2
कोन्‍छ्‍योककी पेन नङ्‍गुप गिपातिवा
तुक क्‍यानी ख्‍यिराङ लाका दुक्‍टा कितुप ताङ जिनोक जोप ताङ खोनक्‍पु कितुप ताङ ठतोक ङर्केल कितुप ताङ मीला मारे तोङ्‍गुप ताम्‍ङे तेरी क्‍युर। 2-3 ख्‍यिरा कोन्‍छ्‍योक च्‍यङ्‍च्‍यु सेम्‍बा वे* २:२-३ भजन ३४:८ सिरुप ति हाक्‍कोसुङ सिसिन मलोक क्‍येवु आङातिवा वोमा छलुप दोके ख्‍यिराङ टेङ्‍बु ताङ चाङ्‍मा वोतुप कोन्‍छ्‍योककी सुङला युकुप छासे नो की। तुक क्‍यासिन ख्‍यिराङला मङ मङ दिक्‍पा ने थर्वा ङ्‍येकिवी।
ख्‍यिराङ चोवो येशूकी चिप्‍ला शोक। खो ति खाङ्‍बा जोप मीतिवी फेन मोथोवु यिन सिनी तेन्‍नी क्‍युरुप दो यिन, यिन्‍सिनाङ कोन्‍छ्‍योककी ती दो ति पेनी मीतिवी थोक्‍ला मिजी नङ्‍गुप गोङ छ्‍येन्‍बु वोतुप दो जो नाङ्‍सुङ। ख्‍यिराङ साङ कोन्‍छ्‍योककी मिजी नङ्‍गुप दो दोके यिन। खोकी ती दोतिवा दुम्‍नी खोरे थु चाङ्‍माकी ल्‍हङाङ जो नङ्‍गिवी। तुक क्‍यानी ख्‍यिराङ ति येशू ख्रीष्‍ट नेसुर सेम टेङ्‍बु क्‍यानी कोन्‍छ्‍योकला गा लङ्‍गुप जिन्‍बा बुलुप चाङ्‍मा वोतुप कोङ्‍यारतिवा यिनो। च्‍यिलासिसिन कोन्‍छ्‍योककी सुङला दुक सिनी टि वे,
“ल्‍होसा, ङ सियोनला ङे पेतुप गोङ नावु सुरकी दो दोके यिन्‍दुप मिरा च्‍यिक ज्‍योकिनो।
सी खोला तेपा किवे,
तिवा नाम्‍साङ ङोछाला मेख्‍येल्‍वी।”* २:६ यशैया २८:१६
तुक क्‍यानी ख्‍यिराङ सी खोला तेपा किवे, तीकी थोक्‍ला खो गोङ नावु वे, यिने तेपा मिकिवुतिवी थोक्‍ला ति कोन्‍छ्‍योककी सुङला साङ दुक सिनी टि वे,
“ती दो ति खाङ्‍बा जोप मीतिवी फेन मोथोवु सिनी क्‍युर वे,
यिन्‍सिनाङ ती ति सुरकी दो च्‍युङ्‍गिवी।”* २:७ भजन ११८:२२
तमा यम्‍बा सुङला दुक सिनी टि वे,
“दो च्‍यिककी मीतिवाला नर्तुक ग्‍यक ज्‍यिकिवी,
तमा टक च्‍यिककी मीतिवाला तला ग्‍यक ज्‍यिकिवी।”* २:८ यशैया ८:१४
ती दोके क्‍यानी मीतिवा तला ग्‍यकिवी, च्‍यिलासिसिन तिवी कोन्‍छ्‍योककी सुङ माङ्‍येन्‍दुप तप्‍की यिन। तिवी थोक्‍ला तुकै च्‍युङ्‍गुप ति कोन्‍छ्‍योककी गोमाला राङ सुङ्‍गुप सुङगी मुला डिकिवी।
यिने ख्‍यिराङ याङ तुकै मिन, ख्‍यिराङ ति कोन्‍छ्‍योककी पेन नङ्‍गुप गिपा ताङ खोकी ग्‍येल्‍खापकी कोङ्‍यार ताङ टेङ्‍बु वोतुप मिरिक ताङ कोन्‍छ्‍योककी खोरे मीतिवा यिन। खोकी ख्‍यिराङला नक्‍तोमी ने थेन्‍नी खोकी हलेवु वोसिरला टिन फेप्‍सुङ। तुक क्‍यानी ख्‍यिरा खोकी हलेवु लाकातिवा मी यम्‍बाला ख्‍याप्‍टाक कि थुप्‍शी। 10 गोमाला ख्‍यिराङ सी गिपा साङ मिनोक, यिने त याङ ख्‍यिराङ खोकी गिपा च्‍युङ वे। गोमाला याङ ख्‍यिराङला खोकी च्‍यम्‍बा माथोप वे, यिने त याङ ख्‍यिराङला खोकी च्‍यम्‍बा थोप्‍नी वे।
कोन्‍छ्‍योककी थोक्‍ला योक्‍पु दोके च्‍युङ्‍गुप कोर्ला
11 तुक क्‍यानी ङ्‍यिङ्‍ज्‍येवु अच्‍युनुपतिवा, ङ ख्‍यिराङला गोङ्‍बा शोयी। दी जम्‍बुलिङला दाक्‍पु ति ङ्‍यिमा चेयी पर सेक तिराङ देतुप छ्‍यिग्‍यपकी मी ताङ टम्‍नी देतुप मी दोके यिन सिरुप हाक्‍कोनी ख्‍यिरा सेमगी तेन्‍दोकला लङ्‍गुप जुकी नासाम दुक्‍टा नेसुर कुतुक दे। 12 यिने मिरिक यम्‍बाकी मीतिवी पर्ला ख्‍यिरा किताङ नालु ति ल्‍यामु वुङ गोकिवी। सी ख्‍यिराङला मेलोवा सिनी ख्‍यिरा तेन्‍दोकला लासिनाङ ख्‍यिरा लाका ल्‍यामु क्‍यावु ति थोङ्‍नी कोन्‍छ्‍योक फेवु तुजेला तिवी साङ खोला सोवा देक्‍शी।
13 ख्‍यिराङ तेपा कितुप मी यिन्‍दुप तप्‍की चोछ्‍येवु ग्‍येल्‍वु यिन्‍शी, ग्‍येल्‍वी ओङला देनी लुङ्‍बाला ग्‍येला कितुप मी छ्‍येतिवा यिन्‍शी, चोवो कोन्‍छ्‍योककी थोक्‍ला जम्‍बुलिङला वोतुप तेरी ओङ्‍ज्‍येन कितुपतिवी ओङला दे। 14 ती मी छ्‍येतिवा ति लाका दुक्‍टा कितुपतिवाला छ्‍येर्पा तेरुपला ताङ लाका ल्‍यामु कितुपतिवाला ताङ्‍देन कितुपला ग्‍येल्‍वुकी पेतुप मीतिवा यिन। 15 च्‍यिलासिसिन कोन्‍छ्‍योककी नोवा ति ख्‍यिरा लाका ल्‍यामु क्‍यानी ख्‍यिरा तेन्‍दोकला लानी ताम्‍ङे मेलोवा कितुप मी अम्‍बारङ्‍शिङतिवाला खरक्‍पा देतुप जोप यिन। 16 ख्‍यिराङ ति दिक्‍पी ओङ नेमा रङ्‍ज्‍येन थोप्‍नी वे, तुक क्‍यानी रङ्‍ज्‍येन वोतुप मीतिवा दोके मिजी क्‍योङ। रङ्‍ज्‍येन थोपुप तप्‍की ख्‍यिराङ ति काङ लाका मेलोवा क्‍यासिनाङ गिवी सिनी नासाम मातोङ, यिने कोन्‍छ्‍योकला शब्‍ज्‍यी कितुप योक्‍पु दोके च्‍युङ्‍नी मिजी क्‍योङ। 17 मी तेरीला ताङ्‍देन की, तेपा कितुप अच्‍युनुपतिवाला ङ्‍यिङ्‍ज्‍ये की, कोन्‍छ्‍योककी थोक्‍ला ज्‍यिवा की, चोछ्‍येवु ग्‍येल्‍वुला ताङ्‍देन की।
ख्रीष्‍टकी दोके छेटाङ खुरुप कोर्ला
18 ख्‍यिराङ योक्‍पुतिवा यिन्‍सिन, रङगी ज्‍यिन्‍दाकतिवाला ताङ्‍देन क्‍यानी तिवी ओङला दे। ख्‍यिराङला ल्‍यामु कितुप ताङ च्‍यङ्‍च्‍यु कितुप ज्‍यिन्‍दाकतिवाला तिराङ मिन, यिने ख्‍यिराङला दुक्‍टा कितुप ज्‍यिन्‍दाकतिवी ओङला साङ दे। 19 चुका मी तीकी खोरो काङ लाका मेलोवा माक्‍यासिनाङ ज्‍यिन्‍दाककी छेटाङ बिन्‍दुप पेला कोन्‍छ्‍योकला नासाम ताङ्‍नी हम क्‍या देकिवे, ती मी तीला कोन्‍छ्‍योककी गा किवी। 20 दोजो ख्‍यिरा लाका दुक्‍टा क्‍यावु तप्‍की ख्‍यिराङला मी दुसिनाङ हम क्‍यानी देसिन ख्‍येप्‍साङ गिवी सिसिन, ख्‍यिरा लाका ल्‍यामु क्‍यानी दुक्‍पा खुरुप पेला हम क्‍या देकिवी सिसिन कोन्‍छ्‍योककी ख्‍यिराङला गा किवी। 21 च्‍यिलासिसिन खोकी ख्‍यिराङला तीकी थोक्‍ला कताङ नङ्‍गुप यिन। ख्रीष्‍टकी साङ छेटाङ खुर्नी ख्‍यिरा थोक्‍ला पङ्‍बु च्‍युङ्‍सुङ। ती तप्‍की ख्‍यिराङ साङ खोकी क्‍या नङ्‍गुप दोके क्‍यानी मिजी क्‍योङ गोकिवी। 22 खोकी काङ साङ दिक्‍पा माक्‍या, खोकी ख नेमा जिनोक जोप ताम्‍ङे साङ माथेन।* २:२२ यशैया ५३:९ 23 मीतिवी खोला मारे तोङ्‍गुप पेला खोकी तिवाला छ्‍याक मालोक। दुक्‍पा तेरुप पेला तिवाला काङ ताम्‍ङे मेलोवा मासुङ। यिने तुजे छेसिमा कोन्‍छ्‍योककी राङ ठिम टेङ्‍बु क्‍या नङ्‍गिवी सिनी खोला रेवा क्‍यासुङ। 24 तमा दाक्‍पी दिक्‍पातिवा तेरी क्‍युर्नी कोन्‍छ्‍योककी थोङ्‍दाङला टेङ्‍बु वोतुप मिजी क्‍योङ्‍शी सिनी दाक्‍पी दिक्‍पा खोकी जुला खुर्नी ग्‍यङ्‍शिङला टुङ्‍सुङ। खोकी जुला म थेन्‍दुप तप्‍की ख्‍यिरा नेजु टेक्‍सुङ। 25 च्‍यिलासिसिन तोङ्‍ला ख्‍यिराङ ख्‍यम्‍नी गलुप लुकतिवा दोके यिन, यिने त याङ ख्‍यिरा सेम ल्‍हाटे कितुप गोठाला दोके यिन्‍दुप ताङ ख्‍यिराङला र्‍होकुप येशू ख्रीष्‍टकी ते ख्‍यिराङ लोक्‍नी वा वे।

*2:2-3 २:२-३ भजन ३४:८

*2:6 २:६ यशैया २८:१६

*2:7 २:७ भजन ११८:२२

*2:8 २:८ यशैया ८:१४

*2:22 २:२२ यशैया ५३:९