पत्रुसकी टिवु यिकी थल्मा
दी थेपकी कोर्ला
दी ति एशिया माइनरकी शारकी थाकाला वोतुप तेरी लुङ्बातिवाला टम्नी देतुप ख्रीष्टियानतिवाला पत्रुसकी टिवु यिकी तङ्बु यिन। तिवाला ति “कोन्छ्योककी पेतुप” मीतिवा सिनी सिवी। दी यिकी टिकुप खक्छ्येवु तेन्दोक ति दी यिकी रोकुपतिवाला ङाडेङ तेरुपला यिन। च्यिलासिसिन ख्रीष्टला तेपा क्यावु तप्की तिवा दुक्पा ताङ छेटाङला ख्येल्नोक। तुक क्यानी पत्रुसकी तिवाला ङाडेङ तेरुप पेला येशू ख्रीष्टकी लेन ल्यामु ताङ खो टुङ्नी ङोसु लावु ताङ खो येलुङ फेप्किवी सिनी तिवाला तेन्तेन रेवा बिन वे। दुक्पा ताङ छेटाङ खुरुप ति तिवी क्यावु तेपा टेङ्बु यिन। “ख्रीष्ट फेपुप तुजेला” खोकी तिवाला छ्यक्तक नङ्गिवी। ती तप्की लोदिमु क्यानी दुक्पा ताङ छेटाङ खुरिन सिरा हम कि गोकी।
दी यिकी रोकुपतिवाला दुक्पाकी पेला साङ ङाडेङ तेरिन सिरा ख्रीष्टला तेपा क्यावु दोके मिजी क्योङ सिनी पत्रुसकी गोङ्बा शु वे।
मुला राङ वोतुप लोप्च्येनतिवा
यिकीकी कोर्ला १:१-२
कोन्छ्योककी नङ्गुप थर्वाकी कोर्ला टेन्सो १:३-१२
मिजी टेङ्बु क्योङ्गुप कोर्ला टोङ्गु १:१३–२:१०
दुक्पाकी पेला साङ कि गोवु ख्रीष्टियानकी लाकातिवा २:११–४:१९
ख्रीष्टियानकी कुसु ज्यम्बु ताङ शब्ज्यी कितुप ५:१-११
सिन्दा क्यावु ५:१२-१४
1
पत्रुसकी टसी देलेक
1 टसी देलेक! ङ येशूकी लोमा छ्ये पत्रुसकी छ्योक नेसुर पोन्टस ताङ गलातिया ताङ कापाडोकिया ताङ एशिया ताङ बिथिनिया लुङ्बातिवा नेवा थरा थुरा गल्नी छ्यिग्यपकी मी दोके टम देतुप कोन्छ्योककी पेन नङ्गुप मीतिवाला दी यिकी ति टिवु यिनो। 2 पपा कोन्छ्योककी थल्माला ख्यिराङला ल्यामो हाक्कोनी पेन नङ्सुङ, तमा खोकी थु चाङ्मा नेसुर ख्यिराङ चाङ्मा च्युङ्सुङ। तुक क्यानी ख्यिरा येशू ख्रीष्टकी सुङला ङ्येन्नी तेपा क्यासिमा खोकी ठक नेसुर चाङ्मा च्युङ्सुङ।
ख्यिराङ तेरीला कोन्छ्योककी कटिन ताङ लोदिमु वुङ्शी।
सेन्बु लुवु रेवाकी थोक्ला कोन्छ्योकला सोवा देकुप
3 दाक्पी चोवो येशू ख्रीष्टकी पपा कोन्छ्योकला सोवा देकिन। च्यिलासिसिन खोकी येशू ख्रीष्टला शेप ने ङोसु लाङ्नी खोकी खोरे छासेकी कटिन नेमा दाक्पुला मिजी सम्बा नाङ्सुङ। तमा दाक्पु शिसिनाङ सेन्बु लुवु रेवा ङ्येन वे। 4 ती तिराङ मिन, कोन्छ्योककी खोरे पेन नङ्गुप मीतिवाला थोपुप मोलाम साङ नाङ्सुङ। ती मोलाम ति ना मोडोवु ताङ मेटेङ्बु मोडोवु ताङ नाम्साङ मेसेतुप यिन, तमा ती मोलाम ति दाक्पुला खोकी ग्येल्खापला टडिक क्यानी वे। 5 ख्यिरा कोन्छ्योकला तेपा क्यावु तप्की खोकी ख्यिराङला थर्वा नङ्गुप पर सेक खोकी ङार नेसुर ख्यिराङला र्होक्नी वे। ती थर्वा ति खोकी मी तेरीला ठिम क्या नङ्गुपला फेवु पेला खोकी ख्यिराङला छ्या देन्दुपला टडिक क्या वे। 6 तुक क्यानी तन्दा ख्यिराङ चेयी पर सेक रङगी मिजीला छेटाङ बङी वानी सेमला दुक्पा वोसिनाङ गा कि गोकिवी। 7 ती छेटाङ ति ख्यिरा तेपा टेङ्बु वोतुप छ्या देन्दुपला यिन। ख्यिरा क्यावु तेपा ति सेर मे नाङ्ला र्हेनी ङोमा जोवु सिनाङ छासे खक्छ्येवु वोतुप तप्की येशू ख्रीष्ट फेपुप तुजेला ख्यिराङला खोकी ग्येल्खापला सोवा ताङ मोवा ताङ ताङ्देन क्या नङ्गिवी।
8 ख्यिरा खोला नाम्साङ माथोङ्सिनाङ खोला ङ्यिङ्ज्ये किवी, तन्दा ख्यिरा खोला माथोङ्सिनाङ ख्यिरा खोला तेपा किवी, तमा ख्यिराङला नाम्साङ ताम्ङे क्या मिसिन्दुप गा ताङ किर्मु गिवी। 9 च्यिलासिसिन ख्यिरा खोला तेपा क्यावु तप्की खोकी ख्यिराङला दिक्पा ने थर च्यिनी नाम्साङ मिशिवु मिजी नङ्गिवी।
10 ती थर्वाकी थोक्ला कोन्छ्योककी लुङ्तेम्बातिवी साङ ल्यामो क्यानी हाक्कोवु छाल्सुङ। तमा तिवी कोन्छ्योककी ख्यिराङला थर्वा नङ्गुप कटिनकी कोर्ला नम्दर शेसुङ। 11 तिवी ती थर्वा ति नम पेला गिवी, चुक क्यानी गिवी सिनी हाक्कोवु छाल्सुङ। तमा तिवी सेमला वोतुप ख्रीष्टकी थु चाङ्मा नेसुर ख्रीष्टकी खुर गोवु छेटाङ ताङ ती ज्युक्ला वुङ्गुप मोवाकी थोक्ला गोमाला के पङ्बु छ्या तेन्सुङ। 12 कोन्छ्योककी लुङ्तेम्बातिवी नम्दर शेतुप ताम्ङे ति खोप्रे थोक्ला मिन, यिने ख्यिरा थोक्ला यिन। दी ताम्ङे ति देवाच्येन नेमा तङ्गुप कोन्छ्योककी थु चाङ्मा नेमा ख्यिराङला लेन ल्यामु ख्याप्टाक कितुपतिवी तसाम ख्यिराङला सिक्यावु यिन। ती ताम्ङे ति देवाच्येनकी लेन क्योलुप थुतिवी साङ छासे ल्हाप गा किवी।
मिजी टेङ्बु क्योङ्गुप कोर्ला
13 तुक क्यानी रङगी सेम ति थिला ज्याक्नी डेकला दे। तमा येशू ख्रीष्ट फेवु पेला खोकी ख्यिराङला नङ्गुप कटिन थोपुपला ख्यिराङ रेवा की। 14 ख्यिराङ कोन्छ्योककी कला ङ्येन्दुप खोकी पुज्युङपुमतिवा यिन्दुप तप्की गोमाला कोन्छ्योकला ङो माशेवु पेला क्यावु दोके सेम नोजु कितुप क्युर। 15 यिने ख्यिराङला कताङ नङ्गुप चोवो कोन्छ्योक टेङ्बु वोतुप दोके ख्यिराङ साङ ख्यिरा मिजीला वोतुप तेरी किताङ नालुतिवा टेङ्बु वुङ गोकिवी। 16 च्यिलासिसिन कोन्छ्योककी सुङला “ङ टेङ्बु वोतुप दोके ख्यिराङ साङ टेङ्बु वुङ गोकिवी।”* १:१६ लेवी ११:४४-४५; १९:२; २०:७ सिनी टि वे।
17 तमा सुला साङ ख्ये मापेवा क्यानी मीतिवी क्यावु लाका ल्हानी ठिम क्या नङ्गुप कोन्छ्योक ति ख्यिरा पपा सिनी सिक्यावु तप्की दी जम्बुलिङला देतुप पर सेक नरी खोला ज्यिवा खुर्नी मिजी क्योङ। 18 ख्यिराङला छ्या वे, ख्यिरा पगावा हङ्गावातिवा नेसुर वावु तेर्मेकी किताङ नालुतिवा नेसुर ख्यिराङ रङ्ज्येन थोप्सुङ। ती ति ना डोप सेर ताङ ङुलतिवा दोके गोङ तेनी ख्यिराङला थोपुप मिन, 19 यिने काङ साङ मडी मेतुप ताङ चाङ्मा वोतुप लुक रुक येशू ख्रीष्टकी गोङ छ्येर्मु ठक नेसुर गोङ तेनी ख्यिराङला थोपुप यिन। 20 कोन्छ्योककी दाक्पुला रङ्ज्येन नङ्गुपला जम्बुलिङ ज्येङ्गुप सिनाङ गोमाला के येशू ख्रीष्टला पेन नङ्गुप यिन, यिने तिङ्मी तुजेला ख्यिरा थोक्ला येशू ख्रीष्टला दी जम्बुलिङला तङ नङ्गुप यिन। 21 खो नेसुर ख्यिरा कोन्छ्योकला तेपा क्या वे। कोन्छ्योककी येशूला टुङ्नी शेपतिवा नेसुर ङोसु लङ च्यिनी मोवा नाङ्सुङ। तुक क्यानी ख्यिरा तेपा ताङ रेवा ति कोन्छ्योकला ज्याक्नी वे।
22 त ख्यिराङ खोकी सुङ टेङ्बुला युनी ख्यिरा मिजी ति टेङ्बु च्युङ्गुप तप्की रङगी अच्युनुपतिवाला खोनक्पा माक्यानी ङ्यिङ्ज्ये कियी वे, तरोङ साङ सेमगी दिङ नेज्यु च्यिककी च्यिकला छासे ङ्यिङ्ज्ये की। 23 ख्यिराङ ति ङोसु वोतुप ताङ नरी लुवु कोन्छ्योककी सुङ नेसुर मिजी सम्बा ङ्येतुप यिनो। खोकी सुङ ति ना डोप मिन, यिने नाम्साङ ना मोडोवु यिन। 24 तुक क्यानी कोन्छ्योककी सुङला दुक सिनी टि वे,
“तेरी मीतिवा च दोके यिन,
मीतिवा चोछ्ये वोसिनाङ तिवा ति चे मेन्दोक दोके यिन।
च रेर्पा गल्सिमा मेन्दोक ङ्यिल्गिवी,
25 यिने कोन्छ्योककी सुङ ति नरीकी नरी लुकिवी।”* १:२४-२५ यशैया ४०:६-८
ख्यिराङला ख्याप्टाक क्यावु सुङ ति दी राङ यिनो।