na wʋ abam tee nɩ tɩn, a maŋɩ a kaanɩ abam kʋntʋ. Amʋ nan daa tǝri abam tee nɩ lele kʋntʋ, yɩ a lagɩ sɩ a ta kaanɩ abam, sɩ kʋ kɩ kuni bɩle. Kʋntʋ ŋwaanɩ, taá ye-na nɩ, amʋ na joori a ba sɩ a na abam, nɔɔnʋ wʋlʋ maama daa ta na wʋ zagɩ o kikiǝ tɩn bá lu. Kʋntʋ mʋ abam wʋ́ lwarɩ nɩ kʋ sɩɩnɩ kʋ yɩ Zezi Krisi kwǝrǝ mʋ a jɩgɩ a ŋɔɔna, nɩ abam na maŋɩ á lagɩ sɩ á lwarɩ te tɩn. Zezi na kɩ abam te tɩn ba brɩ nɩ o bwǝnǝ, o brɩ o dam mʋ abam tɩtarɩ nɩ. Kʋ nan yɩ cɩga, o sɛ o tu o tɩtɩ o ji nabwǝm yɩ ba pa-o tʋʋn-dagara baŋa nɩ. Kʋ daarɩ o laan nan jɩgɩ ŋwɩa Wɛ dam dɩm ŋwaanɩ mʋ. Dɩbam na yɩ o nɔɔna tɩn, dɩbam dɩ bwǝnǝ mʋ, dɩ́ nan na ŋwɩ dɩd-o tɩn, dɩ́ na wʋ́ kɩ te dɩ abam tɩn yɩ Wɛ dam dɩm ŋwaanɩ mʋ.
Abam nan maŋɩ sɩ á maanɩ á tɩtɩ mʋ á nii, á jɩgɩ wʋ-dɩdʋa dɩ Zezi na. Abam na maanɩ á tɩtɩ kʋntʋ, á bá lwarɩ nɩ Zezi Krisi wʋra dɩ abam na? Naa kʋ yɩ abam maŋɩ á tɩtɩ mʋ yɩ á maŋɩ á ga? Amʋ nan jɩgɩ tɩɩna sɩ á maanɩ á lwarɩ nɩ dɩbam sɩɩnɩ dɩ́ yɩ Zezi Krisi tɩntʋŋna mʋ. Dɩ́ yǝni dɩ́ loori Wɛ dɩ́ pa abam, sɩ á yɩ taá kɩ lwarɩm mʋ. Kʋ daɩ nɩ dɩ́ lagɩ sɩ dɩ́ brɩ nɔɔna mʋ nɩ dɩ́ yɩ Zezi tɩntʋŋna. Dɩ́ nan lagɩ sɩ á taá kɩ kʋlʋ na lana tɩn mʋ, dɩ nɔɔna na maŋɩ ba brɩ nɩ dɩbam mʋ tʋŋɩ dɩ́ ga dɩ. Dɩbam bá sɛ sɩ dɩ́ kɩ kʋlʋ na wʋ́ cɔgɩ Wɛ cɩga kam tɩn, dɩ́ wʋ́ ta kɩ te na wʋ́ zǝni-ka tɩn mʋ. Abam na jɩgɩ Wɛ dam dɩm, yɩ dɩbam na maŋɩ dɩ́ bwǝnǝ, dɩ́ ta jɩgɩ wʋpolo. Dɩ́ nan wʋ́ ta loori Wɛ sɩ DƖ zǝni abam, sɩ á bɩ lanyɩranɩ Wɛ cwǝŋǝ kam wʋnɩ. 10 Kʋ yɩ kʋntʋ ŋwaanɩ mʋ a pʋpʋnɩ wǝǝnu tɩntʋ a pa abam yɩ a tǝri á tee nɩ, sɩ a na tu á te, sɩ a daa yɩ kɩ kǝm-cɛɛrɩ dɩ abam dɩ dam dɩlʋ dɩ́ Yuutu wʋm na pɛ-nɩ tɩn. Dam dɩm kʋntʋ yɩ sɩ a ma fɔgɩ abam mʋ, sɩ kʋ daɩ sɩ a ma cɔgɩ abam.
Pooli na jɔɔnɩ Korɛntɩ tiinǝ bam o ma kweeli te tɩn
11 A ko-biǝ-ba, Wɛ wʋ́ pa á jǝni lanyɩranɩ. Kwaanɩ-na sɩ Wɛ wʋ́ pa á bɩ lanyɩranɩ DƖ cwǝŋǝ kam wʋnɩ. Á nan kɩ-na nɩ amʋ na loori abam te tɩn. Á taá jɩgɩ wʋbʋŋ-dɩdwɩ, sɩ á daarɩ á taá jɩgɩ bɩcarɩ-zuru, sɩ Wɛ dɩlʋ na paɩ sono dɩ bɩcarɩ-zuru tɩn wʋ́ ta wʋ abam tee nɩ.
12 Á na jeeri daanɩ, sɩ á taá jɔɔnɩ daanɩ lanyɩranɩ dɩ sono dɩ wʋ-poŋo.
Wɛ nɔɔna bam maama jɔɔnɩ abam.
13 Dɩ́ Yuutu Zezi Krisi wʋ́ pa abam maama yu-yoŋo,
Baŋa-Wɛ sono kʋm wʋ́ ta wʋ á tee nɩ,
yɩ DƖ Joro kʋm wʋ́ pa á taá ŋwɩ daanɩ dɩ ywǝǝni.