2
येशू ख्रीष्ट ति दाक्पी छ्योला वोतुप चोवो यिन
1 ङे आङातिवा, ख्यिराङला दिक्पा माकी सिनी ङे दी ताम्ङे ति ख्यिरा थोक्ला टिवु यिनो। यिने सी दिक्पा क्यासिनाङ दाक्पी छ्योला लानी कोन्छ्योक ताङ मुला ताम्ङे लपुप मिरा च्यिक वे, खो ति टेङ्बु वोतुप चोवो येशू ख्रीष्ट यिन। 2 खो ति दाक्पी दिक्पी थोक्ला कोन्छ्योकला जिन्बा तोङ्गुपला खुरुङ राङ टुङ्गुप यिन। दाक्पी दिक्पी थोक्ला तिराङ मिन्दाला, जम्बुलिङला वोतुप तेरी मीतिवी दिक्पी थोक्ला यिन।
3 दाक्पु कोन्छ्योककी क नङ्गुप सुङला युसुङ सिसिन दाक्पी खोला ङो शेवु यिन सिनी हाक्कोकिवी। 4 यिने चुका मी तीकी ङ कोन्छ्योकला ङो शेकिवी सिनी सिवी, यिने खोकी कला ति मुयुकिवी सिसिन, ती मी ति जिनोक जोप यिन, टेङ्बु वोतुप मिन। 5 यिने चुका मी ति कोन्छ्योककी सुङला युकिवे, तीकी कोन्छ्योकला सेम ने ङ्यिङ्ज्ये क्यावु ति वुतुङ के तेरी छेकिवी। तुक क्यासिन दाक्पी मिजीला कोन्छ्योक वे सिरुप ति हाक्कोकिवी। 6 ङे मिजी ति कोन्छ्योक ताङ मुला तम्जी ल्यामु वे सिरुप मी तीकी येशूकी दोके मिजी क्योङ गोकिवी।
क सम्बा
7 ङे ङ्यिङ्ज्येवुतिवा, ङ ख्यिराङला यम्बा क सम्बा मिन, क ङ्यिङ्बा राङ टिकिन वोतो। ती क ङ्यिङ्बा ति थल्मा नेजु ख्यिरा मुला वे। तमा ती क ति ख्यिरा थोवु साङ यिन। 8 यिन्सिनाङ ङ ख्यिराङला क सम्बा यी टिकिन। ती टेङ्बु वोतुप क ति येशू ख्रीष्टला वे, तमा ख्यिरा मिजीला साङ वे। च्यिलासिसिन नक्तोमी ति गानी सिन्सुङ, वोसिर टेङ्बु ति वो ग्यकिन नोक। 9 चुका मी तीकी ङ येशूला तेपा क्यानी ठछ्येलीला युकुप यिन सिवी, यिने तेपा कितुप यम्बा नुप ताङ नुमला ङ्यिङ्मर किवी सिसिन, ती मी ति तरोङ साङ नक्तोमीला राङ वोतुप मी यिन। 10 तमा चुका मी तीकी तेपा कितुप यम्बा नुप ताङ नुमला ङ्यिङ्ज्ये किवे, ती ति ठछ्येलीला युकुप मी यिन। तीकी काङ साङ लाका मेलोवा मिकिवी। 11 यिने चुका मी तीकी तेपा कितुप यम्बा नुप ताङ नुमला ङ्यिङ्मर किवे, ती मी ति नक्तोमीला राङ युकिवी। तमा खुरुङ कनी डोयी वे सिरुप ति तीकी हाक्मोकोवी। च्यिलासिसिन दिक्पाकी तीला मिक मोथोङ्गुप जोवु गिवी।
12 ङे आङातिवा, येशूला तेपा क्यानी ख्यिरा दिक्पा ति कोन्छ्योककी माफ नङ्गुप तप्की
ङ ख्यिराङला दी यिकी ति टिकिन वोतो।
13 पपातिवा, ख्यिरा थल्मा नेज्यु वोतुप ख्रीष्टला ङो शेवु तप्की
ङ ख्यिराङला दी यिकी ति टिकिन वोतो।
नाज्युङतिवा, ख्यिराङ दुक्टाकी खला ग्येलुप तप्की
ङ ख्यिराङला दी यिकी ति टिकिन वोतो।
14 ङे आङातिवा, ख्यिरा पपा कोन्छ्योकला ङो शेवु तप्की
ङ ख्यिराङला दी यिकी ति टिकिन वोतो।
पपातिवा, ख्यिरा थल्मा नेज्यु वोतुप ख्रीष्टला ङो शेवु तप्की
ङ ख्यिराङला दी यिकी ति टिकिन वोतो।
तमा नाज्युङतिवा, ख्यिरा तेपा ति रम्बु वोतुप ताङ कोन्छ्योककी सुङला ङ्येन्नी दुक्टाकी खला साङ ग्येलुप तप्की
ङ ख्यिराङला दी यिकी ति टिकिन वोतो।
15 ख्यिराङ जम्बुलिङ ताङ जम्बुलिङला वोतुप तेरीला नासाम मातोङ। चुका मी तीकी जम्बुलिङला तिराङ नासाम तोङ्गिवे, तीकी कोन्छ्योकला नासाम मोतोङ्गिवी। 16 च्यिलासिसिन जम्बुलिङला वोतुप तेरीकी तेन्दोक ति मी सेमला शरुप नासाम मेलोवा ताङ मिककी थोङ्सिमा नासाम मेलोवा शरुप ताङ मी मिजीला ङ राङ यिन सिनी छ्येजु कितुप यिन। तिवा ति कोन्छ्योक नेमा वोवु मिन, यिने जम्बुलिङ नेसुर वावु यिन। 17 जम्बुलिङ ना डिवी, जम्बुलिङला वोतुप नोवातिवा साङ ना डिवी, यिने कोन्छ्योककी नोवाला वोतुप लाका कितुप मी ति नरीकी नरी लुकिवी।
ख्रीष्टकी तेन्दोकला लावु मी
18 आङातिवा, जम्बुलिङ ना डोप तुजे ति तन्दा राङ यिन। ख्रीष्टकी तेन्दोकला लङ्गुप ति वुङ्यिन वे सिरुप ति ख्यिरा साङ थोनी वे। तिवा ति तन्दा राङ बङी वा वे। तुक क्यानी जम्बुलिङ ना डोप तिङ्मी तुजे ति दी राङ यिन सिनी ख्यिरा हाक्कोकिवी। 19 तोङ्ला तिवा दाक्पी मु नेवा थेन्नी गलुप यिन, च्यिलासिसिन वुतुङ के तिवा दाक्पी थाकाकी ति मिन। दोजो तिवा दाक्पी थाकाकी ति यिन्दुप यिन्सियाङ दाक्पी मुला राङ लुवु ति यिन्जा। तुक क्यानी वुतुङ के तिवा दाक्पी थाकाकी ति मिन सिरुप ति ठछ्येली हाक्कोकिवी।
20 यिने ख्यिराङला याङ टेङ्बु वोतुप ख्रीष्ट नेसुर नुमकी नुम्शाल ग्यप्नी वे। ती तप्की ख्यिराङ तेरीकी टेङ्बुला ङो शेकिवी। 21 ख्यिरा टेङ्बुला छ्या मे सिनी दी यिकी टिवु ति मिन। यिने ख्यिरा टेङ्बुला छ्या वे, तमा टेङ्बु नेसुर जिनोक जोप मेङ्गिवी सिरुप ति ख्यिरा हाक्कोवु तप्की दी यिकी ति ङे ख्यिराङला टिवु यिनो। 22 चुका मी तीकी येशूला दिक्पा ने थर ज्यितुप ख्रीष्ट यिन सिनी सेमला मिलिङ वे, ती ति जिनोक जोप मी यिन। तमा चुका मी तीकी पपा कोन्छ्योक ताङ खोकी सेवुला सेमला मिलिङ वे, ती ति येशू ख्रीष्टकी तेन्दोकला लङ्गुप मी यिन। 23 कोन्छ्योककी सेवुला सेमला मिलिङ्गुप तीकी मुला पपा कोन्छ्योक मेवी, यिने खोकी सेवुला सेमला लिङ्गुप तीकी मुला पपा कोन्छ्योक गिवी। 24 चुका ताम्ङे ति ख्यिरा थल्मा नेज्यु थोवे, ती ताम्ङे ति नरी ख्यिरा सेमला ज्योक। दोजो थल्मा नेज्यु हाक्कोवु ताम्ङे ति ख्यिरा सेमला ज्याक्सुङ सिसिन, पपा कोन्छ्योक ताङ खोकी सेवु येशू ख्रीष्टकी मुला ख्यिरा तम्जी ल्यामु लुकिवी। 25 खोकी ख्यिराङला थाक्छ्येन नङ्गुप ति ती नाम्साङ मिशिवु मिजी यिन।
26 दी ताम्ङे ति ख्यिराङला जिनोक जोपतिवी थोक्ला ङे टिवु यिनो। 27 ख्रीष्ट नेसुर थोपुप थु चाङ्मा ति ख्यिरा मुला नरी लुनी वे, तुक क्यानी ख्यिराङला सी साङ लोप मोगोवी। च्यिलासिसिन खोकी थु चाङ्माकी राङ ख्यिराङला तेरी ताम्ङे ति लोप्किवी। ती थु चाङ्माकी लापुप ति टेङ्बु यिन, जुमा मिन। तुक क्यानी खोकी थु चाङ्मा नेसुर लापुप दोके ख्यिराङ खोला तेपा क्यानी दे।
कोन्छ्योककी गिपा
28 ङे आङातिवा, ख्रीष्ट येलुङ फेपुप तुजेला ख्यिराङ ङाडेङ क्यानी खोकी चिप्ला ङोछाला मेख्येल्शी सिनी तेपा रम्बु क्यानी देता। 29 खो टेङ्बु वोतुप ति ख्यिराङला छ्या वोतुप तप्की कोन्छ्योककी थोङ्दाङला टेङ्बु वोतुप लाका कितुपतिवा तेरी खोकी गिपा यिन सिनी ख्यिरा हाक्कोकिवी।