3
ख्योवा ताङ पेर्मीकी कोर्ला
1 तुक राङ क्यानी पेर्मीतिवा रङगी ख्योवी ओङला दे। तुक क्यासिन कोन्छ्योककी सुङला मेङ्येन्दुप ख्योवा साङ पेर्मीकी किताङ नालु ल्यामु वोतुप थोङ्सिमा कोन्छ्योककी कोर्ला काङ मालाप्सिनाङ ख्योवी सेम साङ कोन्छ्योककी थाकाला ग्युर्किवी। 2 च्यिलासिसिन ख्यिरा मिजी टेङ्बु वोतुप ताङ ख्यिरा तिवाला ताङ्देन क्यावु ति तिवी थोङ्गिवी। 3 तुक क्यानी ख्यिराङ र्ह शेनी सेरकी क्येङ्येन तानी मज्या ल्यामु कोन्नी फिला तिराङ छ्यावु दोके जेमु जोप मिन, 4 यिने ख्यिरा सेमगी दिङ्ला ति नाम्साङ मोफोवु कुसु ज्यम्बु ताङ हम क्या देतुप च्युङ्नी मज्या ल्यामु कोन्नी छ्यावु दोके जेमु जो। ती ति कोन्छ्योककी थोङ्दाङला छासे गोङ नावु वे। 5 च्यिलासिसिन तोङ्ला कोन्छ्योकला रेवा कितुप आम्पुम टेङ्बुतिवी साङ तुक राङ क्यानी खोरो ख्योवी ओङला देसुङ। 6 साराकी साङ खोरो ख्योवा अब्राहामला चोवो सिनी ख्योवी सिक्यावु ताम्ङेला ङ्येन्सुङ। दोजो ख्यिरा साङ तुक राङ क्यानी काङगी थोक्ला साङ ज्यिवा माक्यानी लाका टेङ्बु तिराङ क्यासिन ख्यिराङ साङ सारा दोके यिनो।
7 तुक राङ क्यानी ख्योवातिवी साङ रङगी पेर्मी ति रम्बु मेतुप यिन सिमाक्यानी तिवाला ताङ्देन क्यानी मुला राङ मिजी क्योङ, च्यिलासिसिन ख्योवा ताङ पेर्मी ति कोन्छ्योककी कटिन नङ्गुप मिजी मुला राङ क्योङ्गुपला जो नङ्गुप यिन। तुक क्यासिन ख्यिराङ मोपोर कितुप पेला ख्यिराङला कले मेङ्शी।
लाका टेङ्बुकी थोक्ला छेटाङ वुङ्गुप कोर्ला
8 तेरी सिनाङ तिङ्ला ङ काङ सिरिन सिसिन, ख्यिराङ सेम च्यिक्पा राङ च्युङ्गुप ताङ च्यिककी च्यिकला दुक्पाला ख्येलुप पेला ङाडेङ तेरुप ताङ ङ्यिङ्ज्ये कितुप ताङ च्यम्बा कितुप ताङ छ्येजु मिकिवु वुङ गोकिवी। 9 ख्यिराङला मेलोक्पा कितुपतिवाला मेलोक्पा माकी, याङ्ना मारे तोङ्गुपतिवाला ङ्येन मालाङ, यिने तिवाला मोलाम बिन। च्यिलासिसिन तीकी थोक्ला राङ कोन्छ्योककी ख्यिराङला पेन नङ्गुप यिन। तुक क्यासिन खोकी ख्यिराङला मोलाम नङ्गिवी। 10 च्यिलासिसिन कोन्छ्योककी सुङला दुक सिनी टि वे,
“चुका मी तीकी रङगी मिजीला गा कितुप ताङ लोदिमु छोलुप नोकिवे,
तीकी खोरो ख नेमा ताम्ङे मेलोक्पा मलाप्शी,
तमा जिनोक जोप ताम्ङे साङ मिकिशी,
11 तमा मेलोक्पा कितुप नेसुर लोक्नी लाका ल्यामु किशी,
तमा लोदिमु छल्नी ती लोदिमुकी तिङ्ला तिङ्योक्शी।
12 च्यिलासिसिन चोवोकी सुङला युकुपतिवाला खोकी शाल जिकिवी,
तमा तिवी क्यावु मोपोर साङ ङ्येन्गिवी।
यिने कोन्छ्योककी सुङला मुयुकुपतिवाला ति खोकी शाल मिजिवी।”* ३:१०-१२ भजन ३४:१२
13 दोजो ख्यिरा मीतिवी थोक्ला लाका ल्यामु कितुपला छासे नो क्यासिन सी ख्यिराङला मेलोक्पा किवी रो? 14 यिने ख्यिराङ लाका टेङ्बुकी थोक्ला दुक्पा खुर्सुङ सिसिन ख्यिराङला मोलाम थोपुप यिनो। मीतिवी ख्यिराङला ज्यिवा कुसिन ख्यिराङ ज्यिवा माकी, यर्मिन मर्मिन साङ माडो। 15 यिने येशू ख्रीष्टला चोवो सिनी सेमगी दिङ नेज्यु मोवा की। तमा ख्यिरा क्यावु रेवाकी कोर्ला ललाइकी ख्यिराङला टिसिन तीकी टिलेन तेरुपला नरी टडिक क्यानी दे। यिने ख्यिराङ कुसु ज्यम्बु कितुप ताङ ताङ्देन क्यानी किसा। 16 तमा ख्यिराङ सेम टेङ्बु क्यानी दे, तुक क्यासिन ख्यिरा ख्रीष्टला ताङ्देन क्यानी क्यावु लाकाकी तेन्दोकला लङ्गुपतिवा तिवी क्यावु लाका मेलोवाकी थोक्ला ङोछा लङ्शी। 17 दोजो कोन्छ्योककी नोवा तुकै राङ यिन्सिन लाका मेलोक्पा क्यानी दुक्पा खुरुप सिनाङ लाका ल्यामु क्यावु तप्की दुक्पा खुरुप ति मङ ल्यामु यिन। 18 च्यिलासिसिन चोवो येशू ख्रीष्ट साङ दिक्पातिवी तेन्दोकला थेङ्मा च्यिक टुङ्सुङ, खो दिक्पा मेसिनाङ मेटेङ्बुतिवाला कोन्छ्योककी मुला तम्जी ल्यामु जोपला टुङ्गुप यिन। खोकी जु ति टुङ सिनाङ खोकी थु ति कोन्छ्योककी ङोसु लाङ्सुङ। 19 खोकी थु ति ङ्येलाला शोरुप नम्शिङतिवाला फेप्नी कोन्छ्योककी सुङ ख्याप्टाक क्या नाङ्सुङ। 20 ती नम्शिङतिवी थल्माला नोआकी टु जोप पेला कोन्छ्योककी कला माङ्येन, यिन्सिनाङ कोन्छ्योककी तिवी थोक्ला हम क्यानी गुसुङ। तमा ती टी नाङ्ला शुवु मी मिरा ग्ये तिराङ छ्यु नेसुर र्होक्सुङ। 21 ती छ्यु ति तन्दा ख्यिराङला साङ र्होकुप बप्तिस्माकी थोक्ला गोमाला के छ्या तेन्दुप त यिन। ती बप्तिस्मा ति जुकी टेमा शलुप मिन, यिने ख्यिरा सेम टेङ्बुकी कोन्छ्योक ताङ मुला थाक्छ्येतुप त यिन। च्यिलासिसिन कोन्छ्योककी येशू ख्रीष्टला टुङ्गुप नेसुर ङोसु लाङ्नी ख्यिराङला शेप ने थर च्यिसुङ। 22 खो देवाच्येनला फेप्सुङ, तमा देवाच्येनकी लेन क्योलुप थुतिवा ताङ ओङ्ज्येन कितुपतिवा ताङ ङारतिवाला खोरे ओङला ज्याक्नी खो ति कोन्छ्योककी यावी थाकाला वोतुप ठीला ज्युसुङ।