1 ङे ङ्‍यिङ्‍ज्‍येवु अच्‍युनुपतिवा, ख्‍यिरा पर्ला माङ्‍शोक गेकेन च्‍युङ्‍गुप नो माकी, च्‍यिलासिसिन येन्‍देन तेरुप गेकेनतिवाला कोन्‍छ्‍योककी मङ छासे क्‍यानी पर्च्या तोङ्‍गिवी। 2 दाक्‍पु तेरीकी च्‍यिक मे च्‍यिक याङ मेलोवा क्‍यावु राङ गिवी। चुका मी तीकी खोरो ख डेकला ज्‍योकिवे, तीकी खोरो जुला साङ डेकला ज्‍योकिवी। तमा ती ति मी टेङ्‍बु च्‍युङ्‍गिवी। 3 ततिवाला ओङला ज्‍योकुपला खला खम्‍देर ग्‍यप्‍सिन, कनिवा डोयी दे लङ्‍गिवे, तेवा राङ टिनी डो थुप्‍किवी। 4 टुतिवाला ल्हो, तिवा वुर्तुक ग्‍येर्पु ग्‍यप्‍सिनाङ टु फार ताङ छुर क्‍योकुप पतवार टिक्‍पे यी थ्‍वोनी टु ग्‍येर्पु तोङ्‍गुप मी तीकी कनिवा ताङ्‍नी डोयी दे लङ्‍गिवे, तेवा राङ डिवी। 5 ती दोके दाक्‍पी च्‍येलाक साङ टिक्‍पे यिन्‍सिनाङ अम्‍बारङ्‍शिङ कितुप ताम्‍ङे ग्‍येर्पु ग्‍येर्पु थेन्‍गिवी।

मे मेवुर टिक्‍पे यीकी साङ नाठुङ ग्‍येर्पु ग्‍येर्पुतिवा पुसुकी जेवी। 6 दाक्‍पी च्‍येलाक साङ मे दोके यिन। ती ति जुला वोतुप येन्‍लकतिवी नाङ्‍ला दिक्‍पा कि ज्‍यितुप दुक्‍टा दोके राङ यिन। दीकी जोसालेन्‍सिन दाक्‍पी तेरी मिजीला मेलोवा जेवी, तमा तेरी मिजी ति ङ्‍येलाकी नाम्‍साङ मिशिवु मे नाङ्‍ला क्‍योल्‍गिवी।

7 नम्‍बा तेरीकी सेम्‍ज्‍येन ताङ च्‍यच्‍युम ताङ जु टिनी युकुप सेम्‍ज्‍येन ताङ ग्‍येम्‍छोकी सेम्‍ज्‍येनतिवा ति मीतिवी दुल्‍गिवी, 8 यिने दाक्‍पी च्‍येलाकला सी साङ डेकला ज्‍योक मुथुपी। दीकी नरी ताम्‍ङे मेलोवा तिराङ क्‍यावु ति क्‍यातोक किवी। तमा दीकी दाक्‍पुला तुक सोवु दोके क्‍यानी ङ्‍येलाला क्‍यल्‍नी शि ज्‍यिकिवी। 9 दी दाक्‍पी च्‍येलाककी राङ दाक्‍पी पपा कोन्‍छ्‍योकला सोवा साङ देकिवी, खोकी जुजमला जो नङ्‍गुप मीतिवाला मोताप साङ देप्‍किवी। 10 दाक्‍पी ख च्‍यिक नेमा राङ मीला मोलाम साङ थोप्‍किवी, मोताप साङ देप्‍किवी। ङे ङ्‍यिङ्‍ज्‍येवु अच्‍युनुपतिवा, ख्‍यिराङ ति तुक कितुप मेङ्‍गिवी। 11 काङ छ्‍यु दोलुप छ्‍यी पुङ च्‍यिक नेमा छ्‍यु शिम्‍बु ताङ छ्‍यु खक्‍ती थेन्‍गिवी रो? 12 ङे ङ्‍यिङ्‍ज्‍येवु अच्‍युनुपतिवा, काङ अन्‍जीरकी दोङ्‍बुला जैतुन, याङ्‍ना गुन्‍डुम दोङ्‍बुला अन्‍जीर गोर्किवी रो?। ती दोके क्‍यानी छ्‍यु छेटोक दोलुप छ्‍यी पुङ नेमा छ्‍यु शिम्‍बु थेन मुथुपी।

13 ख्‍यिरा पर्ला रिक्‍पा ताङ येन्‍देन वोतुप मी सु वे? तीकी खोरो किताङ नालु ल्‍यामु नेसुर खुरुङला वोतुप रिक्‍पा ताङ येन्‍देन छ्‍या तेन। ती किताङ नालु ति कुसु ज्‍यम्‍बु ताङ रिक्‍पा नेसुर वुङ गोकिवी। 14 यिने दोजो ख्‍यिरा सेमला ठतोक कितुप ताङ खुरुङला तिराङ नासाम तोङ्‍गिवी सिसिन, छासे रिक्‍पा वे सिनी तुका ताम्‍ङेला हम्‍बा माकी, यिने ताम्‍ङे टेङ्‍बु तिराङ की। 15 च्‍यिलासिसिन तुका परकी रिक्‍पा ति कोन्‍छ्‍योक नेमा वावु रिक्‍पा मिन, दी जम्‍बुलिङ ताङ मी नासाम मेलोक्‍पा नेसुर ताङ डेकी ओङ नेमा वावु रिक्‍पा यिन। 16 कनी ठतोक कितुप ताङ खुरुङला तिराङ च्‍युङ्‍शी सिरुप सेम नोके, ते खाँदा शोरुप ताङ तेरी परकी लाका दुक्‍टातिवा गिवी। 17 यिने देवाच्‍येन नेमा वावु रिक्‍पा ति गोमाला टेङ्‍बु वोतुप ताङ तिङ्‍ला लोदिमु वोतुप ताङ सेम बोल्‍मु ताङ मी यम्‍बी सिक्‍यावु ताम्‍ङेला ङ्‍येन्‍दुप ताङ च्‍यम्‍बा वोतुप ताङ डेलु ल्‍यामु गरुप दोङ्‍बु दोके मिजी ल्‍यामु क्‍योङ्‍गुप गिवी। यम्‍बा देवाच्‍येन नेमा वावु रिक्‍पा ति ललाइला ल्‍यामु ललाइला मेलोवा मिकिवु ताङ खोनक्‍पा मेतुप गिवी। 18 तमा नरी मीतिवाला डिङ तेरुप छोलुप मीतिवाला ज्‍युक्‍ला कोन्‍छ्‍योककी थोङ्‍दाङला टेङ्‍बु वोतुप च्‍युङ्‍गिवी।