3
चर्चकी मीतिवी पर्ला ख्ये पेतुप कोर्ला
1 अच्युनुपतिवा, ङ ख्यिरा मुला ताम्ङे कितुप पेला कोन्छ्योककी थु चाङ्मा वोपुप मीतिवी मुला ताम्ङे क्यावु दोके माक्या, यिने जम्बुलिङकी ओङला वोतुप मीतिवाला दोके ताङ ख्रीष्टला मलोक तेपा क्यावु तप्की आङा टिक्पेतिवाला क्यावु दोके ताम्ङे क्यायिन। 2 ङे ख्यिराङला नुम थुङ्गुप आङा टिक्पेतिवाला दोके हाक्को थुपुप येन्देन तिराङ बिनिन, समा क्योङ्बु दोके हाक्को मुथुपुप येन्देन ति माबिन। च्यिलासिसिन तोजो पेला ख्यिरा कले वोतुप येन्देनतिवा हाक्को मुथुपुप वे, तरोङ साङ तुकै राङ वे। 3 ख्यिराङ तेपा क्यासिनाङ तरोङ साङ जम्बुलिङकी ओङला वोतुप मीतिवा दोके राङ वे। च्यिलासिसिन ख्यिरा पर्ला ठतोक कितुप ताङ खाँदा कितुप किवी। ख्यिराङ तुक कितुप ति जम्बुलिङकी ओङला वोतुप मीतिवी क्यावु दोके मिन रो? 4 ख्यिराङ ललाइकी “ङ पावलकी मी यिन।”, तमा ललाइकी “ङ ति अपोल्लोसकी मी यिन।” सिनी खाँदा किनोक लो। ख्यिरा तुक कितुप ति थोसिमा ख्यिराङ ति जम्बुलिङकी ओङला वोतुप मीतिवा दोके यिन सिरुप ति ङे हाक्कोसुङ।
5 काङ अपोल्लोस ति सु यिन रो? पावल ति सु यिन रो? ङ्यिरा ख्याप्टाक क्यावु कोन्छ्योककी सुङ थोनी ख्यिरा तेपा क्यावु यिन। ङ्यिराङ याङ कोन्छ्योकला शब्ज्यी कितुप मी तिराङ यिन। 6 दी ति चुशिङ जुवु पे दोके यिन। चुशिङ ति ङे चुयिन, तमा छ्यु ति अपोल्लोसकी लुक्सुङ, यिने तीला ग्या ज्यितुप ति याङ कोन्छ्योक राङ यिन। 7 तुक क्यानी चुशिङ जुवु ताङ छ्यु लुकुप ति खक्छ्येवु मिन, यिने तीला ग्या ज्यितुप कोन्छ्योक ति खक्छ्येवु यिन। 8 तमा जुवु ताङ छ्यु लुकुप ति छ्ये साङ मिन, छ्युङा साङ मिन, तिवा च्यिक्पा राङ यिन। कोन्छ्योककी तिवा रे रेला तिवी चो हुर्ताक क्यावे, तोजोयी राङ ल नङ्गिवी। 9 ङ्यिराङ ति कोन्छ्योककी थोक्ला मुला राङ लाका कितुपतिवा तिराङ यिन। तमा ख्यिराङ ति कोन्छ्योककी शिङ ताङ खोकी जोवु खाङ्बा यिन।
10 कोन्छ्योककी ङला नङ्गुप कटिनकी राङ ङ ति खाङ्बा जोप मी खामु दोके डम्ज्यी तिङ्यिन। तमा यम्बातिवी ती डम्ज्यी खला खाङ्बा जेवी। तमा खाङ्बा जोपतिवी चुक क्यानी जो गोकिवी सिनी नासाम ल्यामु तोङ गोकिवी। 11 च्यिलासिसिन कोन्छ्योककी खाङ्बा जोपला डम्ज्यी तिङ्नी वे, ती डम्ज्यी ति चोवो येशू ख्रीष्ट यिन। ख्रीष्टकी मिसिन यम्बा सी साङ ती डम्ज्यी दिङ मुथुपी। 12 दोजो दी डम्ज्यीकी खला मी ललाइकी सेर थ्वोनी खाङ्बा जोसुङ, ललाइकी ङुलकी खाङ्बा जोसुङ, तमा ललाइकी गोङ नावु च्यालक थ्वोनी खाङ्बा जोसुङ, तमा ललाइकी शिङ ताङ च ताङ सोङ्मा थ्वोनी खाङ्बा जोसुङ सिसिन, 13 तुका मीतिवा रे रेकी लाका ति कोन्छ्योककी छ्या देन्गिवी। च्यिलासिसिन खोकी ठिम क्या नङ्गुप तुजेला तिवी क्यावु लाका ति ठछ्येली थोङ्गिवी। तमा सु सुकी चुका चुका लाका क्यानोक सिनी मे थ्वोनी र्हेनी ल्हेवी। 14 मेला र्हेनी ल्हासिमा ती खाङ्बातिवा माछिक्सुङ सिसिन, तीला कोन्छ्योककी छ्यक्तक नङ्गिवी। 15 दोजो मी ललाइकी जोवु खाङ्बा ति मेला छिक्सुङ सिसिन ती खाङ्बा ति ना गल्नी तीला कुन फोकिवी। यिने खुरुङ ति मे नेसुर टो गलुप दोके क्यानी र्होकिवी।
16 ख्यिराङला छ्या वे? ख्यिराङ ति कोन्छ्योककी ल्हङाङ यिन। तमा खोकी थु चाङ्मा ति ख्यिरा मुला ज्युकिवी। 17 दोजो मी ललाइकी कोन्छ्योककी ल्हङाङला ना तोङ्गिवी सिसिन तीला साङ कोन्छ्योककी ना तोङ्गिवी। च्यिलासिसिन कोन्छ्योककी ल्हङाङ ति चाङ्मा वे। ती ल्हङाङ ति ख्यिराङ राङ यिन।
18 सी साङ खोरो राङ खुरुङला क्येन फोकुप मोजोशी। ख्यिराङ सु दी जम्बुलिङला रिक्पा वोतुप यिन सिनी नोकिवे, ती ति रिक्पा मेतुप दोके च्युङ्शी। तुक क्यासिन ख्यिराङ रिक्पा वोतुप च्युङ्गिवी। 19 च्यिलासिसिन दी जम्बुलिङकी रिक्पा ति कोन्छ्योककी थोङ्दाङला काङ साङ मिन। ती तप्की कोन्छ्योककी सुङला दुक सिनी टि वे, “रिक्पा वोतुपतिवी च्यङ्बु क्यानी लाका मेलोवा क्यावु तप्की ती ति खुरुङ राङ ना डिवी”* ३:१९ अय्यूब ५:१३ 20 येलुङ यम्बा कोन्छ्योककी सुङला दुक सिनी साङ टि वे, “रिक्पा वोतुपतिवी सेम चुकै वे सिरुप ति कोन्छ्योकला तेरी छ्या वे। तिवी रिक्पा ति काङ साङ फेन मोथोवी।”* ३:२० भजन ९४:११ 21 तुक क्यानी सी साङ मीतिवाला तेके मिकिशी। च्यिलासिसिन तेरी ति ख्यिरा तिराङ यिनो। 22 तीकी तेन्दोक ति पावल यिन्शी, अपोल्लोस यिन्शी, पत्रुस यिन्शी, जम्बुलिङ यिन्शी, मिजी यिन्शी, याङ्ना शेप यिन्शी, तसाम पेला यिन्शी, याङ्ना ज्युक्थमा यिन्शी, तेरी ख्यिरा तिराङ यिन। 23 तमा ख्यिराङ ती ख्रीष्टकी ति यिन, ख्रीष्ट ती कोन्छ्योककी ति यिन।