1 ख्‍यिरा पर्ला कङगी तेन्‍दोकला खाँदा ताङ थमु शोर्किवी? ती ति ख्‍यिरा पर्ला रङगी थोक्‍ला तिराङ च्‍युङ्‍शी सिनी सेमला थमु ग्‍यकुप नासाम नरी वोतुप तप्‍की यिन। 2 ख्‍यिराङ ख्‍यिरा सेमला नो क्‍यावु च्‍यालकतिवा थोप्‍शी सिरुप याङ नो किवी, यिने मेङ्‍येवी। ख्‍यिराङ ख्‍यिरा नो क्‍यावु च्‍यालकतिवा थोपुपला मी सेतुप ताङ देर्पा क्‍यासिनाङ, खाँदा ताङ थमु ग्‍यप्‍सिनाङ ख्‍यिराङला काङ साङ मेङ्‍येवी। च्‍यिलासिसिन ख्‍यिराङ कोन्‍छ्‍योकला मोलोङ्‍गिवी। 3 ख्‍यिरा कोन्‍छ्‍योकला लोङ्‍गुप याङ लोङ्‍गिवी, यिने मेङ्‍येवी। च्‍यिलासिसिन ख्‍यिराङ खोरुङला तिराङ गा ताङ किर्मु जोप नासाम मेलोवा ताङ्‍नी लोङ्‍गिवी। 4 ओ शम्‍डेन कितुप टेङ, कोन्‍छ्‍योकला तेपा क्‍यानी साङ जम्‍बुलिङला गा कितुप ति कोन्‍छ्‍योक ताङ मुला डला गलुप यिन सिरुप ति ख्‍यिराङला छ्‍या मे? सु दी जम्‍बुलिङला गा किवे, ती ति कोन्‍छ्‍योक ताङ मुला डला गलुप यिन। 5 कोन्‍छ्‍योककी दाक्‍पुला नङ्‍गुप थु चाङ्‍माकी दाक्‍पुला छासे गा लानी ङ्‍यिङ्‍ज्‍ये किवी सिनी कोन्‍छ्‍योककी सुङला टिवु ति तेर्मे यिन सिनी ख्‍यिराङ नासाम तोङ्‍गिवी? 6 यिने खोकी दाक्‍पुला छासेकी कटिन नङ्‍गिवी। ती तप्‍की कोन्‍छ्‍योककी सुङला दुक सिनी टि वे,

7 तुक क्‍यानी रङगी मिजी ति कोन्‍छ्‍योककी ओङला ज्‍योक, तमा शैतानकी तेन्‍दोकला लो। तुक क्‍यासिन ती शैतान ति ख्‍यिरा नेसुर टोनी डिवी। 8 तमा ख्‍यिराङ कोन्‍छ्‍योककी चिप्‍ला ग्‍युक, तुक क्‍यासिन खो ख्‍यिरा चिप्‍ला फेप्‍किवी। ओ दिक्‍छेनतिवा, ख्‍यिराङ दिक्‍पा कितुप क्‍युर। ओ सेम नटेकोटे वोतुप टेङ, ख्‍यिराङ सेम टेङ्‍बु क्‍यानी यु। 9 ख्‍यिरा क्‍यावु दिक्‍पाकी थोक्‍ला पप की, तमा दुङल क्‍यानी ङु। ख्‍यिराङ गोटे कितुप क्‍युर ज्‍याक्‍नी पप की। लोदिमु कितुप क्‍युर ज्‍याक्‍नी दुङल की। 10 ख्‍युरुङ कोन्‍छ्‍योककी थोङ्‍दाङला कुसु ज्‍यम्‍बु क्‍यानी मिजी क्‍योङ, तमा खोकी ख्‍युरुङला छ्‍ये जो नङ्‍गिवी।

11 ओ अच्‍युनुपतिवा, ख्‍यिराङ च्‍यिक ताङ च्‍यिककी तेन्‍दोकला ताम्‍ङे मेलोवा माकी। सी खोरो नुपकी तेन्‍दोकला ताम्‍ङे मेलोवा क्‍यानी क्‍येन तेर्किवे, तीकी कोन्‍छ्‍योककी नङ्‍गुप ठिमकी तेन्‍दोकला ताम्‍ङे मेलोवा कितुप ताङ क्‍येन तेरुप यिन। ख्‍यिरा ठिमकी तेन्‍दोकला क्‍येन बिन्‍सिन कोन्‍छ्‍योककी ठिमला सुङ्‍गुप दोके मिजी क्‍योङ्‍गुप मिन, ठिमकी तेन्‍दोकला क्‍येन बिन्‍दुप यिन। 12 ठिम नङ्‍गुप ताङ ठिम कितुप ति मिरा च्‍यिक राङ वे। खोकी र्‍होकुप साङ थुप्‍किवी, ना साङ तोङ थुप्‍किवी। तुक क्‍यानी रङगी युल्‍वातिवाला क्‍येन तेरुप ति ख्‍युरुङ सु यिन?

13 ख्‍यिराङ दी ताम्‍ङे ति ङ्‍येना, “हारिङ याङ्‍ना सला दाक्‍पु ग्‍येसा यीला गल्‍नी लो खोर्मा यी देनी छोङ क्‍यानी टोङ्‍बा शोम्‍बुप्‍नो” सिनी सिरुप मीतिवा! 14 यिने ख्‍यिरा मिजीला सला काङ ख्‍येल्‍गिवी सिरुप ति ख्‍यिराङला छ्‍या मे। ख्‍यिरा मिजी याङ काङ यिन रो? ख्‍यिरा मिजी याङ उकुर च्‍यिक मिककी थोङ्‍गुप ताङ तोक तोर्नी डोप मुसिल दोके यिन। 15 ख्‍यिरा तुक सिरुप छोलेयाङ बोरु “कोन्‍छ्‍योककी नोवा वोसिन, दाक्‍पु सेन्‍बु देनी दुकै कितुप तुकै कितुप।” सिनी सि गोकिवी। 16 यिने तन्‍दा ख्‍यिराङ रङगी मिजीकी थोक्‍ला नो क्‍यावु ताम्‍ङेला छासे तेके किवी। तुका लाका ति दुक्‍टा यिन। 17 ती तप्‍की चुका मी तीकी लाका ल्‍यामु कि गोकिवी सिरुप छ्‍या वोसिनाङ मिकिवी सिसिन, तीकी दिक्‍पा क्‍यावु यिन।