1 मी छ्‍युक्‍पुतिवा, दी ताम्‍ङे ति ङ्‍येना, ख्‍यिराङला ख्‍येल वुङ्‍गुप छेटाङतिवा नासाम तङ्‍नी ङु। तमा छासे ङुप्‍राङ की। 2 च्‍यिलासिसिन ख्‍यिरा टोङ्‍बा ति च्‍यम सिन वे, ख्‍यिरा कोन्‍दुप मज्‍यातिवाला मुक्‍पा ग्‍यप्‍नी वे। 3 ख्‍यिरा सेर ताङ ङुलला या छ्‍यान वे, तमा ती या ति ख्‍यिरा थोक्‍ला पङ्‍बु डिवी। तीकी ख्‍यिरा जु ति मे छिकुप दोके क्‍यानी ना तोङ्‍गितो। च्‍यिलासिसिन ख्‍यिराङ जम्‍बुलिङ ना डोप तुजे वुङ्‍गुप छल्‍सिनाङ रङगी थोक्‍ला टोङ्‍बा सकुप लाका तिराङ क्‍यासुङ। 4 ल्‍होसा, ख्‍यिरा रङगी शिङ खला लाका कितुपतिवाला तेर गोवु लतिवा माबिन वे। ती तप्‍की तिवा ख्‍योरो तेन्‍दोकला ङुप्‍राङ कियी वे। तिवी ङुप्‍राङ क्‍यावु ति ओङ छ्‍येन्‍बु कोन्‍छ्‍योककी सेन्‍नी वे। 5 ख्‍यिराङ दी जम्‍बुलिङला गा ताङ किर्मु क्‍यानी किकी तोङ्‍यिन सिरा मिजी क्‍योङ्‍यिन वे। तुक क्‍यानी ख्‍यिराङ सेतुप पेला लेप्‍सिनाङ खोरो मिजी तिराङ नासाम तङ्‍नी ग्‍यामु जो ज्‍याक्‍नी वे। 6 ख्‍यिरा काङ साङ क्‍येन मेतुप मीतिवाला क्‍येन बिन्‍नी तिवाला सेसुङ, यिने तिवी ख्‍यिराङला लाक्‍पा मालोक।

7 ती तप्‍की अच्‍युनुपतिवा, ख्‍यिराङ ति चोवो येशू फेवु तुजे माछेवा सेक्‍ला हम क्‍यानी दे। ल्‍होसा, सप्‍ले कितुप मीकी सशिङकी गोङ नावु डुप्‍सेनला ल्‍येशी नोनी येर्वी छ्‍यर्वा ग्‍यक्‍ता सेक ताङ गुन्‍बी छ्‍यर्वा ग्‍यक्‍ता सेक हम क्‍यानी गु देकिवी। 8 ती दोके क्‍यानी ख्‍यिराङ सेम थिला ज्‍याक्‍नी चोवो फेवु तुजेकी थोक्‍ला हम क्‍यानी गुनी देता, च्‍यिलासिसिन चोवो ङमु राङ फेप्‍कितो। 9 ती तप्‍की अच्‍युनुपतिवा, ख्‍यिराङ च्‍यिककी च्‍यिकला ङ्‍योशोक ङ्‍योशोक मासिर। मिसियाङ ख्‍यिराङ कोन्‍छ्‍योककी पर्च्याला ख्‍येल्‍गितो। ल्‍होसा, ख्‍यिराङला ठिम कितुप चोवो ति गे चाला राङ वोतो।

10 अच्‍युनुपतिवा, कोन्‍छ्‍योककी मिङला नम्‍दर शेतुप लुङ्‍तेम्‍बातिवाला ल्हो। तिवा चुक क्‍यानी छेटाङ खुरुप ताङ हम क्‍यान देतुप ति नासाम ताङ्‍नी ख्‍यिराङ साङ तिवी दोके क्‍यानी लुमु से। 11 ल्‍होसा, हम क्‍या देतुपतिवा मोलाम वोतुप यिनो। अय्‍यूबकी चुक क्‍यानी हम क्‍यानी देसुङ, तमा तिङ्‍ला कोन्‍छ्‍योककी तीला मोलाम नाङ्‍सुङ सिरुप ताम्‍ङे साङ ख्‍यिरा हाक्‍को वे। तमा चोवो कोन्‍छ्‍योक ति ङ्‍यिङ्‍ज्‍ये ताङ च्‍यम्‍बा नङ्‍गुप यिन सिरुप साङ हाक्‍को वे।

12 अच्‍युनुपतिवा, खक्‍छ्‍येवु ताम्‍ङे ति काङ यिन सिसिन, ख्‍यिरा पर्ला ताम्‍ङे थाक्‍छ्‍येतुप पेला नाम्‍साङ न माक्‍योल। देवाच्‍येन ताङ जम्‍बुलिङकी थोक्‍ला याङ्‍ना चुका च्‍यालककी थोक्‍ला साङ न माक्‍योल। चुका ताम्‍ङे साङ यिन्‍सिन यिन सी, मिन्‍सिन मिन सी। तुक क्‍यासिन कोन्‍छ्‍योककी ख्‍यिराङला पर्च्या मोतोङ्‍गिवी।

13 ख्‍यिरा पर्ला ललाइकी छेटाङ खुरिन वोसिन तीकी कोन्‍छ्‍योकला मोपोर किशी। ललाइला सेम गा लान वोसिन तीकी कोन्‍छ्‍योकला सोवा देकुप लुतिवा लङ्‍शी। 14 ख्‍यिरा पर्ला ललाइ नेर्पु वोसिन तीकी चर्चला गोमा कितुप मी छ्‍येतिवाला कताङ्‍नी चोवो येशूकी मिङला नुम्‍शाल ग्‍यप्‍नी तीकी थोक्‍ला मोपोर किशी। 15 तेपा क्‍यानी मोपोर क्‍यासिन नेर्पु टेकिवी, तमा कोन्‍छ्‍योककी ती नेर्पुला येर लोङ्‍गिवी। तीकी दिक्‍पा क्‍या वोसिनाङ तीकी क्‍यावु दिक्‍पा ति माफ ङ्‍येकिवी। 16 ती तप्‍की ख्‍यिराङ च्‍यिककी च्‍यिकला ङे दिक्‍पा क्‍यावु यिन सिनी सेम ग्‍युर, तमा च्‍यिककी च्‍यिकला मोपोर की। तुक क्‍यासिन चोवोकी ख्‍यिराङला टेक ज्‍यिकिवी। च्‍यिलासिसिन कोन्‍छ्‍योककी थोङ्‍दाङला टेङ्‍बु वोतुप मीतिवी क्‍यावु मोपोर ति ङार छ्‍येवु गिवी। 17 कोन्‍छ्‍योककी लुङ्‍तेम्‍बा एलिया साङ दाक्‍पु दोके किताङ नालु वोतुप मी राङ यिन, यिने तीकी छ्‍यर्वा मग्‍यक्‍शी सिनी कोन्‍छ्‍योकला मोपोर क्‍यासुङ, तमा लो सुम ताङ ल टुक सेक जम्‍बुलिङला छ्‍यर्वा छ्‍येसुङ। 18 येलुङ तीकी छ्‍यर्वा ग्‍यक्‍शी सिनी कोन्‍छ्‍योकला मोपोर क्‍यासुङ, तमा छ्‍यर्वा ग्‍यप्‍नी सशिङ खला छासे सप्‍ले ल्‍यासुङ।

19 अच्‍युनुपतिवा, ख्‍यिरा पर्ला ललाइकी कोन्‍छ्‍योककी सुङला युकुप क्‍युर्नी ज्‍याक्‍सिन तीला येलुङ लोक्‍नी टि शोक। 20 दी ताम्‍ङे ति हाक्‍कोवा की, दोजो ललाइकी दिक्‍छेन मिरा च्‍यिकला लाम मेटेङ्‍बुला युकुप नेसुर लोक्‍नी टि वासुङ सिसिन, ती दिक्‍छेन तीला शेप ने र्‍होकिवी, तमा तीकी क्‍यावु दिक्‍पातिवा साङ माफ ङ्‍येकिवी।