2
मीला ख्ये बेतुप कोर्ला येन्देन
1 ङे ङ्यिङ्ज्येवु अच्युनुपतिवा, ख्यिराङ मोवा वोतुप दाक्पी चोवो येशू ख्रीष्टला तेपा कितुप मीतिवा यिन्दुप तप्की मी सुला साङ ख्ये बेतुप लाका माकी। 2 दोजो मी ललाइ सेरकी सोर्तुकतिवा तानी मज्या ल्यामु कोन्नी ख्यिराङ जोम्बुप दासाला वासुङ, तमा यम्बा मी पेराङ्बु यी साङ मज्या सेर्पा कोन्नी तेराङ वासुङ सिसिन, 3 ती मज्या ल्यामु कोन्दुप मी तीला ताङ्देन क्यानी “दे दासा ल्यामुला जोल्हमो क्यानी ज्यु!” सिनी सिवी, यिने ती मी पेराङ्बु मज्या सेर्पा कोन्नी वावु तीला ति “ख्युरुङ ते राङ लानी दे, याङ्ना ङे काङ्बी चाला दे!” सिनी सिवी सिसिन, 4 ख्यिराङ मीला ख्ये बेतुप ताङ सेम मेलोक्पा क्यानी मीला ठिम कितुप मीतिवा यिन।
5 तुक क्यानी ङे ङ्यिङ्ज्येवु अच्युनुपतिवा, दी ताम्ङे ङ्येना। जम्बुलिङला वोतुप पेराङ्बुतिवाला कोन्छ्योककी पेनी तिवी क्यावु तेपाला छ्युक्पु जोनी खोला ङ्यिङ्ज्ये कितुपतिवाला तेरिन सिनी खोकी थाक्छ्येन नङ्गुप ग्येल्खापला दे छ्योवु जो मनङ्गिवी रो? 6 यिने ख्यिरा याङ पेराङ्बुतिवाला ङ्यिङ्मर क्यासुङ। काङ मी छ्युक्पुतिवी ख्यिराङला ओङ्ज्येन क्यानी दुक्पा मेतेर्वी रो? काङ तिवी ख्यिराङला ठिम्खाङला टिनी मोक्योल्वी रो? 7 काङ तिवी ख्यिरा तेपा क्यावु चोवो येशू ख्रीष्टला साङ मारे तङ्गुप मिन रो? 8 कोन्छ्योककी सुङला साङ “खोरो युल्वातिवाला रङला दोके ङ्यिङ्ज्ये की।”*२:८ लेवी १९:१८ सिनी टि वे। वुतुङ के ख्यिरा ती कोन्छ्योककी सुङला वोतुप खक्छ्येवु कला ङ्येन्सुङ सिसिन ख्यिरा ल्यामु राङ क्यावु यिन। 9 यिने ख्यिरा मीला ख्ये बेतुप लाका क्यासुङ सिसिन ख्यिराङ कोन्छ्योककी नङ्गुप ठिमला मेङ्येन्दुप ताङ दिक्पा क्यावु यिन। 10 ललाइ मीतिवी कोन्छ्योककी नङ्गुप ठिमला सिक्यावु दोके तेरी किवी, यिने ती ठिमकी नाङ्ला वोतुप ताम्ङे च्यिक ति मेङ्येन्दिवी सिसिन तीकी ती ठिम तेरी माङ्येन्दुप यिन। 11 च्यिलासिसिन “शम्डेन माकी।” सिरुप च्यिक राङ वोतुप कोन्छ्योककी “मी मासे।” सिनी साङ सुङ वे। दोजो मी च्यिककी शम्डेन ति मिकिवी, यिने मी सेकिवी सिसिन, ती मी तीकी कोन्छ्योककी नङ्गुप ठिमला मातेन्दुप यिन। 12 ख्यिराङला रङ्ज्येन नङ्गुप कोन्छ्योककी ठिमला सुङ्गुप दोके ख्यिरा ताम्ङे लप्ताङ ताङ किताङ नालु ल्यामु की। मिसियाङ ती ठिमकी ख्यिराङला पर्च्या तोङ्गिवी। 13 च्यिलासिसिन कोन्छ्योककी ठिम क्या नङ्गुप पेला मीला च्यम्बा मिकिवु तीला खोकी साङ च्यम्बा माक्यानी ठिम क्या नङ्गिवी, यिने च्यम्बा क्यावु मी ति खोकी ठिम कितुप पेला ग्येल्गिवी।
लाका मेतुप तेपा ति फेन मोथोवु यिन
14 ङे ङ्यिङ्ज्येवु अच्युनुपतिवा, दोजो मी ललाइकी “ङ येशूला तेपा किवी।” सिनी सिवी, यिने तेपा क्यावु दोके लाका ति मिकिवी सिसिन, तीला काङ ख्येप्साङ गिवी रो? काङ तीकी क्यावु तेपाकी तीला र्होक थुप्किवी रो? 15 दोजो ललाइ नुप रे नुम रे मज्या सेर्पा कोन्दुप वे, तमा तिवाला ङ्यिमी टेङकी साप समा साङ मलाङ्गुप वे सिसिन, 16 ख्यिरा पर्ला ललाइकी तीला “लोदिमु क्यानी ग्युक, मज्या टेन्बु कोन्नी दे, तमा डाता सेक क्यानी समा सो।” सिनी सिवी, यिने तीला गोवु च्यालकतिवा मेतेर्वी सिसिन तीला काङ ख्येप्साङ वे रो? 17 ती दोके येशूला तेपा क्यासिमा साङ तेपा क्यावु दोके लाका ति मिकिवी सिसिन, ती तेपा ति काङ साङ फेन मोथोवु डिवी।
18 यिने दोजो मी ललाइकी “ख्युरुङला तेपा वे, ङला ति किताङ नालु ल्यामु वे। ख्योरो किताङ नालु मेतुप तेपा ति ङला छ्या तेन! तमा ङे क्यावु किताङ नालु नेमा ङे तेपा ति ख्युरुङला छ्या देनिन।” सिनी सिवी। 19 कोन्छ्योक च्यिक राङ वे सिनी ख्यिरा सिवी, ती ताम्ङे ति ल्यामु यिन। डेतिवी साङ तुकै राङ सिवी, यिने तिवा ज्यिवा लानी र्हुकिवी। 20 ओ अम्बारङ्शिङतिवा, लाका मेतुप तेपा ति तेर्मे यिन सिरुप ति ख्यिराङ हाक्कोवु नोकिवी? 21 दाक्पी हङ्गावा अब्राहामकी खोरो पुज्युङ इसहाक ति कोन्छ्योककी थोक्ला जिन्बा पुल्सिमा ती ति खोकी थोङ्दाङला टेङ्बु च्युङ्गुप मिन रो? 22 ख्युरुङला छ्या वे, अब्राहामकी तेपा तिराङ क्यानी मिन, यिने तेपा क्यावु दोके लाका साङ क्यावु तप्की तीकी तेपा क्यावु ति टेङ्बु च्युङ्सुङ। 23 कोन्छ्योककी सुङला “अब्राहामकी कोन्छ्योकला तेपा क्यावु तप्की खोकी अब्राहामला टेङ्बु वोतुप यिन सिनी चिसुङ।” सिनी टि वोतुप सुङ ति तेरी छेसुङ। तमा मीतिवी अब्राहाम ति कोन्छ्योककी दाल्जा यिनोक सिनी सिक्यासुङ। 24 तुक क्यानी ख्यिरा हाक्कोकिवी, तेपा तिराङ क्यानी मिन, यिने तेपा क्यावु दोके लाका क्यासिमा तिराङ मी ति कोन्छ्योककी थोङ्दाङला टेङ्बु च्युङ्गिवी। 25 पुम्पेजा छ्येमु राहाबकी साङ च च्येतुपला तङ्गुप इस्राएलकी मीतिवाला गासो शुनी पिशोर च्यितुप तप्की तीकी क्यावु लाका नेमा राङ ती ति कोन्छ्योककी थोङ्दाङला टेङ्बु च्युङ्गुप मिन रो? 26 तुक क्यानी उ मेतुप जु ती शेप दोके, लाका मेतुप तेपा साङ शेप यिन।