1 अच्‍युनुपतिवा, ङ ख्‍यिरा ते वानी कोन्‍छ्‍योककी थोक्‍ला पङ्‍बु तेरुप पेला ताम्‍ङे ग्‍येर्पु ग्‍येर्पु क्‍यानी छासे रिक्‍पा वोतुप मीतिवी दोके ख्‍याप्‍टाक माक्‍या। 2 च्‍यिलासिसिन ती पेला ङे येशू ख्रीष्‍टकी कोर्ला ताङ खो ग्‍यङ्‍शिङला कल्‍नी टुङ्‍गुप कोर्ला तिराङ मिसिन ताम्‍ङे यम्‍बा काङ साङ कितुप नो माक्‍या। 3 ङ ख्‍यिरा मुला वोतुप पेला काङ साङ कि मुथुवु दोके ताङ छासे ज्‍यिवा लानी र्‍हुकिन वायिन। 4 ङे ख्‍याप्‍टाक क्‍यावु सुङ ताङ टोङ्‍गु बिन्‍दुप ति जम्‍बुलिङकी च्‍यु ताङ रिक्‍पा नेसुर मिन, यिने कोन्‍छ्‍योककी थु चाङ्‍माकी ओङ ताङ ङार नेमा क्‍यावु यिन। 5 तुक क्‍यानी ख्‍यिरा येशूला तेपा क्‍यावु ति मी येन्‍देन ताङ रिक्‍पाला मिन, यिने कोन्‍छ्‍योककी ओङ्‍ज्‍येनला ज्‍योकुपला यिन।

6 यिन्‍सिनाङ कोन्‍छ्‍योकला तेपा रम्‍बु वोतुपतिवाला ताम्‍ङे कितुप पेला ङ्‍यिराङ दी रिक्‍पाकी कोर्ला राङ ख्‍याप्‍टाक किवी। दी रिक्‍पा ति दी जम्‍बुलिङकी रिक्‍पा ति मिन, जम्‍बुलिङकी ओङ्‍ज्‍येन कितुप मीतिवी रिक्‍पा साङ मिन। तिवी रिक्‍पा याङ वुतुङ के तोर्नी डिवी। 7 यिने ङ्‍यिराङ ति गोमाला छ्‍याकला वोतुप ताङ तन्‍दा ति तेरी हाक्‍कोवु कोन्‍छ्‍योककी रिक्‍पाकी कोर्ला ख्‍याप्‍टाक किवी। ती रिक्‍पा ति जम्‍बुलिङ ज्‍येङ्‍गुप सिनाङ गोमा नेज्‍युनी दाक्‍पी मोवाकी थोक्‍ला टडिक क्‍या नङ्‍गुप यिन। 8 ती ताम्‍ङे ति दी कल्‍वाकी ओङ्‍ज्‍येन कितुपतिवी हाक्‍माको। तिवी हाक्‍कोवु यिन्‍सिन मोवा वोतुप चोवो येशू ख्रीष्‍टला ग्‍यङ्‍शिङला मेगेलुप्‍जा। 9 ती तप्‍की कोन्‍छ्‍योककी सुङला साङ दुक सिनी टि वे,

10 ती ताम्‍ङेकी तेन्‍दोक ति कोन्‍छ्‍योककी दाक्‍पुला खोकी थु चाङ्‍मा नेमा हाक्‍को ज्‍यिकिवी, च्‍यिलासिसिन खोकी थु चाङ्‍माकी तेरी ताम्‍ङे ति हाक्‍कोकिवी। सी साङ हाक्‍माकोवु कोन्‍छ्‍योककी नोवाला वोतुप छ्‍याककी ताम्‍ङेतिवा साङ खोकी हाक्‍कोकिवी। 11 मी नोवाला वोतुप ताम्‍ङेतिवा ति खोरो सेमगी राङ हाक्‍कोकिवी। ती दोके कोन्‍छ्‍योककी नोवाला वोतुप ताम्‍ङेतिवा तेरी खोकी थु चाङ्‍माकी मिसिन सी साङ हाक्‍को मुथुपी। 12 त याङ दाक्‍पुला जम्‍बुलिङकी सेम थोपुप मिन, कोन्‍छ्‍योककी थु चाङ्‍मा थोपुप यिन। कोन्‍छ्‍योककी दाक्‍पुला नङ्‍गुप मोलाम ति ल्‍यामो क्‍यानी हाक्‍को ज्‍यितुपला खोकी दाक्‍पुला खोकी थु चाङ्‍मा नङ्‍गुप यिन। 13 तुक क्‍यानी ङ्‍यिरा ख्‍याप्‍टाक क्‍यावु सुङ ति मी रिक्‍पा नेमा ख्‍याप्‍टाक क्‍यावु मिन, खोकी थु चाङ्‍मा नेमा ख्‍याप्‍टाक क्‍यावु यिन। तमा खोकी थु चाङ्‍माकी ओङला मिजी क्‍योङ्‍गुप मीतिवाला ति खोकी थु चाङ्‍माकी ओङ नेसुर वुङ्‍गुप ताम्‍ङे टेङ्‍बु ख्‍याप्‍टाक क्‍यायिन। 14 खोकी थु चाङ्‍मा मेतुप मी तीकी खोकी थु चाङ्‍मा नेसुर वुङ्‍गुप ताम्‍ङेतिवा सेमला मलङ्‍गिवी। च्‍यिलासिसिन तिवी तुका ताम्‍ङेतिवाला तेन्‍दोक मेतुप यिन सिनी सिवी। तमा तिवी हाक साङ मोकोवी। तुका ताम्‍ङेतिवा खोकी थु चाङ्‍मा नेमा तिराङ हाक्‍को थुप्‍किवी। 15 कोन्‍छ्‍योककी थु चाङ्‍मा वोतुप मी तीकी तेरी ताम्‍ङेतिवा ल्‍यामु वोतुप मेतुप ल्‍हेवी, यिने ती मी तीला मी यम्‍बा सी साङ ल्‍यामु वोतुप मेतुप ल्‍हा मुथुपी। 16 च्‍यिलासिसिन कोन्‍छ्‍योककी सुङला दुक सिनी टि वे,

यिने दाक्‍पी मुला याङ ख्रीष्‍टकी सेम वे।*२:१६ यशैया ४०:१३