Tɔnɔ kʋlʋ Pooli na pʋpʋnɩ o pa
GALATƖ TIINƎ tɩn
Tɔnɔ kʋlʋ Pooli na pʋpʋnɩ o pa Galatɩ tiinǝ tɩn na brɩ dɩbam kʋlʋ tɩn mʋ tɩntʋ
Pooli pʋpʋnɩ tɔnɔ kʋntʋ o pa Wɛ nɔɔna balʋ na wʋ Galatɩ nɩ tɩn mʋ. O dɛɛn na kaagɩ je sɩm kʋntʋ nɩ o tɔɔlɩ Wɛ kwǝrǝ o brɩ nɔɔna tɩn, badaara kɩ ba wʋ-dɩdʋa dɩ Zezi. Kʋntʋ kwaga nɩ, nɔɔna badonnǝ dɩ ma daa ba ba brɩ nɔɔna bam nɩ balʋ na daɩ Zwifǝ tɩn dɩ maŋɩ sɩ ba sɛ Zwifǝ cullu tɩm, sɩ baara dɩ go dɩ ba bǝkǝri nɩ Zwifǝ cullu tɩm na brɩ te tɩn.
Pooli nan vɩn zaasɩm dɩm kʋntʋ, dɩ na daɩ Zezi Krisi kwǝr-ywǝŋǝ kam tɩn ŋwaanɩ. O laan ma pʋpʋnɩ sɩ o pa balʋ maama ya na ywǝri ba tɔgɩ vwan zaasɩm dɩm kʋntʋ tɩn, sɩ ba joori ba tɔgɩ cɩga cwǝŋǝ kam. O maa brɩ nɩ, kʋ yɩ ba na kɩ ba wʋ-dɩdʋa dɩ Zezi yɩ ba na o ŋwɩa kam tɩn (2:20) mʋ wʋ́ wanɩ kʋ pa ba maŋɩ lanyɩranɩ Wɛ yigǝ nɩ, sɩ kʋ daɩ ba na sɛ cullu tɩm tɩn ŋwaanɩ.
Pooli dɛ yigǝ o brɩ Zezi dɛɛn na bǝŋ-o sɩ o taa yɩ o tɩntʋŋnʋ, dɩ Zezi tɩtɩ na brɩ-o o kwǝr-ywǝŋǝ kam te tɩn. O brɩ wʋm dɩ Zezi tɩntʋŋna badaara bam na kɩ ni daanɩ, sɩ wʋm taa tʋŋɩ dwi-gɛ tiinǝ tee nɩ, yɩ ba sɛ nɩ o zaasɩm dɩm tɔgɩ Zezi cɩga kam tɩn. O wɩ sɩ o jɩgɩ ni sɩ o taa yɩ Zezi tɩntʋŋnʋ Wɛ na bǝŋ-o yɩ kʋ daɩ nabiinǝ tɩn ŋwaanɩ (pɔɔrɩm 1-2).
O maa ma Wɛ twaanʋ tɩlʋ na maŋɩ tɩ pʋpʋnɩ faŋa faŋa tɩn o brɩ nɩ, n na kɩ n wʋ-dɩdʋa dɩ Zezi mʋ nń na vrɩm, sɩ kʋ daɩ n na tɔgɩ Zwifǝ bam cullu tɩm tɩn ŋwaanɩ. Zezi na tɩgɩ tʋʋn-dagara baŋa nɩ tɩn, o pɛ dɩ́ laan te dɩ́ tɩtɩ, dɩ́ daa bá ta yɩ cullu gambɛ (pɔɔrɩm 3-4).
Tɔnɔ kʋm tiim jǝgǝ nɩ, o brɩ nɩ dɩ́ maŋɩ sɩ dɩ́ taá ŋwɩ nɩ balʋ na te ba tɩtɩ te tɩn mʋ. Kʋ maŋɩ sɩ dɩ́ pa Wɛ Joro kʋm vaŋɩ dɩbam kʋ pa dɩbam ŋwɩ-dʋŋa kalʋ na lana tɩn, sɩ dɩ́ taá jɩgɩ da-sono (pɔɔrɩm 5-6).
1
1 Amʋ Pooli wʋlʋ na yɩ Zezi Krisi tɩntʋŋnʋ tɩn mʋ pʋpʋnɩ tɔnɔ kʋntʋ. Kʋ daɩ nabiinǝ mʋ tʋŋɩ-nɩ, kʋ nan daɩ nɔɔnʋ mʋ tiŋi-nɩ sɩ a taa yɩ Zezi Krisi tɩntʋŋnʋ. Kʋ yɩ Zezi Krisi tɩtɩ mʋ kuri-nɩ, dɩdaanɩ dɩ́ Ko Wɛ dɩlʋ na bi-o DƖ pa o yagɩ tʋʋnɩ tɩn.
2 Dɩ́ ko-biǝ balʋ maama na wʋ amʋ tee nɩ tɩn dɩ jɔɔnɩ abam balʋ na yɩ Zezi kɔgɔ kʋm wʋ nɔɔna yɩ á zʋʋrɩ Galatɩ tɩɩnɩ dɩm nɩ tɩn.
3 Dɩ́ Ko Wɛ dɩ dɩ́ Yuutu Zezi Krisi wʋ́ pa abam yazurǝ dɩ yu-yoŋo.
4 Zezi Krisi nan mʋ dɛ dɩ́ Ko Wɛ wʋbʋŋa na lagɩ te tɩn maama yɩ o sɛ sɩ o tɩ dɩbam lwarɩm ŋwaanɩ, sɩ o ma wanɩ o vrɩ dɩbam zɩm lʋgʋ baŋa wo-balwaarʋ tɩm wʋnɩ.
5 Baŋa-Wɛ maŋɩ dɩ zulǝ mʋ sɩ kʋ taa ve maŋa kalʋ na ba ti tɩn. Amina.
Kwǝr-ywǝŋǝ kadoŋ daa tǝrǝ kʋ na daɩ Zezi kwǝr-ywǝŋǝ kam yɩranɩ
6 Abam na kɩ te tɩn nan mʋ pɛ amʋ yɩra sɔɔrɩ. Wɛ dɛ Zezi Krisi ŋwaanɩ mʋ DƖ kuri abam zaanɩ sɩ á taá yɩ DƖ nɔɔna, yɩ á laan da á zaŋɩ á ma á kwaga á ya dɩntʋ, sɩ á daarɩ á sɛ kwǝr-ywǝŋǝ kadoŋ. 7 Kʋ yɩ cɩga mʋ, kwǝr-ywǝŋǝ kadoŋ daa tǝrǝ, kʋ na daɩ Zezi kwǝr-ywǝŋǝ kalʋ dɩ́ na maŋɩ dɩ́ brɩ abam tɩn yɩranɩ. Amʋ nan tagɩ kʋntʋ, bɛŋwaanɩ nɔɔna badaara mʋ wʋ abam tɩtarɩ nɩ ba na kwaanɩ sɩ ba pipiri Zezi Krisi kwǝr-ywǝŋǝ kam, yɩ ba paɩ á wʋbʋŋa vugimǝ. 8 Nɔɔnʋ nan na tu á te yɩ o brɩ abam kwǝr-ywǝŋǝ kadoŋ, yɩ ka daɩ Zezi kwǝr-ywǝŋǝ kalʋ dɩ́ na maŋɩ dɩ́ brɩ abam tɩn, sɩ á yɩ sɛ kʋntʋ tu. Kʋ na maŋɩ kʋ yɩ dɩbam tɩtɩ wʋ nɔɔnʋ, naa kʋ na yɩ malɛka mʋ zɩ nuŋi wɛyuu, yɩ ka na brɩ abam kwǝr-ywǝŋǝ kadoŋ, Wɛ wʋ́ cɔgɩ kʋ tu. 9 Amʋ nan ta wʋ́ joori a fɔgɩ a ta nɩnɛɛnɩ dɩbam na maŋɩ dɩ́ ta kʋlʋ dɩ abam tɩn. Nɔɔnʋ na brɩ abam kwǝr-ywǝŋǝ kadoŋ, yɩ kʋ daɩ Wɛ kwǝr-ywǝŋǝ kalʋ á na maŋɩ á sɛ tɩn, Wɛ wʋ́ cɔgɩ kʋ tu.
10 A na tagɩ kʋlʋ tɩn, kʋ daɩ nɩ a lagɩ sɩ nabiinǝ mʋ sɛ nɩ a na kɩ kʋlʋ tɩn maŋɩ, kʋ yɩ sɩ Wɛ mʋ sɛ nɩ a na kɩ te tɩn maŋɩ. A nan ba lagɩ sɩ a pa nabiinǝ wʋrʋ poli dɩ amʋ. A ya na lagɩ kʋntʋ, a bá wanɩ a taa yɩ Zezi Krisi tɩntʋŋnʋ.
Kʋ na kɩ te yɩ Pooli ji Zezi tɩntʋŋnʋ tɩn
11 A ko-biǝ-ba, a lagɩ sɩ á lwarɩ nɩ Zezi kwǝr-ywǝŋǝ kalʋ amʋ dɛɛn na tɔɔlɩ a brɩ abam tɩn wʋ nuŋi nabiinǝ te. 12 Kʋ daɩ nabiinu mʋ kwe-ka o pa-nɩ sɩ a tɔɔlɩ. Nɔɔn-nɔɔnʋ nan wʋ zaasɩ-nɩ-ka. Kʋ yɩ Zezi Krisi tɩtɩ mʋ vɩɩrɩ amʋ o kwǝr-ywǝŋǝ kam.
13 Abam maŋɩ á ni amʋ dɛɛn na tɔgɩ Zwifǝ cullu tɩm cwǝŋǝ kam yɩ a kɩ te tɩn. A dɛɛn tiini a bɛɛsɩ Zezi nɔɔna bam, yɩ a ya kwaana sɩ a cɔgɩ ba kɔgɔ kʋm maama. 14 Kʋ na yɩ a yuu donnǝ bam wʋnɩ, a dɛɛn sɛ Zwifǝ bam cullu tɩm a dwǝni ba zanzan, amʋ dɛɛn na kwaanɩ a tɔgɩ dɩ́ nabaara bam cwe sɩm lanyɩranɩ tɩn ŋwaanɩ. 15 Dɩ kʋntʋ maama, Wɛ kɩ-nɩ yu-yoŋo yɩ DƖ kuri-nɩ kʋ loori ba na wʋ́ lʋ-nɩ tɩn. DƖ laan ma bǝŋi-nɩ sɩ a taa tʋŋɩ a pa-DƖ. 16 Maŋa kalʋ DƖ wʋbʋŋa na lagɩ tɩn mʋ DƖ vɩɩrɩ-nɩ sɩ a lwarɩ DƖ Bu wʋm, sɩ a daarɩ a tɔɔlɩ o kwǝr-ywǝŋǝ kam a brɩ dwi-gɛ tiinǝ. Maŋa kam kʋntʋ nɩ a wʋ ve a bwe nɔɔn-nɔɔnʋ woŋo ka ŋwaanɩ. 17 Amʋ wʋ ve Zeruzalɛm sɩ a na balʋ na maŋɩ ba yɩ Zezi tɩntʋŋna ba loori amʋ tɩn. A nan yɔɔrɩ Arabi mʋ a vu. Kʋntʋ kwaga nɩ mʋ a laan joori a ba Damasɩ.
18 Bɩna yatɔ na kɛ tɩn, a laan ma zaŋɩ a vu Zeruzalɛm sɩ a na Pɩyɛɛrɩ, sɩ dɩ́ lwarɩ daanɩ. A ma kɩ da fugǝ-yanu o tee nɩ. 19 Amʋ daa wʋ nɛ Zezi tɩntʋŋnʋ wʋdoŋ a wǝli da, kʋ na daɩ dɩ́ Yuutu Zezi nyaanɩ Zakɩ yɩranɩ mʋ a nɛa.
20 A na pʋpʋnɩ wǝǝnu tɩlʋ maama tɩn yɩ cɩga mʋ. Wɛ ye amʋ wʋ. Kʋ nan daɩ vwan mʋ a fɔga.
21 Kʋntʋ kwaga nɩ, a laan ma zaŋɩ a tʋlɩ a vu Siiri dɩ Silisi tɩɩnɩ dɩm. 22 Zezi Krisi nɔɔna balʋ na wʋ Zude tɩɩnɩ dɩm nɩ tɩn ya daa ta wʋ nɛ amʋ dɩ ba yi. 23 Ba nan maŋɩ ba ni nɔɔna badaara na tɛ amʋ taanɩ ba wɩ: «Nɔɔnʋ wʋlʋ dɛɛn ya na bɛɛsɩ dɩbam tɩn laan mʋ zagɩ o kikiǝ, yɩ o wʋra o tɔɔlɩ Wɛ kwǝr-ywǝŋǝ kam sɩ o pa nɔɔna ba ba sɛ Zezi Krisi, yɩ kʋ yɩ Zezi cwǝŋǝ kam kʋntʋ mʋ o dɛɛn kwaana sɩ o ya cɔgɩ.»
24 Ba na ni amʋ taanɩ kʋntʋ tɩn, kʋ ma pa ba zuli Wɛ lanyɩranɩ.